Uzrovień damoŭlenaści Biełarusi ab novaj prahramie z MVF vielmi vysoki i imaviernaść chutkaha zaviaršeńnia pieramoŭ vysokaja. Pra heta TUT.BY zajaviła krynica, znajomaja z chodam pieramoŭ.
«Ja b nie dramatyzavaŭ (niadaŭnija zajavy kiraŭnika Biełarusi ab sumnievach ŭ metazhodnaści prahramy). My znachodzimsia na vielmi prasunutaj stadyi pieramoŭ. Da prykładu, kudy bolš prasunutaj, čym Ukraina. I hety šlach my majem namier prajści da kanca», — adznačyŭ surazmoŭca.
Pavodle dadzienych krynic, u Vašynhtonie, dzie ciapier prachodzić štohadovy schod MVF i Suśvietnaha banka i dzie prysutničaje biesprecedentna pradstaŭničaja biełaruskaja delehacyja, u jakuju ŭvachodziać pieršy vice-premjer Vasil Maciušeŭski, kiraŭnik Nacbanka Pavieł Kałaur, pieršyja namieśniki ekanamičnych ministerstvaŭ, tut Biełaruś i MVF hatovy byli zajavić pra toje, što prahrama ŭzhodnienaja na ŭzroŭni ekśpiertaŭ, heta značyć faktyčna hatovaja da padpisańnia.
«Ale asobnyja kalehi akazalisia nie hatovyja pahłybicca, — dypłamatyčna patłumačyła krynica pryčynu taho, što hetaja zajava adkładzienaja. — Mahčyma, zanadta mała času prajšło z momantu zaviaršeńnia pracy misii Fondu ŭ Biełarusi (jana skončyłasia ŭ piatnicu, 30 vieraśnia)».
Surazmoŭca taksama padkreśliŭ, što mnohija pieraŭtvareńni, praduhledžanyja prahramaj, jakuju MVF moža padtrymać finansava, užo vykananyja, i było b niełahična na hetaj stadyi prypyniać supracoŭnictva.
Nahadajem, Biełaruś pravodzić pieramovy z MVF nakont vydzialeńnia kredytu ŭ pamiery 3 miljardaŭ dalaraŭ. Mižnarodny valutny fond hatovy vyłučyć hetuju sumu Biełarusi, ale nastojvaje na pavyšeńni taryfaŭ u ŽKH i hramadskim transparcie, libieralizacyi cen, praviadzieńni hnutkaj kursavoj palityki, pavieličeńni doli pryvatnaha siektara, skaračeńni finansavańnia dziaržprahram, refarmavańni siektara dziaržpradpryjemstvaŭ, likvidacyi pierakryžavanaha subsidavańnia.
Alaksandr Łukašenka rezka adreahavaŭ na ŭmovy MVF. 3 kastryčnika na naradzie z uradam jon zajaviŭ, što pry abmierkavańni novaj kredytnaj prahramy Biełarusi ź Mižnarodnym valutnym fondam nieabchodna, biezumoŭna, uličvać intaresy biełaruskaha naroda.
«Kali patrabavańni MVF pračytaješ, usio zvodzicca da adnaho: nijakaha pavyšeńnia zarpłaty, nieadkładnaje pavyšeńnie taryfaŭ i inšaha. Kamunisty b skazali — na ŭdušeńnie naroda. Ja nie chaču skazać, što nas chto-niebudź choča zadušyć. Nas nichto nie panukaje, ale, na žal, formuła takaja, — skazaŭ Łukašenka. — Žabrakami biełaruski narod my rabić nie majem prava».
Biełaruś atrymała papiaredni kredyt MVF na 3,5 młrd dalaraŭ u 2009-2010 hadach i ŭžo pa im raźličyłasia. Novuju prahramu z MVF na 3 młrd dalaraŭ biełaruski ŭrad pačaŭ pradmietna abmiarkoŭvać letaś paśla paciapleńnia adnosinaŭ Minska z Zachadam.
Kamientary