«Ciapier siadajcie na padłozie, a ŭ nastupny raz biarycie z saboj kresły, kanapy, łaŭki», — pačynaje pieršyja zaniatki Hleb Łabadzienka.
Kursy pierajechali ŭ našmat bolš prastornaje pamiaškańnie, u biznes-centr «Civali», ale tut, jak zvyčajna, anšłah, i kresłaŭ usio adno ŭsim nie chapaje. Zatoje padłohi chapaje ŭsim, choć tancavać možna.
Siarod navinak hetaha siezonu toje, što ŭ miežach kursaŭ u biznes-centry «Civali» ciapier buduć prachodzić vystavy. I pieršy aŭtar, čyje raboty tut užo možna pabačyć, — słavuty astranom i fatohraf Viktar Małyščyc. Hetaja vystava pierajechała siudy ź fiestyvalu «Kamianica» i bližejšyja try tydni budzie pracavać u zale «Civali».
Paźniej tut možna budzie ŭbačyć tvory Andrusia Takindanha, a ŭ kastryčniku — vycinanki Volhi Baburynaj.
Siarod naviednikaŭ bolšaść tych, chto ŭžo i raniej chadziŭ na kursy. Ale šmat i tych, chto pryjšoŭ upieršyniu.
Volha Płatonava raniej pracavała biblijatekarkaj, tamu vystavy, kanfierencyi i roznyja imprezy — zvyčajnaje jaje žyćcio. Na kursy jana chodzić užo dva hady i kaža, što jany nie mohuć nadakučyć.
«Movu viedaju, ale chaču ŭdaskanalić, — raspaviadaje spadarynia Volha. — Tut źbirajucca cikavyja ludzi, siudy zaprašajuć talenavityja hurty. Źbirajecca šmat moładzi. Možna daznacca štości novaje z kultury, historyi. Kožnyja novyja zaniatki nie padobnyja da papiarednich. Tamu prosta treba prychodzić. Prytym heta i razmovy, i znajomstvy, i novyja siabry. Viadoŭcy vydatnyja, z humaram, dobraja atmaśfiera».
Historyk kultury Alaksiej Šałachoŭski taksama na kursy chodzić daŭno.
«Kožny dzień u horadzie adbyvajucca roznyja imprezy, ale ŭ paniadziełak — «Mova Nanova». I heta samaja hałoŭnaja impreza siarod usich na tydni, — miarkuje Alaksiej. — Mnie cikava pahladzieć uviečary paniadziełka šou Hihina, ale kali kursy zatrymlivajucca, to i ja zatrymlivajusia, bo zaniatki na pieršym miescy. Ja zakončyŭ šmat kursaŭ i, zdajecca, možna było b užo spynicca, ale kursy dajuć novaje. Admietnaja dla mianie sustreča była ź Zinaidaj Bandarenka. Tut my paznajomilisia, abmianialisia numarami, ciapier stelefanoŭvajemsia, razmaŭlajem».
Andruś Biełachvost — juryst. Upieršyniu pryjšoŭ na kursy naprykancy minułaha siezonu. Spadabaŭsia nietypovy farmat, tamu sioleta vyrašyŭ nahnać toje, što prapuściŭ.
«Tut, jak ni ŭ jakim inšym miescy, možna adčuć siabie biełarusam, — kaža Andruś. — Heta nie lekcyi, tut viesieła, siudy pryjemna pryjści paśla pracy, papraktykavacca ŭ movie. Heta klovaja inicyjatyva, jaje treba padtrymlivać».
A voś upieršyniu na zaniatki pryjšli ledźvie nie cełaj hrupaj studenty padrychtoŭčaha adździaleńnia miedycynskaha ŭniviersiteta.
«Pryjšli, kab movu raźvić, kab nie saromiecca razmaŭlać. Kab razmaŭlać svabodna. Nu i my ž moładź, za nami budučynia», — havorać Nastaśsia, Vika, Maryna i Alaksandra, dapaŭniajučy adna adnu.
Paśla vitańniaŭ, abviestak, teoryi, hramatyčnaha i tvorčaha zadańniaŭ da mikrafona vyjšaŭ zaprošany hość, biełaruski fiłosaf Valancin Akudovič. Hety tydzień abjaŭleny Tydniem biełaruskaha myśleńnia, i pieršyja zaniatki byli pryśviečanyja jakraz hetaj temie.
Muzyčnym hościem hetych zaniatkaŭ staŭ Siaržuk Doŭhušaŭ, «Śpieŭny schod».
Nastupnyja zaniatki kursaŭ adbuducca taksama ŭ centry «Civali» (Prytyckaha, 29) u paniadziełak, 26 vieraśnia, a 18.30. Jany buduć pryśviečanyja Hienadziu Buraŭkinu, možna budzie pačuć apoviedy daśledčyka Siarhieja Šaprana i Julii Buraŭkinaj, udavy paeta. Muzyčnaha hościa anansavali zahadkava — «miehapapularny śpiavak, jaki vypuściŭ ceły dysk na vieršy Buraŭkina».
Ciapier čytajuć
«Ludziej prymušali dumać, što ničoha nikoli nie źmienicca». Chto taki antykamunist Łasła Krasnaharkai, jaki atrymaŭ Nobieleŭskuju premiju pa litaratury?99
Kamientary