MAHATE: Adkaznaść za biaśpieku i achovu AES, jakaja budujecca, lažyć na dziaržavie

Adkaznaść za kiravańnie pramysłovaj biaśpiekaj, radyjacyjnuju biaśpieku i achovu AES, jakaja budujecca, lažyć na dziaržavie — takaja sutnaść adkazu pres-słužby Mižnarodnaha ahienctva pa atamnaj enierhii na pytańnie, ci maje namier MAHATE praviarać infarmacyju pra incydent na budaŭnictvie Biełaruskaj AES.

Nahadajem, 25 lipienia ŚMI paviedamili, što 10 krasavika padčas trenirovačnaj probnaj ŭstanoŭki korpusa reaktara 330-tonny ahrehat sarvaŭsia i ŭpaŭ z vyšyni ad 2 da 4 mietraŭ. Hienpadradčyk budaŭnictva stancyi — rasijskaja hrupa kampanij «ASE» — paśpiašaŭsia abvierhnuć hetuju infarmacyju, adnak Minenierha Biełarusi pryznała, što na stancyi była «niaštatnaja situacyja». «Niaštatnaja situacyja adbyłasia na placoŭcy zachoŭvańnia korpusa reaktara pry praviadzieńni takiełažnych rabot pa jaho pieramiaščeńni ŭ haryzantalnaj płoskaści», — havaryłasia ŭ paviedamleńni Minenierha.

U pres-słužbie MAHATE adznačajuć, što ahienctva daje «padtrymku dziaržavam-členam u ich pracy pa vykanańni ŭziatych na siabie abaviazkaŭ». «My robim heta, da prykładu, praz našy standarty biaśpieki abo šlacham padavańnia dziaržavam-členam pavodle ich zapytu ahladaŭ pa biaśpiecy i achovie i akazańnia acenačnych pasłuh. Dla luboj śpiecyfičnaj infarmacyi my rekamiendujem źviazacca ź miascovymi ŭładami», — havorycca ŭ kamientaryi.

U pres-słužbie MAHATE taksama padkreślili, što «stancyja ŭ pracesie budaŭnictva nie ŭjaŭlaje niebiaśpieki dla nasielnictva da taho momantu, pakul nie zahružanaje jadziernaje paliva».

Varta adznačyć, što ŭ krasaviku hetaha hoda padčas vizitu ŭ Biełaruś hienieralny dyrektar MAHATE Jukija Amana naviedaŭ budoŭlu AES. «Možna skazać, što stvareńnie dvuchbłokavaj stancyi ŭ Astraŭcy ŭjaŭlaje saboj adzin z najbolš paśpiachovych prajektaŭ u krainach, jakija vychodziać na šlach raźvićcia atamnaj enierhietyki», — skazaŭ jon tady.

Jukija Amana taksama zajaviŭ: «Niama nieabchodnaści nahadvać, što biaśpieka źjaŭlajecca asnoŭnym napramkam našaj pracy, i avaryja na Fukusimie prademanstravała, što navat u vielmi raźvitych u pramysłovych adnosinach krainach mahčymyja avaryi takoha rodu». Adznačyŭšy, što z momantu avaryi na Fukusimie biaśpieka AES u śviecie značna vyrasła, hiendyrektar MAHATE padkreśliŭ, što «heta nie daje nam jakoj-niebudź padstavy da samazaspakajeńnia».

Zaraz u Biełarusi ź vizitam znachodziacca ekśpierty MAHATE. Jak paviedamiła 27 lipienia Ministerstva enierhietyki, jany prybyli «z metaj sumiesnaj acenki pracesu padrychtoŭki misii MAHATE pa razhladzie prajektavańnia placoŭki z ulikam źniešnich padziej (misija SEED)», jakaja raniej była zapytanaja biełaruskim bokam. Śpiecyjalnyja misii SEED aceńvajuć vybar budaŭničaj placoŭki dla ŭźviadzieńnia atamnych abjektaŭ.

• 0
• 0
• 0
• 0
• 0
• 0
• 0
• 0