U stalicy Kirhizstanu Biškieku ŭviečary 16 lutaha na skryžavańni vulic Fučyka i Vasiljeŭskaha traktu adbyłasia aŭtamabilnaja avaryja. Džyp Toyota Land Cruiser Prado z dyplamatyčnymi numarami ambasady Rasiei prajechaŭ na čyrvonaje śviatło i ŭrezaŭsia ŭ hruzavy mikraaŭtobus. Kiroŭca mikraaŭtobusa atrymaŭ ciažkija paškodžańni i paźniej pamior u špitali, piša «Radyjo Svaboda».
Kirhiskija ŚMI śćviardžajuć, što džypam karystajecca namieśnik hieneralnaha dyrektara «Rośniefti» u Kirhizstanie Ihar Rasny, i mienavita jon byŭ za rulom u momant avaryi. Akramia jaho ŭ mašynie byŭ jašče adzin čałaviek, taksama supracoŭnik ambasady. Ni sam Rasny, ni druhi pasažyr džypa nie paciarpieli: spracavali paduški biaśpieki.
Mašyna z dyplamatyčnymi numarami RF, jakaja ŭčyniła avaryju
Pradstaŭniki kampanii «Kyrhyźnieftieprodukt» jakaja pradstaŭlaje intaresy «Rośniefti» ŭ Kirhizstanie, zajavili, što Rasny siadzieŭ na pasažyrskim siadzieńni, a chto byŭ za rulom aŭtamašyny — nie paviedamili.
«Naš supracoŭnik Ihar Rasny nia byŭ za rulom aŭtamašyny Toyota Prado, jakaja patrapiła ŭ DTZ 16 lutaha», — paviedamiła kiraŭnictva kampanii.
Pres-sakratar ambasady RF u Biškieku Darja Pachomava paćvierdziła, što viedaje, što aŭtamašyna ambasady trapiła ŭ DTZ.
«Našy supracoŭniki padtrymlivajuć suviaź sa svajakami zahinułaha. My damo dapamohu siamji zahinułaha. Mahčyma, budzie niejkaja kampensacyja», — skazała jana.
Jana taksama padkreśliła, što mašyna ambasady vyjaždžaje «tolki pa słužbovaj nieabchodnaści» i ŭ hetym vypadku «vyjezd byŭ pa słužbie».
«Chto maje racyju, a chto vinavaty, vyjavić śledztva. My smutkujem i vykazvajem spačuvańni siamji zahinułaha ŭ DTZ», — patłumačyła pradstaŭnik ambasady RF.
«Što datyčyć statusu čałavieka, jaki byŭ za rulom džypa, to mahu skazać, što ŭ jaho status dyplamata», — padkreśliła Pachomava.
Paśla hetych zajavaŭ MZS Kirhizstanu nakiravaŭ rasiejskamu boku notu.
«Rasiejskamu boku była ŭručana nota MZS Kirhiskaj Respubliki adnosna nieabchodnaści usialakaha spryjańnia kirhiskim pravaachoŭnym orhanam u raśśledavańni DTZ, uklučajučy zabieśpiačeńnie asabistaj prysutnaści ŭdzielnika DTZ», — havorycca ŭ paviedamleńni viedamstva.
U kastryčniku 2015 hodu supracoŭnik ambasady Rasiei va Ŭkrainie trapiŭ u avaryju pad Kijevam i admoviŭsia prachodzić ahlad na alkahol. Ataše taksama byŭ abaronieny dyplamatyčnym imunitetam, tak što palicejskija zmahli tolki aformić papiery i ŭziać pakazańni ŭ śviedkaŭ.
Kamientary