Столінскім раённым аддзелам Следчага камітэта завершана расследаванне справы па ч. 4 арт. 209 КК (махлярства, учыненае ў асабліва буйным памеры) у дачыненні да 27-гадовай мясцовай жыхаркі.
Як паведаміла афіцыйны прадстаўнік упраўлення Следчага камітэта па Брэсцкай вобласці Марына Дранькова, жанчына абвінавачваецца ў тым, што са снежня 2011 года па 31 снежня 2015 года шляхам падману завалодала ў шасці мужчын грашовымі сродкамі і іншай маёмасцю на суму звыш 240 млн недэнамінаваных рублёў.
Кожнаму з пацярпелых яна абяцала ўзяць з ім шлюб, загадзя не маючы намер гэтага зрабіць. У ходзе размовы з гэтымі мужчынамі ў інтэрнэце і па мабільнай сувязі паведамляла непраўдзівыя звесткі пра сябе.
«Нявеста» выдавала сябе за іншую асобу, прысвоіўшы фатаграфію незнаёмай ёй дзяўчыны прывабнай знешнасці. Пры гэтым яна замоўчвала, што знаходзіцца ў шлюбе і мае трох малалетніх дзяцей.
Зламысніца пераконвала мужчын перадаць ёй грашовыя сродкi i iншую маёмасць пад маркай дапамогі ў пераадоленні жыццёвых цяжкасцяў, якія не мелі месца ў сапраўднасці. У той жа час асабіста ні з кім з пацярпелых яна не бачылася. Аднаму з іх жанчына восем разоў прызначала спатканні на аўтавакзале ў Лідзе, на якія з розных прычын не з'яўлялася.
Супрацьпраўная дзейнасць «нявесты» раскрылася, калі адзін з пацярпелых узяў раздрукоўку тэлефонных злучэнняў з аформленай на яго імя сім-карты, высланай ім жанчыне для зносін па тэлефоне. Мужчына стэлефанаваўся з абанентам, з якім часцей за ўсё размаўляла яго «нявеста», і высветлілася, што на працягу доўгага часу яны кантактавалі з адной і той жа жанчынай, якая называлася рознымі імёнамі.
Пасля гэтага мужчыны прыехалі ў Столін і напісалі заявы ў праваахоўныя органы.
У межах крымінальнай справы следчымі былі вывучаны грашовыя пераводы ад пацярпелых, у тым ліку на банкаўскую картку, якая знаходзілася ў карыстанні абвінавачванай і якая належыць яе мужу. Таксама былі праведзены агляды і аналіз усіх тэлефонных злучэнняў, СМС-паведамленняў і інтэрнэт-перапіскі жанчыны. Былі ўстаноўлены яшчэ чацвёра пацярпелых.
Са слоў абвінавачванай, грошы, якімі завалодвала, яна расходавала на свае патрэбы.
Крымінальная справа вывучана пракурорам і накіравана ў суд для разгляду.
Раней жанчына не была судзімая.
Цяпер чытаюць
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці44
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці4
Хочаце жыць доўга — шукайце раён з нармальнымі дрэвамі. Навукоўцы высветлілі, што дрэвы ратуюць ад інфарктаў, а газоны могуць нават нашкодзіць здароўю22
Каментары