Jeŭrapiejski sajuz hatovy da padtrymańnia adkrytaha, ale krytyčnaha dyjałohu ź Biełaruśsiu, paviedamlaje pradstaŭnictva ES u Biełarusi pa vynikach vizitu ŭ Minsk 21 listapada delehacyi Kamiteta pa palitycy i biaśpiecy Savieta Jeŭrasajuza.
Delehacyju ŭznačaliŭ staršynia kamiteta, pasoł Valter Styviens, jana taksama ŭklučała ŭ siabie pasłoŭ Kamiteta pa palitycy i biaśpiecy z usich dvaccaci vaśmi krain ES i pradstaŭnikoŭ Jeŭrapiejskaj słužby źniešnich dziejańniaŭ i Jeŭrapiejskaj kamisii.
Delehacyja sustrełasia z Alaksandram Łukašenkam, ministram zamiežnych spraŭ Uładzimiram Makiejem i namieśnikam ministra zamiežnych spraŭ Alenaj Kupčynoj, a taksama praviała abmien mierkavańniami z pradstaŭnikami biełaruskaj palityčnaj apazicyi, pravaabaroncami i pradstaŭnikami hramadzianskaj supolnaści.
Pradstaŭnictva ES paviedamlaje, što padčas sustreč byŭ abmierkavany šyroki śpiektr pytańniaŭ, u tym liku dvuchbakovaje supracoŭnictva pamiž Jeŭrasajuzam i Biełaruśsiu, šmatbakovaje supracoŭnictva ŭ ramkach Uschodniaha partniorstva, raźvićcio situacyi ŭ rehijonie, nieabchodnaść ekanamičnaj madernizacyi, a taksama pytańni pravoŭ čałavieka i demakratyi, u tym liku śmiarotnaje pakarańnie.
«Padčas usich svaich sustreč delehacyja ES padkreślivała hatoŭnaść Jeŭrapiejskaha sajuza da padtrymańnia adkrytaha, ale krytyčnaha dyjałohu ź Biełaruśsiu, — adznačajecca ŭ paviedamleńni. — Stanoŭčaja tendencyja ŭ adnosinach ES i Biełarusi vitałasia. ES adkryty da dalejšaha raźvićcia adnosin ES i Biełarusi i dalejšych krokaŭ pa aktyvizacyi ŭdziełu ES i halinovaha supracoŭnictva. Razam z tym padkreślivałasia, što adnosiny pavinny hruntavacca na ahulnych kaštoŭnaściach, asabliva na zabieśpiačeńni pravoŭ čałavieka, demakratyi i viaršenstva prava, a taksama na tym, što tyčycca pytańnia śmiarotnaha pakarańnia. Takim čynam, kankretnyja kroki z boku Biełarusi da zachavańnia ŭniviersalnych asnoŭnych svabod, viaršenstva prava i pravoŭ čałavieka buduć mieć klučavoje značeńnie ŭ farmavańni budučaj palityki ES u adnosinach da Biełarusi».
Kamitet pa palitycy i biaśpiecy składajecca z pasłoŭ krain ES, jakija pracujuć u Brusieli. Heta pastajannaja struktura Savieta Jeŭrapiejskaha sajuza. Zadača kamiteta — sačyć za raźvićciom mižnarodnaha stanovišča ŭ śfierach, na jakija raspaŭsiudžvajecca ahulnaja źniešniaja palityka i palityka biaśpieki ES, i rychtavać rašeńni Savieta ministraŭ Jeŭrapiejskaha sajuza. Kamitet adyhryvaje klučavuju rolu ŭ zamiežnaj palitycy i palitycy biaśpieki ES i ŭ palityčnym dyjałohu.
Ciapier čytajuć
«Łukašenka na minimałkach». «Biełaruski kachanak usiaje Rusi» staŭ kumiram žanočaha tyktoka1
«Łukašenka na minimałkach». «Biełaruski kachanak usiaje Rusi» staŭ kumiram žanočaha tyktoka
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii1212
Kamientary