Uładalnikam ahrasiadzib mohuć zabaranić pravodzić viasielli i jubilei, a taksama prymać adnačasova bolš za 20 turystaŭ. Hetyja prapanovy prapisanyja ŭ prajekcie prezidenckaha ŭkaza pa ŭniasieńni źmianieńniaŭ u zakanadaŭstva ab ahraekaturyźmie. Dakumient, jaki raźmiaścili dla abmierkavańnia na sajcie Minsportu i turyzmu, litaralna pierapałochaŭ rynak.
Što prapanujuć źmianić dla ŭładalnikaŭ ahrasiadzib
Uładalnikam ahraekasiadzib chočuć zabaranić raźmiaščać adnačasova bolš za 20 turystaŭ. Ale abmiežavańnie pa kolkaści haściej nie raspaŭsiudžvajecca na ekskursijnyja hrupy i na ŭdzielnikaŭ padziejnych mierapryjemstvaŭ.
Haspadaram siadzib taksama nielha budzie pravodzić viasielli, jubilei i rytualnyja mierapryjemstvy. Kab zarablać na hetych pasłuhach, treba budzie zarehistravacca pradprymalnikam.
Jak i ciapier, u siadzibach možna budzie ładzić ekskursii, zabiaśpiečvać charčavańniem, u tym liku ŭłasnaj vytvorčaści, pravodzić spartyŭna-masavyja, fizkulturna-azdaraŭlenčyja i kulturnyja mierapryjemstvy.
Z dobrych navin — pavyšać padatak dla ich nie majuć namieru, paviedamili ŭ departamiencie pa turyźmie. Ciapier jon składaje adnu bazavuju vieličyniu — 21 rubiel. Nahadajem, raniej płanavałasia pavialičyć hetyja zbory ŭ try razy.
Jak adreahavali haspadary ahrasiadzib
U ahrasiadzibach nieadnaznačna ŭspryniali źmieny, jakija vynieśli na abmierkavańnie čynoŭniki. Da prykładu, haspadar siadziby «Viasiołaja chata» ŭ Kapylskim rajonie Andrej Kruk raspaviadaje, što za leta pravioŭ try viasielli.
— Asabista na našu siadzibu ŭkaz paŭpłyvaje nie tak mocna, jak na tych, chto čaściej pravodzić viasielli, — kaža ŭładalnik siadziby. — Bo dla mnohich siadzib praviadzieńnie viasiellaŭ — heta značnaja častka dachodu, mnohija ahrasiadziby žyvuć za košt hetaha, kormiać svaje siemji. Mnohija, jak i my, brali lhotnyja kredyty. My dumali, što da 2021 hoda ničoha nie budzie mianiacca.
Nahadajem, ilhoty dla ŭładalnikaŭ ahrasiadzib, u tym liku na atrymańnie lhotnaha kredytu, zamacavanyja prezidenckim ukazam № 372, jaki dziejničaje da 2021 hoda.
Na dumku Andreja Kruka, zamiest jakich-niebudź abmiežavańniaŭ lepš pavysić padatak.
— Ciapier śmiešnyja padatki, jany vyklikajuć ździŭleńnie. Chaj by padniali padatak da 30 abo 50 bazavych vieličyń, — adznačaje Andrej Kruk. — A to ž byvajuć situacyi, kali pryjazdžaje hrupa z 50 čałaviek adpačyvać, i jak im rastłumačyć, što my nie zmožam pryniać stolki ludziej.
Ułaśnik «Viasiołaj chaty» pierakanany, što «ŭ cełym źmieny, kali ich prymuć, drenna adabjucca na ŭsim biznesie, takoje paniaćcie, jak ekaturyzm, moža źniknuć, mohuć zahubić halinu».
Jaho kaleha — haspadar siadziby «Hanka» ŭ Minskim rajonie Anatol Haniec, — razam sa svajoj siamjoj 7 hadoŭ tamu pradaŭ kvateru ŭ stalicy i vyrašyŭ zaniacca ahraekaturyzmam. Jon pierakanany, što «pakul nie varta mianiać ukaz, jaki pracuje».
— Ludzi pavieryli dziaržavie, mnohija pakinuli horad, pierajechali na pieryfieryju. Navošta łamać ich losy? Mnohija ŭziali kredyty, pryčym nie tolki lhotnyja. A jak zaraz ich addavać? Mnohija admoviacca ad hetaha vidu dziejnaści, a niekatoryja pierajeduć u Rasiju. Kali mianie heta zakranie, to nie viedaju, kudy mnie padziecca. Maja siamja nie patrabuje, kab joj dali pracoŭnaje miesca. My sami ich robim. Ujaŭlajecie, kolki ludziej stanuć biespracoŭnymi? Pa maich padlikach, nie mienš za 4 tysiačy čałaviek.
Darečy, siabry Anatola z Rasii ŭžo prapanoŭvali pierabracca da ich, kab zajmacca ahraturyzmam.
Na dumku mužčyny, treba ŭvieści raźmiežavańni pamiž zdačaj žylla ŭ najom i ahrasiadzibaj.
— Taksama treba treba ŭvieści hradacyju pa raźmiaščeńni siadzib ad Minska — 5, 20, 40 i 80 kiłamietraŭ. Ad źmianieńniaŭ va ŭkaz, kali ich prymuć, pacierpiać u pieršuju čarhu tyja siadziby, jakija znachodziacca za 80 i 40 kiłamietraŭ ad stalicy. Vyjhrajuć tyja, chto znachodzicca bližej da Minska abo da kurortnaj zony.
Uładalnik siadziby «Hanka» taksama padtrymlivaje ideju pavysić padatak, ale pry hetym, na jaho dumku, treba dazvolić pravodzić viasielli ŭ siadzibach i nie ŭvodzić abmiežavańni pa liku turystaŭ. Sam Anatol ładzić viasielli ŭ nacyjanalnych tradycyjach.
— Ceny demakratyčnyja, ja nie dziaru. Samy biudžetny varyjant abydziecca ŭ 60 rubloŭ. Heta buduć nacyjanalnyja stravy. Da prykładu, kaŭbaski, pichanyja palcam. My ŭsio sami robim.
Anatol kaža, što niešmatlikija ŭładalniki ahrasiadzib zmohuć vykanać patrabavańni, jakija vystaŭlajuć da jurasob, tamu i nie rehistrujuć IP.
— Jurasobam daražej abychodziacca haz i elektryčnaść. Pravierki sanepidsłužby ni adna siadziba nie vytrymaje. U vyniku da 2021 hoda ni adna siadziba nie zastaniecca, buduć tolki katedžy, jakija buduć pravodzić viasielli i mierapryjemstvy, — prahnazuje Anatol Haniec.
Departamient pa turyźmie: «Kolki možna masavaha zahułu!»
Abmierkavańnie prajekta prezidenckaha ŭkaza zavieršać u kancy hetaha tydnia, udakładniła dyrektar departamienta pa turyźmie Minsportu i turyzmu Alena Pierminava. Ale nie vyklučana, što prapanovy buduć prymać i paźniej, «kali heta budzie aktualna».
Pa słovach Aleny Pierminavaj, uładalniki siadzib aktyŭna telefanujuć i dziakujuć za prapanavanyja novaŭviadzieńni.
— Chvalać nas, jakija my małajcy, što narešcie dapamahajem narmalnym siadzibam adbicca ad tych, jakija zładzili strašnaje žyćcio dla ŭsiaho miascovaha nasielnictva z-za pastajannych karparatyvaŭ, siabroŭskich viačorak, a pa vychadnych — viasiellaŭ, pietard. Asabliva heta aktualna ŭ Łahojskim i Minskim rajonach, — skazała śpiecyjalist. — Šmat narakańniaŭ, što pieraškadžajuć miascovym žycharam.
Tak, na niadaŭniaj pašyranaj naradzie ŭ Ministerstvie sportu i turyzmu načalnik Hałoŭnaha ŭpraŭleńnia kantrolu biudžetna-finansavaj śfiery Kamiteta dziaržkantrolu Alaksandr Kurłyka raspavioŭ pra parušalnikaŭ, jakija «pad vyhladam sielskaha turyzmu pačali aktyŭna i navat ahresiŭna raźvivać haściničny i restaranny biznes».
— U apošni čas nazirajecca ŭstojlivaja tendencyja złoŭžyvańnia lhotnymi normami isnujučaha ukaza, kali žychary stalicy, abłasnych centraŭ i bujnych haradoŭ, Brasłaŭskaha i Naračanskaha rajonaŭ stali vykarystoŭvać siadziby vyklučna dla praviadzieńnia viasiellaŭ, karparatyŭnych uračystaściaŭ, akazańnia pasłuh łaźni ci saŭny, a taksama charčavańnia i načlehu. Ahraekaturyzm — heta zusim inšaje, — adznačyŭ Alaksandr Kurłyka.
Alena Pierminava ŭdakładniaje, što «viasielle, zhodna z Padatkovym kodeksam, — heta pradprymalnickaja dziejnaść».
— Restaran, u jakim mohuć pravieści viasielle, abaviazany płacić toje, toje i toje. Siadziba čamu nie pavinna? Praviadzieńnie viasiellaŭ u nas raptam ahraekaturyzmam stała? — kaža śpiecyjalist. — Prajektam ukaza my sprabujem hetyja niaroŭnyja ŭmovy raźmiežavać. Viasielli ŭsiudy my adnosim da pradprymalnickaj dziejnaści. Narmalny turyzm — heta narmalny turyzm, i jon budzie lhatavacca niezaležna ad znachodžańnia subjektaŭ.
Dyrektar departamienta udakładniła, što abmiežavańni ŭ pryjomie 20 turystaŭ nie zakranuć ekskursijnyja hrupy.
— Turystaŭ ekskursijnych, jakich my pryvozim na ahrasiadziby, u tym liku dziaciej, my ni ŭ jakim razie nie abmiažoŭvajem, — skazała Alena Pierminava. — Heta zakranie tyja kankretna siemji, jakija pryjechali adpačyć, papić harełki, prabačcie za hrubaść. Voś hetych my abmiažoŭvajem, tamu što kolki možna masavaha zahułu!
Pry hetym u departamiencie pa turyźmie vystupajuć suprać pavyšeńnia padatku dla ŭładalnikaŭ ahrasiadzibaŭ.
— My nie zhodnyja pavialičvać staŭku padatku. Tych pravilnych uładalnikaŭ siadzib, jakija zajmajucca ahraekaturyzmam, my ni ŭ jakim razie nie ŭščamlajem. Jany i dalej buduć płacić 10 dalaraŭ u hod, jakija jany płacili da hetaha. A naohuł pa-dobramu jany i hetyja 10 dalaraŭ nie pavinny płacić, prosta heta taki mizer. Chaj pracujuć na lhotnych umovach. A tyja, jakija zajmajucca kankretnym pradprymalnictvam, tym tavaryšam, prabačcie, treba afarmlać pradprymalnictva, — kateharyčna zajaviła Alena Pierminava.
Pavodle jaje słoŭ, u departamiencie hatovyja pryniać luboha achvotnaha dla abmierkavańnia prajekta ŭkaza, u tym liku i inicyjatyŭnuju hrupu.
— Sardečna zaprašajem, my zaŭsiody ich čakajem, zaprašajem dla hramadskaha abmierkavańnia. chaj telefanujuć mnie, i my ich prymiem.
Abjadnańnie «Adpačynak u vioscy»: čynoŭniki łamajuć čałaviečyja losy. Heta antynarodny dakumient
Kiraŭnik hramadskaha abjadnańnia «Adpačynak u vioscy» Valeryja Klicunova raspaviała, što arhanizacyja ciapier zajmajecca padrychtoŭkaj kalektyŭnaha lista ŭ Ministerstvie sportu i turyzmu.
— Naša arhanizacyja vystupaje za toje, kab prezidencki ŭkaz № 372 zastaŭsia ŭ takim vyhladzie, u jakim jon ciapier jość. Čynoŭniki łamajuć čałaviečyja losy. Heta antynarodny dakumient. Kali jaho prymuć, to ŭsio skončycca ŭ adzin momant, bolš nichto nie pavieryć u abiacańni, — kaža Valeryja Klicunova. — Uładalniki siadzib stvaryli sabie pracoŭnyja miescy, jany nie ŭziali ni kapiejki ŭ dziaržavy. A stvareńnie pracoŭnaha miesca kaštuje vializnych hrošaj. Pahladzicie, kolki hrošaj my zekanomili dziaržavie. Pa-druhoje, mnohija ludzi pradali kvateru, pakinuli ŭłasnaść u horadzie, kinuli pracu, pieravieźli dziaciej, jany ŭziali kredyty. Jany budujuć siadziby ŭ nadziei na toje, što słova, jakoje dało dziaržava, budzie strymanaje.
Na jaje dumku, kab viarnuć kredyt, siadzibam treba zarablać na masavych mierapryjemstvach.
— Na mamie ź dziciem jany nie viernuć nikoli hrošy. Jany nie zmohuć addać kredyty. Banki pačnuć adbirać damy, pačnucca katastrofy ŭ losach ludziej. Čamu Minsportu i turyzmu ličyć, što maje prava ŭsio heta zrabić? — zadajecca pytańniem Klicunova. — Ciapier čas kryzisu, ludzi ledź zvodziać kancy z kancami.
Pry hetym jana ličyć, što vypadki ŭ Łahojskim i Minskim rajonach adzinkavyja, tamu «nielha pa ich mierkavać ab usich uładalnikach siadzibaŭ».
— Heta adzinkavyja vypadki na fonie ŭsich 2363 siadzib, jakija adkrytyja ŭ Biełarusi. Ź imi treba raźbiracca. Nam treba dumać, što ź imi rabić, a nie hubić usiu halinu i łamać losy ludziej u kryzis, kali jany nie viedajuć, jak pierazimavać.
Kamientary