Jak śviatkavali viasielle 50 hod tamu — novy prajekt ad Tuzin.fm

Siarhiej Doŭhušaŭ pradstaŭlaje na Tuzin.fm prajekt «Pieśni i najhryšy viasiella vioski Lavonpal i jaje navakollaŭ», jaki daje dobraje ŭjaŭleńnie pra toje, jak daŭniej śviatkavali viasielle.

Pavialičyć

Reliz składajecca ź viasielnych piesień i najhryšaŭ, jakija byli zapisanyja ŭ ekspedycyjach biełaruskim paetam i krajaznaŭcam Siarhiejam Paniźnikam u 1968—1969 hadach u Miorskim rajonie Viciebskaj vobłaści (vioski Lavonpal, Babyški, Daŭhinava). Hetyja pieśni śpiavali bolš za paŭstahodździa tamu, ź imi adznačali viasielli, ich pieradavali z vusnaŭ u vusny. Dysk dapoŭnieny brašuraj, u jakoj dajucca tłumačeńni etapaŭ cyrymonii viasiella, i kožny etap supravadžajecca pieśniaj: apranańnie niaviesty i žanicha, rasčesvańnie kasy niaviesty, błasłaŭleńnie i adorvańnie niaviesty i žanicha, zbory i pajezdka žanicha za niaviestaj, čakańnie pryjezdu žanicha i jaho sustreča ŭ chacie niaviesty.

«Dysk źjaŭlajecca ŭnikalnym, tamu što častka piesień była zapisana ŭ aŭtentyčnych umovach na sapraŭdnym viasielli Jaŭhienii Šadurskaj i Franca Adamoviča, jakoje adbyvałasia ŭ Lavonpali 18-19 žniŭnia 1969 hoda. Na kružełcy najhryšy zmieščany mienavita ŭ tym paradku, u jakim jany hučali na sviacie. Tam josć i zastolnyja piesni, i mełjodyi dla tancaŭ: polki, valsy, krakaviak», — kaža aŭtar i kiraŭnik prajekta Siaržuk Doŭhušaŭ.

Na Tuzin.fm pradstaŭlajecca try pieśni z hetaha vydańnia:

1. «Proša, hościki, proša» — pieśnia, jakuju śpiavali za stałom na viasielli. Vykonvaje Maruta Michajłaŭna Pałčech (1906 h.n., v. Daŭhinava)
2. Marš «Jak dorać maładuju». Vykonvaje instrumentalny ansambl ź vioski Lipava. Zapisana ŭ aŭtentyčnych umovach, na sapraŭdnym viasielli 18—19 žniŭnia 1969 hodu.
3. Pieśnia «Pajšła ciošča k ziaciu ŭ hości» ŭ vykanańni Zianona Kasnareviča padčas spabornictva svatoŭ.

Nabyć dysk «Pieśni i najhryšy viasiella» možna ŭ etna-kramie «Rahna», u kramach symbal.by i prastora.by.

U brašury jość usie teksty piesień, a taksama kamentary kandydata mastactvaznaŭstva Taciany Biarkovič. «Viasielnaje vydańnie» dapoŭniena pryhožymi zdymkami, zroblenymi Siarhiejam Paniźnikam u tym ža žniŭni 1969-ha. Kružełka spadabajecca navukoŭcam, etnohrafam, usim, chto cikavicca stražytnymi abradami i tradycyjami, i, kaniečnie, maładzionam, jakija chočuć zrabić svajo viasielle ŭ biełaruskim styli. Brašura pierakładzienaja na anhielskuju movu, tamu moža stać dobrym padarunkam dla zamiežnikaŭ.

Pavialičyć

Masterynh zrabiŭ hukarežyser Siarhiej Bahdanaŭ, dyzajn — Alaksiej Kulbicki. Vydańnie ździejśnienaje pry padtrymcy Andreja Hajko (Praha).

Z nahody vychadu dysku Siarhiej Doŭhušaŭ ładzić paŭnavartasny viasielny abrad, dzie budzie adnoŭlenaja atmasfera viaskovaha viasiella: prahučać zastolnyja pieśni i tancavalnyja melodyi, a taksama projdzie majstar-klas pa tancach. Dzieja adbudziecca ŭ 15.00 10 vieraśnia la «Biełaruskaj karčmy» na terytoryi Muzeju narodnaj architektury i pobytu ŭ Aziarcy, padčas festu «Kamianica».

• 0
• 0
• 0
• 0
• 0
• 0
• 0
• 0