Połacki ŭniviersitet daŭ adkaz pa antyŭkrainskich vykazvańniach dacenta Dadonava
U studzieni niekatoryja karystalniki sacyjalnych sietak stali źviartać uvahu na vielmi rezkija vykazvańni dacenta Połackaha dziaržaŭnaha ŭniviersiteta Aleha Dadonava. Nie vybirajučy vyrazaŭ, Dadanoŭ klajmiŭ ukrainskich «banderaŭcaŭ i nacystaŭ».
Voś adzin z prykładaŭ: «Na Danbasie pi…ry nie vodziacca. Vy pabłytali, pavažany, Danbas z Ukrainaj. Heta ŭ Kijevie homiki parady pravodziać, i ŭłada ŭ ich pid…aja, jakaja pryjšła praz Majdan». Svaich apanientaŭ Dadonaŭ zaprašaŭ pryjechać da jaho na pracu ŭ PDU, ale papiaredžvaŭ: «tolki potym nie aba…sia».
Vyśvietliłasia, što Aleh Dadonaŭ rodam z uschodniaj Ukrainy. Jon skončyŭ univiersitet imia Dala ŭ Łuhansku. Pracavaŭ u Navukova-daśledčym instytucie sacyjalna-pracoŭnych adnosin Ministerstva pracy i sacyjalnaj palityki Ukrainy (h.Łuhansk), vykładaŭ va ŭniviersitecie. Ad listapada 2008 da maja 2012 pracavaŭ u łuhanskim filijale Nacyjanalnaj akademii navuk Ukrainy na pasadach zahadčyka adździeła sacyjalnych prablem raźvićcia ekanomiki rehijonu.
U listapadzie 2015 hoda Dadonaŭ pierajechaŭ u Biełaruś, uładkavaŭsia staršym vykładčykam kafiedry ŭliku i aŭdytu Połackaha dziaržaŭnaha ŭniviersiteta. Ad maja 2016 — dacent kafiedry.
Naturalna, što takija pavodziny kidali cień nie tolki na samoha Dadonava, ale i na ŭvieś Połacki dziaržaŭny ŭniviersitet. Hramadski aktyvist Raman Maksimienka napisaŭ skarhu rektaru PDU Dźmitryju Łazoŭskamu.
«Prašu adznačyć chamstva, abrazy, jakija dazvalaje sabie Aleh Dadonaŭ. Padobnyja pavodziny padryvajuć nie tolki imidž i dobraje imia PDU, ale i ŭsioj vyšejšaj škoły Biełarusi», — napisaŭ Maksimienka. Da lista jon prykłaŭ spasyłki z fejsbuka.
14 lutaha Maksimienka atrymaŭ adkaz ad rektara: «Administracyjaj ŭniviersiteta z dacentam Dadonavym była praviedziena hutarka ab nieabchodnaści hodnych pavodzinaŭ i vykanańnia ahulnapryznanych normaŭ marali, a taksama byli ŭziatyja piśmovyja tłumačeńni. Pa vyjaŭlenym fakcie Dadonaŭ pryznaŭ niedapuščalnaść užytaj im leksiki i abiacaŭ dalej nie vykarystoŭvać», — adznačajecca ŭ adkazie.
Darečy, usie nieprystojnyja vyrazy spakojna zastajucca na staroncy dacenta ŭ sacyjalnaj sietcy «Ukantakcie». Voś taki prykład svaim studentam daje Aleh Uładzimiravič Dadonaŭ.
Kamientary