Što adbyvajecca z vyzvalenymi katalickimi śviatarami i čamu jany maŭčać
Amal praz dva miesiacy paśla vyvazu ź Biełarusi ŭ Vatykan vyzvalenych katalickich śviataroŭ Hienrycha Akałatoviča i Andžeja Juchnieviča viernikam stali viadomyja niekatoryja źviestki pra ich, piša Katolik.life.
Za ŭvieś hety čas nie źjaviłasia nijakaj aficyjnaj infarmacyi pra toje, što śviatary znachodziacca ŭ Rymie, a sami jany nie zrabili nijakich zajaŭ, nie byli zaŭvažanyja na publicy i amal nie vychodzili na suviaź. Ciapier stała zrazumieła, čamu.
Jak daviedalisia vierniki, śviataroŭ raźmiaścili ŭ adnym z klaštaraŭ u Rymie, dzie jany znachodziacca ŭvieś hety čas i, vierahodna, buduć žyć i dalej. Pryčyna, pa jakoj śviatary redka vychodziać na kantakt, banalnaja: jany nie majuć telefonaŭ i inšych techničnych srodkaŭ suviazi.
Pry hetym jany znachodziacca na poŭnym zabieśpiačeńni, u tym liku nieabchodnymi lekami: prachodziać miedycynskaje abśledavańnie, adnaŭlajucca paśla praciahłaha času źniavoleńnia. Molacca, udzielničajuć u śviatych imšach i sumujuć pa Biełarusi. Kali jany zmohuć viarnucca na Radzimu, nieviadoma: kankretyki ŭ hetym pytańni, jak i ŭvohule pra dalejšy los śviataroŭ, pakul niama.
Taksama paćvierdziłasia zdahadka pra «abiet maŭčańnia». Heta sapraŭdy tak: u najbližejšyja miesiacy nie varta čakać publikacyj pra śviataroŭ. U Vatykanie jany dali abiacańnie, što jak minimum na praciahu hodu paśla vyzvaleńnia nie buduć rabić nijakich zajaŭ, vystupaŭ i zajmacca jakoj-kolviek publičnaj dziejnaściu. Chto inicyjavaŭ takuju umovu, viernikam dakładna nieviadoma.
Vałožynskaha ksiandza Hienrycha Akałatoviča zatrymali ŭ listapadzie 2023 hoda. Siłaviki abvinavacili jaho ŭ «zdradzie dziaržavie». 30 śniežnia 2024 hoda śviatara asudzili da 11 hadoŭ kałonii.
U vypadku śviatara z Šumilina, Viciebskaja vobłaść, Andžeja Juchnieviča, jaho spačatku zatrymali pavodle «palityčnych» administracyjnych artykułaŭ, ale paźniej abvinavacili ŭ złačynstvach, jakija tyčacca seksualnaj niedatykalnaści niepaŭnaletnich. Jaho asudzili da 13 hadoŭ kałonii.
Pra vyzvaleńnie abodvuch stała viadoma 20 listapada. Paśla pres-sakratarka Łukašenki Natalla Ejsmant paviedamiła, što ich pamiłavali na prośbu Papy Lva XIV.
Ksiandzy Akałatovič i Juchnievič praviali ŭ Vatykanie śviatuju imšu
Z «pamiłavanaha» ksiandza Hienrycha Akałatoviča chočuć spahnać vializny štraf
Ejsmant: Dvuch katalickich śviataroŭ pamiłavali pa prośbie Papy Lva XIV
Vyzvalenyja ŭčora katalickija śviatary znachodziacca ŭ Vatykanie
Vyzvalenyja katalickija śviatary Hienrych Akałatovič i Andžej Juchnievič
Ciapier čytajuć
Zahinuŭ biełaruski dobraachvotnik Alaksiej Łazaraŭ12
Kamientary