Prakuratura Turcyi aficyjna abvinavaciła 86 čałaviek u datyčnaści da zmovy, kab ździejśnić dziaržaŭny pieravarot.
Prakuror Ajkut Enhin nie nazvaŭ imionaŭ abvinavačanych, ale 2 lipienia ŭ Turcyi byli abvinavačanyja dva adstaŭnyja hienierały i niekalki viadomych biznesoŭcaŭ i žurnalistaŭ.
Pavodle Enhina, u adnym z sudoŭ Stambułu 86 asobam vysunutyja abvinavačańni ŭ prynaležnaści da terarystyčnaj arhanizacyi i ŭ zakliku da hramadzianskaha niepadparadkavańnia z metaj źviaržeńnia ŭradu.
Ź ich 48 čałaviek, pavodle jaho słovaŭ, užo aryštavanyja.
U krainie abvastrajecca supraćstajańnie pamiž prychilnikami stroha śvieckaha ŭkładu žyćcia, jaki isnuje z momantu zasnavańnia Tureckaj Respubliki, i praviačaj Partyi spraviadlivaści i raźvićcia, jakaja imkniecca reabilitavać isłam u hramadzkim žyćci.
U kanstytucyjnym sudzie krainy razhladajecca sprava pra zabaronu praviačaj partyi na toj padstavie, što jana imkniecca ŭvieści zakony šaryjatu, što supiarečać tureckaj kanstytucyi.
U vypadku stanoŭčaha rašeńnia nakont hetaj spravy i prezydent Adbuła Hiul i premjer Redžep Taip Erdahan mohuć pazbavicca svaich pasad i naohł prava zajmać adkaznyja pasady ŭ dziaržavie. Erdahan i Hiul adkidajuć abvinavačańni, jakija, pavodle ich słovaŭ, źjaŭlajucca častkaj kampanii suprać ich partyi.
Ź inšaha boku, u Turcyi daŭno cyrkulujuć čutki pra isnavańnie kłanu siłavikoŭ, hatovaha na ŭsio, uklučajučy dziaržpieravarot, dziela zachavańnia isnujučaha antyisłamskaha ładu.
Kamientary