U sudzie Maskoŭskaha suda rajona Minska była razhledžana sprava žurnalista «Biełsata» Alaksandra Barazienki. Jaho zatrymali na akcyi 25 sakavika i sudzili pavodle artykuła 17.1 za «drobnaje chulihanstva».
Vynik — 15 sutak.
Jon byccam by niecenzurna łajaŭsia, zapisana ŭ pratakole. Barazienka raspavioŭ, jak jon išoŭ ad Akademii navuk pa praspekcie z kalehaj Kaciarynaj Bachvałavaj, žurnalistami ź inšych ŚMI. Kalony nie było, jon pracavaŭ.
U Barazienki była vialikaja kamera, paśviedčańnie. Jaho zatrymali ŭ rajonie kramy «Akijan», na skryžavańni Kazłova i praspektu. Supracoŭniki «niezrazumiełych padraździaleńniaŭ» u dziŭnaj formie pierakryli tratuar i zahadali ŭsim iści ŭ aŭtazak, skazaŭ Barazienka.
Aŭtazak stajaŭ na prajeznaj častcy, na krajniaj pałasie z boku praspektu Niezaležnaści. U im było prykładna 25 čałaviek. Barazienka zapytaŭsia čałavieka ŭ mascy: «Presu taksama zatrymlivajecie?» — «Tak», — adkazaŭ siłavik i brudna niecenzurna vyłajaŭsia. Usich pavieźli ŭ Maskoŭskaje RUUS. Sudździa zadała ŭdakładnialnyja pytańni: jak išoŭ, z kim, navošta.
Vystupiła śviedka Kaciaryna Bachvałava, karespandentka telekanału «Biełsat», kaleha Barazienki, ź jakim jana pracavała razam 25 sakavika. Jana raspaviała, jakaja aparatura była ŭ Barazienki, jak jany viali žyvuju tranślacyju.
Momant zatrymańnia kalehi bačyła zdalok: jon nie akazvaŭ supracivu pry zatrymańni i nia łajaŭsia. Paŭtaraŭ, što jon žurnalist. Bachvałava bačyła hrubaje zatrymańnie Barazienki, jaje asabista niekalki razoŭ šturchnuli, pahražali zatrymać, ale nie zatrymali.
Nastupny śviedka Varyvončyk, milicyjant. Nastojvaŭ, što małady čałaviek niecenzurna łajaŭsia i hučna kryčaŭ. Jaho nibyta papiaredzili, toj nie spyniŭsia. Padychodziŭ jon da Barazienki ŭ formie razam sa svaim kaleham. Nastojvaje, što Barazienka łajaŭsia ŭ hramadzkim miescy. Barazienka zadaje pytańnie śviedku: «U čym jon byŭ?» Śviedka nia pamiataje. Barazienka śćviardžaje, što jaho zatrymlivaŭ čałaviek nie ŭ milicejskaj formie, a ŭ čornym abmundziravańni i ŭ mascy. Śviedka-milicyjant błytaŭsia ŭ pakazańniach.
Kamientary