Biełaruskamoŭny kiroŭca aŭtobusa, baćka piaci dziaciej: «Kažu, što ź Biełarusi, a ŭ ludziej až tvary śviatlejuć»
Viktar Brazoŭski, 57-hadovy biełaruskamoŭny kiroŭca aŭtobusa, na jakoha prarasijski aktyvist napisaŭ skarhu za bieł-čyrvona-biełuju stužku, raspavioŭ «Našaj Nivie» pra svoj biznes, staŭleńnie da movy i žyćcia.
I pajšli jany abdymać mianie!
Ja sam rodam z Vałožynskaha rajona, ź vioski Višnieva.
Baćka moj palak, u dziacinstvie ŭ siamji havaryli na polska-biełaruskaj takoj trasiancy. Paśla ja byŭ vajskoŭcam, havaryŭ pa-rusku… I hadoŭ 10—15 tamu, užo stałym čałaviekam, pastupova pryjšoŭ da biełaruščyny. Pryjšoŭ, moža, čas zadumacca, chto ja, što ja, dla čaho ja tut… Sam ja siońnia liču siabie biełarusam.
Biełaruskaść maja nie toje kab dapamahaje ci pieraškadžaje biznesu. Jość peŭnaje koła stałych klijentaŭ ź biełaruskamoŭnaha asiarodździa, ale ja nie admaŭlajusia i ad inšych. Nikoli nichto jašče nie admaŭlaŭsia ad maich pasłuh tamu, što ja razmaŭlaju pa-biełarusku.
Ale ž byli cikavyja vypadki, asabliva va Ukrainie. Adnojčy pryjechali ŭ Pačajeŭ, da aŭtobusa padyšoŭ achoŭnik, pakruciŭsia i pytajecca: «A vy adkul? Napisana ŭ vas nie pa-ŭkrainsku, ale litary da našych padobnyja…». Ja adkazvaju, što ź Biełarusi. Padyšli jašče paru čałaviek — i pajšli jany abdymać mianie! Kažuć, maŭlaŭ, u vas takaja pryhožaja mova!
I ŭ Kijevie padychodzili, cikavilisia. I kali daviedvajucca, što ja ź Biełarusi, to ŭ ludziej až tvary śviatlejuć.
Praca dla padtrymki štanoŭ
Ja i dyrektar, i ŭładalnik, i kiroŭca, i prybiralščyk u svajoj transpartnaj firmie. Aŭtobus uziaŭ u kredyt, pacichu raźličvajusia. Ale ž ja svaju dziejnaść biznesam by nie nazvaŭ — tak, praca dla padtrymki štanoŭ (śmiajecca).
Aŭtobus aformleny pa-biełarusku, bo mnie padabajecca naša mova. Mnie padabajecca majo asiarodździe — usie biełaruskamoŭnyja vakoł, dobryja i cikavyja ludzi.
Što tyčycca čyrvonaj pałasy na borcie aŭtobusa…
Niadaŭna mianie zaprašali ŭ Vałožynskaje DAI — niejki Ahafonaŭ napisaŭ na mianie skarhu. Nu i inśpiektar zacikaviŭsia toj pałasoj taksama. Ale ž usio skončyłasia narmalna.
A sam skažu tak: mnie hety koler padabajecca. Heta naš koler, i jon bolš daspadoby, čym niejki… zialona-inšy (śmiajecca).
A jašče Viktar Brazoŭski — šmatdzietny baćka. Maje piaciora dzietak i dvuch unukaŭ…
Čytajcie taksama: Prarasijski aktyvist zajaviŭ, što kiroŭcu aŭtobusa «maładafrontaŭcaŭ» aštrafavali za bieł-čyrvona-bieły ściah. Ale heta nie tak
Ciapier čytajuć
Połk Kalinoŭskaha paviedamiŭ pra hibiel troch bajcoŭ5
Kamientary