U Minsku zatrymali turkmienskaha palityčnaha ŭciekača, hramadzianina Šviecyi
18 lipienia ŭ Nacyjanalnym aeraporcie Miensku byŭ zatrymany hramadzianin Švecyi turkmenskaha pachodžańnia Šeryf Kłyč Čary Anamuradaŭ (pavodle švedzkich dakumentaŭ Šeryf Kłyč).
Jaho zatrymali pamiežniki na zapyt z Turkmenistanu — turkmenskija specsłužby abvinavačvajuć jaho ŭ machlarstvie. Tak patłumačyli pryčynu zatrymańnia biełaruskija milicyjanty.
Palityčny ŭciakač turkmenskaha pachodžańnia Šeryf Kłyč (Čary Anamuradaŭ) maje padvojnaje hramadzianstva — Švecyi i Rasiejskaj Federacyi. Z 2003 hodu jon stała pražyvaje ŭ Stakholmie. Na zaprašeńnie svajho siabra i kalehi Murata Chanalijeva, jaki maje biełaruskaje hramadzianstva i žyvie ŭ Miensku z 1986 hodu, 18 lipienia Čary Anamuradaŭ z darosłaj dačkoj prylacieŭ u Miensk z rasiejskim pašpartam, kab nie atrymlivać biełaruskuju vizu. U aeraporcie jaho zatrymali biełaruskija pamiežniki — pavodle ich infarmacyi, Čary Anamuradaŭ znachodzicca ŭ vyšuku na zapyt Turkmenistanu. Biełaruskija pamiežniki pieradali jaho transpartnaj milicyi.
Presavy sakratar Dziaržaŭnaha pamiežnaha kamitetu Biełarusi Alaksandar Ciščanka paviedamiŭ, što pamiežniki dziejničali dakładna pavodle instrukcyi: kali čałaviek znachodzicca ŭ mižnarodnym vyšuku, niezaležna ad hramadzianstva jaho pieradajuć milicyi.
Muratu Chanalijevu, jaki sustrakaŭ Čary Anamuradava ŭ aeraporcie, milicyjanty ŭčora paviedamili, što Čary Anamuradaŭ budzie departavany paśla vykanańnia ŭsich patrebnych pracedur u Turkmenistan, a pakul jon budzie źmieščany ŭ SIZA.
Miesca znachodžańnia Anamuradava nieviadomaje, u mienskim SIZA na vulicy Vaładarskaha jaho niama. Rodnyja źviazalisia z ambasadaj Švecyi ŭ Miensku, ambasadar robić zapyty i paabiacała ŭ druhoj pałovie dnia źviazacca z dačkoj Anamuradava.
Turkmenski žurnalist Čary Anamuradaŭ režymam Nijazava ŭ 1990-ch hadach byŭ asudžany da 18 hadoŭ źniavoleńnia. Jon pravodziŭ žurnalisckija raśśledavańni pa narkatrafiku z Aŭhanistanu. Paśla traciny adbyćcia terminu byŭ amnistavany. Paśla hetaha dva hady žyŭ u Miensku, potym pierajechaŭ u Prahu, pracavaŭ u turkmenskaj słužbie Radyjo Svaboda. U 2003 hodzie atrymaŭ palityčny prytułak u Švecyi. Z taho času ŭ Biełarusi Čary Anamuradaŭ nia byŭ.
Kamientary