U Kondrusia vyjavili šyzoidna-paranoidny razład asoby. Prakuror prosić abmiežavacca chatniaj chimijaj

Praces pa spravie Uładzimira Kondrusia adnaviŭsia 26 śniežnia ŭ sudzie Maskoŭskaha rajona Minska. Kondruś — udzielnik Płoščy-2010, jakoha zatrymali praź piać z pałovaj hadoŭ i sudziać za ŭdzieł u masavych biesparadkach. Jamu pahražaje da 8 hadoŭ pazbaŭleńnia voli.

Pavialičyć

10:35

Samoha abvinavačanaha na pracesie nie było — jon byŭ vydaleny z zały suda. Na minułym pasiadžeńni Kondruś demanstratyŭna pasprabavaŭ uskryć vieny. Jaho vyratavali, ale sudździa Śviatłana Bandarenka vyrašyła, što abvinavačany budzie vydaleny za parušeńnie paradku.

Vydalili Kondrusia i siońnia. Kletka była pustaja adrazu — kanvair paśla paviedamiŭ sudździ, što «Kondruś kateharyčna admaŭlajecca nakiroŭvacca ŭ zału suda». Paśla hetaha Śviatłana Bandarenka zavočna vydaliła Kondrusia z pracesu.

Pavialičyć

Ciapier u zali tolki Vadzim Mušynski — advakat Kondrusia.

Darečy, pamočniki prynieśli na sud i dokazy — siarod ich i nibyta toj kavałak truby, jakim Kondruś biŭ vokny Doma ŭrada.

11:05

Prakuror Volha Hierasimovič začytała abvinavačvańnie: «Kondruś ažyćciaviŭ siłavyja dziejańni, nakiravanyja na praniknavieńnie ŭ Dom urada». Jon «nanios nie mienš za 6 udaraŭ pa šybach», rasčyščaŭ askiepki i łamiŭsia ŭ budynak.

Darečy, sudździa Bandarenka chacieła začytać pakazańni Kondrusia, ale nie zmahła. Ich prosta niama — kožny raz toj admaŭlaŭsia ad dačy pakazańniaŭ i maŭčaŭ.

Zatym vysłuchali śviedkaŭ. Pieršym ź ich byŭ baćka abvinavačanaha — Uładzimir Raścisłavavič. Jon davać pakazańni ŭ dačynieńni da syna admoviŭsia. Halina Vasiljeŭna, maci, zrabiła toje ž samaje.

Bolš śviedkaŭ pa spravie nie znajšłosia. Prakuror Hierasimovič pierajšła da čytańnia piśmovych materyjałaŭ pa spravie.

11:45

Usiaho ŭ spravie 10 tamoŭ. Prakuror Hierasimovič chucieńka «prabiehłasia» pa ich, pieryjadyčna začytvajučy kavałki.

Darečy, adbitki ruk na tym kavałku truby identyfikavać niemahčyma, ahučyła vyniki ekśpiertyzy prakuror.

Akramia taho stała viadoma, što Kondruś admysłova pryjechaŭ na Płošču-2010. Na toj momant jon žyŭ u Maskvie, ale ŭ pierapiscy paviedamlaŭ, što pajedzie ŭ Minsk na «vybary-durybary».

Taksama vyśvietliłasia, što ŭ Kondrusia šyzoidna-paranoidny razład asoby.

Jano charaktaryzujecca «abvostranym uśviedamleńniem asabistych pravoŭ, praźmiernaj patrebaj vytłumačyć padziei, padazronaściu, prablemami ŭ adnosinach ź ludźmi».

Ale ž značeńnie svaich dziejańniaŭ Kondruś aceńvaŭ adekvatna.

Naprykład, haładaŭ jon absalutna śviadoma, paviedamiła prakuror.

12:35

Uvohule, išło pasiadžeńnie ź niezvyčajnaj chutkaściu. Prakuror prademanstravała sudu rečyvyja dokazy (noŭtbuk Kondrusia, telefon, tuju samuju kurtku i piać čornych šapak, jakija zabrali pry vobšuku). Zatym pierajšli da sudovych sprečak.

Prakuror Hierasimovič paviedamiła, što vina Kondrusia dakazanaja całkam.

Jana ŭzhadała spravy inšych fihurantaŭ Płoščy, u tym liku i Sańnikava, Niaklajeva… Maŭlaŭ, kali sudzili tych, fakt masavych biesparadkaŭ byŭ dakazany. A Kondruś, jak śviedčać dokazy, braŭ u hetych biesparadkach udzieł.

Prakuror Volha Hierasimovič paprasiła pryznać abvinavačannaha «asobaj z pamienšanaj najaŭnaściu śviadomaści» i dać Kondrusiu 3 hady abmiežavańnia voli z prymusovym nahladam i lačeńniem. Źmiakčalnymi abstavinami Hierasimienka adznačyła psichičny razład.

Advakat Mušynski ŭ svaju čarhu adznačyŭ, što masavymi biesparadkami padziei na Płoščy nazvać nielha. Jon paprasiŭ apraŭdać Kondrusia.

Prysud budzie abvieščany a 16:00.

* * *

Nahadajem, što žychar pasiołka Rudziensk Uładzimir Kondruś 1977 hoda naradžeńnia byŭ uziaty pad vartu 14 červienia ŭ miežach papiaredniaha rasśledavańnia za jaho mierkavany ŭdzieł u padziejach kala Doma ŭrada padčas vybaraŭ prezidenta 19 śniežnia 2010 hoda. Jon abvinavačvajecca pa artykule 293 Kryminalnaha kodeksa «Masavyja biesparadki», pa jakim u 2011 hodzie było asudžana 49 čałaviek, mnohija z pazbaŭleńniem voli na roznyja terminy. Na čas śledstva jon utrymlivajecca ŭ SIZA №1 Minska.

Baćki, siastra i advakat Uładzimira nie mohuć raspavieści ŚMI padrabiaznaści spravy — jany dali padpisku ab nierazhałošvańni.

Sam Uładzimir amal dva miesiacy admaŭlaŭsia ad ježy, paśla čaho stan jaho zdaroŭja mocna pahoršaŭ: jon nie moh navat samastojna chadzić.

Pravaabaroncy pryznali Uładzimira Kondrusia palitviaźniem.

• 0
• 0
• 0
• 0
• 0
• 0
• 0
• 0