Sud Partyzanskaha rajona Minska admoviŭ u zadavalnieńni isku fihurantam «spravy hraficistaŭ» ab abaronie honaru i hodnaści. Jany asprečvali infarmacyju na sajcie Śledčaha kamiteta i patrabavali abviaržeńnia.
U zajavie SK było adznačana, što pry zatrymańni złamyśnikaŭ u ich byŭ kanfiskavany traŭmatyčny pistalet. Akramia taho, fihurantaŭ da vyniasieńnia prysudu nazyvali chulihanami. Śćviardžałasia, što jany raspaŭsiudžvali ekstremisckija materyjały, jakija ŭtrymlivajuć nacysckuju simvoliku. Hetyja fakty, na dumku istcoŭ, nie paćviardžajucca materyjałami kryminalnaj spravy ŭ dačynieńni da Vadzima Žaromskaha, Viačasłava Kasinierava i Maksimilijana Piakarskaha.
Na papiarednim pasiadžeńni pradstaŭniki SK zajaŭlali, što navina na sajcie nie adnosicca da kankretnaj kryminalnaj spravy. 13 studzienia jany paviedamili, što infarmacyja padavałasia zychodziačy z akaličnaściaŭ kryminalnaj spravy, ale, pakolki piersanalnych dadzienych u tekście niama, identyfikavać fihurantaŭ niemahčyma. Tamu ŭ SK ličać, što zakon nie parušali, honar i hodnaść istcoŭ zakranutyja nie byli.
Advakaty «hraficistaŭ» źviarnuli ŭvahu, što ŚMI vykarystoŭvali navinu SK, dapoŭniŭšy tekst proźviščami fihurantaŭ. Adnak sudździa Andrej Kočyk admoviŭsia pryniać da razhladu razdrukoŭki artykułaŭ u presie.
«Žaromski, jak i inšyja istcy, nie patrabujuć kampiensacyi maralnaj škody, — zajaviła advakat Taćciana Lišankova. — Jamu nie patrebnyja hrošy i prabačeńni. Jamu treba, kab SK pryznaŭ svaju pamyłku i ŭ dalejšym nie padavaŭ infarmacyju ŭ takim kantekście».
Kamientary