Biełaruskija školniki znoŭ apynulisia na zborach nieanacystaŭ u Padmaskoŭi, chacia adkaznych za pieršy vyvaz pakarali
U mai «Naša Niva» paviedamlała pra adpraŭki biełaruskich dziaciej ź Viciebskaj vobłaści na treniroŭki da rasijskich nieanacystaŭ, jaki majuć dośvied vajny na Danbasie.
Tady Ministerstva ŭnutranych spraŭ raspačało pravierku ahučanych faktaŭ, adreahavaŭ abviaržeńniem Sinod Biełaruskaha Ekzarchatu RPC.
Ale što ž u vyniku stałasia z tymi kłubami?
Pra heta možna daviedacca, naprykład, pačytaŭšy spravazdaču bajevikoŭ z praviedzienych u Padmaskoŭi zboraŭ (9—11 vieraśnia).
Voś što piša ideołah militarysckich letnikaŭ, pravasłaŭny manarchist i aŭtar knihi «Akultnyja karani Kastryčnickaj revalucyi» Valeryj Šambaraŭ:
«Cariu Niebiesnyj, Utiešitielu, Dušie istiny, Ižie viezdie syj, i vsia ispołniajaj, Sokroviŝie błahich i žiźni Podatielu, priidi i vsielisia v ny», — śpiavajuć chłopčyki i dziaŭčaty. Chto viedaje malitvu, padchoplivaje, chto nie — prosta chryścicca. Tak pačalisia vajskova-patryjatyčnyja zbory ŭ honar Dźmitryja Danskoha. U šerahach sotni chłopcaŭ z roznych rehijonaŭ Rasii, Danieckaj, Łuhanskaj respublik, Biełaruśsii [tak u aŭtara — «NN»].
U kahości z pryjezdam byli hrašovyja ciažkaści, u kahości navat palityčnyja. Naprykład, na minułyja zbory pryjazdžała kamanda z braterskaj Biełaruśsii. Prajaviła siabie vydatna, dzieci źjazdžali natchnionyja. Ale viarnulisia dadomu, i na ich nakinulisia mocnym škvałam libierały, banderaŭcy, nacyjanalisty i padobnaja «hramadskaść». A jana apošnim časam karystajecca niehałosnaj, ale całkam adčuvalnaj padtrymkaj biełaruskich uładaŭ. Da ckavańnia padklučylisia škoły, miascovyja carkoŭnyja struktury i inšyja orhany. Dziaciej i ichnich kiraŭnikoŭ litaralna zadziaŭbli.
U vyniku kłub, jaki byŭ u nas, byŭ zackavany, zadušany i začynieny. I ŭsio ž taki, niahledziačy na heta, na čarhovyja zbory pryjechała inšaja biełaruskaja delehacyja. Ale tolki i jana i my ŭžo byli navučanyja sumnym dośviedam. Kamanda aficyjna nie rehistravałasia, pra siabie nie zajaŭlała, a dziaciej dałučyli da inšych kłubaŭ — jany cudoŭna znajšli supolnuju movu», — piša Šambaraŭ.
Što kłuby razhromlenyja, «Našaj Nivie» taksama paćvierdziła maci adnaho z chłopcaŭ, jakoha minuły raz vazili na treniroŭki pad Maskvu.
«Tak, kaniečnie, pytańni byli. Šmat chto zadavaŭ, vy razumiejecie. Da nas prychodzili. Źvierchu taksama cisnuli, vyśviatlali, chto i što. I ja, i syn raskazali, što viedali. Ale nichto dzicia nie ckavaŭ. My tudy bolš nie chadzili. Dy i kłub paśla hetaj historyi ŭžo nie isnuje», — skazała žančyna.
Ale z tekstu rasijskich arhanizataraŭ zboraŭ vynikaje, što biełarusy tam usio ž byli.
Kažučy pra palepšanuju kanśpiracyju, bajaviki nie chitrujuć — identyfikavać biełarusaŭ tam nasamreč ciažka, bo ich niama na fotaspravazdačy.
Ale ŭsio ž my znajšli adnu začepku na videa, apublikavanym sa zboraŭ.
Na 24-siekundzie rolika u abjektyŭ kamiery traplaje čałaviek, jakoha možna nazvać dakładna — Alaksandr Hieorhijevič Šaŭčenka.
Hetaja asoba ŭžo zhadvałasia nami ŭ papiarednich rasśledavańniach jak datyčnaja da vyvazu dziaciej na zbory nieanacystaŭ. Pobač ź im na fota 8 čałaviek — dziaciej. Stajać jany akurat tak, jak i ŭsie astatnija — kiraŭnik levaruč ad vychavancaŭ.
Ci moža być tak, što na jahonyja plečy loh uvieś ciažar «patryjatyčnaha» vychavańnia biełaruskich školnikaŭ, kali pary Haŭrylinych absiekli kantakty ź biełaruskaj moładździu?
Voś, darečy, ich supolnaje fota — Šaŭčenka razam z Haŭrylinymi i vychavancami «vajenna-patryjatyčnych» kłubaŭ pry Viciebskaj jeparchii.
Tut vakoł jaho biełaruskija dzieci. Dyk moža i tam taksama?
Na hetych zborach atmaśfiera naŭrad ci adroźnivałasia ad papiarednich: impierskija i sieparatysckija ściahi, treniery-nieanacysty i bajaviki «DNR» (Dyviersijnaja hrupa «Rusič» i «JENOT KORP»), a taksama ŭručeńnie kryžoŭ «hierojam Danbasa».
Elemienty trenirovak možna hlanuć na videa. Arhanizatary — bajaviki «JENOT KORP» — prosta tak i kažuć, što rychtujuć sałdat.
My taksama pacikavilisia ŭ adździele ideałohii Viciebskaha abłvykankama, ci adsočvajuć jany situacyju z pajezdkami biełaruskich dziaciej u niajasnyja rasijskija struktury i jak na heta reahujuć.
Nam adkazaŭ namieśnik kiraŭnika adździeła Piatro Hnucenka.
«Pa hetaj tematycy byli vystupy i ŭ rehijanalnych ŚMI, kali vy nie bačyli. Toje, što adbyłosia tady… za heta niekatoryja našyja kiraŭniki ŭžo dastatkova byli pakaranyja.
Heta nie adnaznačna, tut rabota dahetul viadziecca i budzie vieścisia. Pa telefonie tut šmat nie skažaš, takaja tema. My vyvučym krynicu novaj infarmacyi i ŭ abaviazkovym paradku vierniemsia da pytańnia. Bo kali niekatoryja tavaryšy niedarazumiejuć hety momant, to my ichniaje razumieńnie padpravim. Tamu što ŭsio pavinna być narmalna, u pravavym poli. Vychoŭvać treba na dobrym prykładzie, kab nie było nijakich ekstremalnych prajaŭ, pra jakija havorka idzie», — skazaŭ nam čynoŭnik.
Nahadajem taksama, što z rezkim asudžeńniem vyvazu biełaruskich dziaciej na treniroŭki da bajevikoŭ Danbasa vykazalisia najbujniejšyja dziaržaŭnyja ŚMI — telekanał ANT i hazieta Administracyi prezidenta «Sovietskaja Biełoruśsija».
Čytajcie taksama:
«Voiny Chrysta»: jak asobnyja śviatary i aficery na Hrodzienščynie rychtujuć sałdataŭ «ruskaha śvietu»
Biełaruskich školnikaŭ adpraŭlali ŭ Rasiju ŭ trenirovačnyja łahiery pad kiraŭnictvam nieanacystaŭ
Ciapier čytajuć
Babaryka raskazaŭ, čamu pierad vybarami nie šukaŭ padtrymki ŭ Rasii. I jak jaho chacieli zvolnić ź Biełhazprambanka za łozunh «Žyvie Biełaruś!»30
Babaryka raskazaŭ, čamu pierad vybarami nie šukaŭ padtrymki ŭ Rasii. I jak jaho chacieli zvolnić ź Biełhazprambanka za łozunh «Žyvie Biełaruś!»
Maksim Znak pra pres-kanfierencyju va Ukrainie: My damovilisia nie ŭzdymać najbolš balučyja temy — katavańniaŭ, sankcyj, vajny. Moža, musili my pa-inšamu zrabić1010
Kamientary