Śledstva pa spravie ŭładalnika hrupy kampanij «Trajpł» Juryja Čyža jašče nie zavieršana. Pra heta paviedamiŭ žurnalistam 26 žniŭnia ŭ Minsku hienieralny prakuror Biełarusi Alaksandr Kaniuk u adkaz na pytańnie, ci jość niejkija naviny pa spravie zatrymanaha biźniesmiena.
Pakul śledstva praciahvajecca, Hienprakuratura ŭstrymlivajecca ad kamientaryjaŭ, dadaŭ Kaniuk.
Juryj Čyž i jašče piać słužbovych asob «Trajpła» byli zatrymanyja 11 sakavika hetaha hoda pa abvinavačańni va ŭchileńni ad vypłaty padatkaŭ i zboraŭ u asabliva bujnym pamiery. Pavodle infarmacyi KDB, letam 2015 hoda Čyž i dva jaho rasijskija partniory źviarnulisia ŭ KDB z zajavaj ab supraćpraŭnaj dziejnaści namieśnika Čyža Uładzimira Japryncava. U chodzie rasśledavańnia było vyjaŭlena ŭchileńnie ad vypłaty padatkaŭ u «Trajple», da jakoha maje dačynieńnie sam Čyž.
Śledstvam ustanoŭlena, što ŭ 2012 hodzie pa zahadzie Čyža ŭ Maskvie była stvorana firma, ažyćciaŭleńnie finansava-haspadarčaj dziejnaści jakoj pieršapačatkova nie płanavałasia. Jaje zasnavalnikam staŭ hramadzianin RF, jaki padčas znachodžańnia Čyža ŭ Maskvie vykonvaŭ funkcyi jaho pamočnika i vadziciela. «Trajpł» pieradaŭ hetaj firmie prava na svoj tavarny znak, a zatym praktyčna štomiesiac pieravodziŭ joj bujnyja sumy pad vyhladam płaty za karystańnie tavarnym znakam. Hetyja hrošy pieravodzilisia ŭ najaŭnyja ŭ Maskvie, pieradavalisia kasiru, a toj pieradavaŭ ich Čyžu. Takich firmaŭ, pavodle infarmacyi KDB, było «dastatkova šmat».
18 lipienia staršynia KDB Valeryj Vakulčyk paviedamiŭ žurnalistam, što suma ŭronu pa kryminalnaj spravie Čyža składaje 238,7 młrd. rubloŭ (niedenaminavanych).
19 lipienia Juryj Čyž u jakaści śviedki daŭ pakazańni ŭ sudzie nad Uładzimiram Japryncavym i jaho synam Kaźbiekam.
23 žniŭnia Uładzimier Japryncaŭ pa rašeńni suda byŭ aštrafavany na 500 bazavych vieličyń i vyzvaleny ŭ zale suda. Dva inšyja abvinavačvanyja pa hetaj spravie — Kaźbiek Japryncaŭ i jaho partnior Alaksandr Arabian — pryhavorany da vaśmi hadoŭ pazbaŭleńnia voli z kanfiskacyjaj majomaści.
Ciapier čytajuć
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»2
Kamientary