Pieršy ŭ Biełarusi «razumny parkinh» płanujuć adkryć 17 kastryčnika ŭ centry Minska. Bujny budynak, bolšaść pracesaŭ u jakim aŭtamatyzavanaja, stanie častkaj handlova-zabaŭlalnaha centra Galleria Minsk, jaki budujecca na praśpiekcie Pieramožcaŭ, paviedamili pradstaŭniki kampanii-zabudoŭščyka.
Parkinh płoščaj 27 tys. kv. m zmoža źmiaścić da tysiačy aŭtamabilaŭ. Heta adna z samych bujnych achoŭnych stajanak u stalicy. Budynak raspaścirajecca ŭzdoŭž vulicy Dzimitrava i ŭklučaje piać uzroŭniaŭ, u tym liku padziemny pavierch. Adkryćcio parkinha dazvolić razhruzić ad aŭtamabilaŭ centr Minska, adznačyli ŭ kampanii.
Parkinh abstalavany «razumnymi technałohijami». Sotni datčykaŭ źbirajuć infarmacyju z usich pavierchaŭ i pieradajuć u centr kiravańnia. Mnohija pracesy praciakajuć biez udziełu dyśpietčara: naprykład, sistema vientylacyi ŭklučajecca, jak tolki datčyki pakažuć vysokuju kancentracyju vuhlakisłaha hazu.
Aśviatleńnie ŭ budynku taksama vyznačaje kampjutar u zaležnaści ad času sutak i ŭmoŭ nadvorja. Usiaho praduhledžany try ŭzroŭni — 30%, 60% i 100% aśviatleńnia. Biaśpieku ŭ budynku zabiaśpiečać kamiery videanazirańnia i datčyki apaviaščeńnia.
Abjekt raspracavaŭ viadomy niamiecki prajekciroŭščyk Ilja Irmšer — suśvietny ekśpiert i aŭtar nastolnaj knihi raspracoŭščykaŭ parkinhaŭ. Dla minskaha budynka jon prydumaŭ niezvyčajnuju płaniroŭku ź minimumam kałon i vialikaj prastoraj u farmacie open space. Tak, apornyja słupy raźmieščany adzin ad adnaho na adlehłaści amal 17 mietraŭ, što daje kiroŭcu šyroki ahlad i spraščaje parkoŭku aŭtamabila.
Parkoŭka i TRC Galleria Minsk źviazanyja pamiž saboj nadziemnym tunelem-mastkom. Naviedvalniki zmohuć naŭprost trapić z druhoha paviercha parkinha ŭ handlovuju halereju.
Unutranaja prastora parkinha źmiaščaje vialikuju kolkaść elemientaŭ navihacyi. Kožny ŭzrovień afarbavany ŭ asobny koler, dziakujučy čamu praściej znajści svoj aŭtamabil. Unutry jość parkovačnyja miescy dla invalidaŭ.
U budynku taksama praduhledžanaja sistema ačystki ad mašynnaha brudu i alivy, jakija asiadajuć na kołach aŭtamabila razam sa śnieham abo daždžom. Usie vadkija adchody pastupajuć u ačyščalnaje zbudavańnie na padziemnym paviersie, prachodziać ačystku i tolki paśla hetaha źlivajucca ŭ kanalizacyju. Heta zroblena z metaj źnižeńnia ŭzroŭniu zabrudžvańnia navakolnaha asiarodździa.
Patrapić u parkinh možna budzie z vulicy Dzimitrava, jakaja nie tak daŭno znoŭ stała dastupnaja aŭtamabilistam. Zabudoŭščyk kompleksu pabudavaŭ darohu ŭ try pałasy, pastaviŭ lichtary, darožnyja znaki i śviatłafory, a pahorak umacavaŭ padpornaj ścianoj, arhanizavaŭšy ŭzdoŭž jaje piešachodny tratuar.
Z parkinha viaduć dva nadziemnyja pierachody: adzin — da terasy kinateatra «Maskva», druhi — da žyłoj zabudovy. Tym samym možna budzie najkaraciejšym šlacham patrapić z vulicy Dzimitrava na praśpiekt Pieramožcaŭ. Dla kamfortu i biaśpieki ŭ parkinhu naniesiena piešachodnaja raźmietka i ŭstanoŭlenyja lažačyja palicejskija.
«Razumny parkinh» u najbližejšyja paśla adkryćcia miesiacy, da śniežnia, budzie pracavać u testavym režymie. Na praciahu hetaha času aŭtamabilisty zmohuć karystacca im biaspłatna.
Kamientary