Hałoŭny dziciačy artapied-traŭmatołah: U 70% biełaruskich dziaciej prablemy z pastavaj

U Biełarusi da 70% dziaciej mohuć mieć nienarmalna sfarmavanuju pastavu, paviedamiŭ žurnalistam 7 kastryčnika ŭ Minsku hałoŭny pazaštatny dziciačy artapied-traŭmatołah Ministerstva achovy zdaroŭja, viadučy navukovy supracoŭnik łabaratoryi nastupstvaŭ paškodžańniaŭ i zachvorvańniaŭ pazvanočnika i śpinnoha mozhu RNPC traŭmatałohii i artapiedyi Dźmitryj Ciesakoŭ.

Pavodle jaho słoŭ, niapravilna sfarmavanuju pastavu ŭ śviecie majuć ad 48 da 84% darosłych, i padkreśliŭ, što heta statystyka «vysokaraźvitych cyvilizavanych dziaržaŭ». Hetyja ličby, adznačyŭ śpiecyjalist, kažuć pra toje, nakolki ludzi fizična sočać za saboj i naohuł «fizična kulturnyja».

«Adnosna dziciačaha nasielnictva ličby, na žal, taksama nie supakojvajuć, — skazaŭ Ciesakoŭ. — U Biełarusi da 70% dziaciej z pačatkovaha etapu raźvićcia da stałaha padletkavaha pieryjadu mohuć mieć nienarmalna sfarmavanuju pastavu. Tamu što heta dzieci, jakija majuć adpaviednych baćkoŭ, jakija časam nie źjaŭlajucca stanoŭčym prykładam dla pierajmańnia».

Vynik nienarmalnaha farmavańnia pastavy — nienarmalnaja ekspłuatacyja pazvanočnika, jaki znošvajecca ŭ bolš rańnim uzroście, rastłumačyŭ Ciesakoŭ. Nastupstvy — juvienilnyja asteachandrozy, i nienarmalnyja asteachandroznyja prajavy ŭ darosłym uzroście. Jon adznačyŭ, što siońnia idzie «pavalnaje amaładžeńnie tak zvanaha dyskahiennaha radykulitu, pajaśničnaha, šyjnaha i h.d.», — skazaŭ jon.

Defarmacyjnyja paražeńni pazvanočnika siońnia źjaŭlajucca najbolš raspaŭsiudžanymi siarod artapiedyčnych zachvorvańniaŭ. Artapiedyčnuju defarmacyju pazvanočnika toj ci inšaj vyjaŭlenaści majuć 5% nasielnictva płaniety.

U cełym u Biełarusi siońnia na 100 tys. dziciačaha nasielnictva prypadaje prykładna 3800—3900 dziaciej z roznymi paražeńniami kaściova-myšačnaj sistemy i parušeńniami aporna-ruchalnaha aparata, skazaŭ artapied. I štohadovy pryrost, u zaležnaści ad repraduktyŭnaj aktyŭnaści rehijonaŭ, składaje kala 1,5 dziciaci z patałohijami. Artapied adznačyŭ, što pa hetym pakazčyku siarod raźvitych krain Jeŭropy i Amieryki Biełaruś znachodzicca prykładna pasiaredzinie.

Paražeńni kaściova-myšačnaj sistemy i parušeńni aporna-ruchalnaha aparatu mohuć być pryrodžanymi, a mohuć raźvivacca ŭ pracesie rostu i raźvićcia dziciaci, skazaŭ Ciesakoŭ. Naprykład, jak nastupstvy nahruzak, što traŭmujuć vostra abo chranična, vynik pieraniesienych paražeńniaŭ, źviazanych ź infiekcyjnym ahientam.

• 0
• 0
• 0
• 0
• 0
• 0
• 0
• 0