Stolinskim rajonnym adździełam Śledčaha kamiteta zavieršana rasśledavańnie spravy pa č. 4 art. 209 KK (machlarstva, učynienaje ŭ asabliva bujnym pamiery) u dačynieńni da 27-hadovaj miascovaj žycharki.
Jak paviedamiła aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova, žančyna abvinavačvajecca ŭ tym, što sa śniežnia 2011 hoda pa 31 śniežnia 2015 hoda šlacham padmanu zavałodała ŭ šaści mužčyn hrašovymi srodkami i inšaj majomaściu na sumu zvyš 240 młn niedenaminavanych rubloŭ.
Kožnamu z paciarpiełych jana abiacała ŭziać ź im šlub, zahadzia nie majučy namier hetaha zrabić. U chodzie razmovy z hetymi mužčynami ŭ internecie i pa mabilnaj suviazi paviedamlała niepraŭdzivyja źviestki pra siabie.
«Niaviesta» vydavała siabie za inšuju asobu, prysvoiŭšy fatahrafiju nieznajomaj joj dziaŭčyny pryvabnaj źniešnaści. Pry hetym jana zamoŭčvała, što znachodzicca ŭ šlubie i maje troch małaletnich dziaciej.
Złamyśnica pierakonvała mužčyn pieradać joj hrašovyja srodki i inšuju majomaść pad markaj dapamohi ŭ pieraadoleńni žyćciovych ciažkaściaŭ, jakija nie mieli miesca ŭ sapraŭdnaści. U toj ža čas asabista ni z kim z paciarpiełych jana nie bačyłasia. Adnamu ź ich žančyna vosiem razoŭ pryznačała spatkańni na aŭtavakzale ŭ Lidzie, na jakija z roznych pryčyn nie źjaŭlałasia.
Supraćpraŭnaja dziejnaść «niaviesty» raskryłasia, kali adzin z paciarpiełych uziaŭ razdrukoŭku telefonnych złučeńniaŭ z aformlenaj na jaho imia sim-karty, vysłanaj im žančynie dla znosin pa telefonie. Mužčyna stelefanavaŭsia z abanientam, ź jakim čaściej za ŭsio razmaŭlała jaho «niaviesta», i vyśvietliłasia, što na praciahu doŭhaha času jany kantaktavali z adnoj i toj ža žančynaj, jakaja nazyvałasia roznymi imionami.
Paśla hetaha mužčyny pryjechali ŭ Stolin i napisali zajavy ŭ pravaachoŭnyja orhany.
U miežach kryminalnaj spravy śledčymi byli vyvučany hrašovyja pieravody ad paciarpiełych, u tym liku na bankaŭskuju kartku, jakaja znachodziłasia ŭ karystańni abvinavačvanaj i jakaja naležyć jaje mužu. Taksama byli praviedzieny ahlady i analiz usich telefonnych złučeńniaŭ, SMS-paviedamleńniaŭ i internet-pierapiski žančyny. Byli ŭstanoŭleny jašče čaćviora paciarpiełych.
Sa słoŭ abvinavačvanaj, hrošy, jakimi zavałodvała, jana raschodavała na svaje patreby.
Kryminalnaja sprava vyvučana prakuroram i nakiravana ŭ sud dla razhladu.
Raniej žančyna nie była sudzimaja.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary