Patok nianaviści ŭ ananimnym filmie BT: «Bieły lehijon» pryraŭniali da «Isłamskaj dziaržavy», biełaruskuju simvoliku źviazali z nacyzmam 

Uviečary 12 krasavika ŭ efiry kanała «Biełaruś-1» vyjšła «rasśledavańnie», pryśviečanaje našumiełaj «spravie patryjotaŭ».

«Bieły Lehijon čornych duš» — tak nazvali svoj materyjał na BT.

Materyjał ujaŭlaje saboj viniehret sa štampaŭ i strašyłak. U imknieńni zastrašyć hledača aŭtary nie znajšli suviazi chiba što pamiž «Biełym lehijonam» i virusam Eboła, bo ŭsio astatniaje: nacysty, «Isłamskaja Dziaržava», «Taliban» — uskosna ci naŭprost pryplatajucca da zatrymanych. 

Pavialičyć

Niama sensu pierakazvać uvieś patok nianaviści, jaki vyliŭsia z ekrana BT, my tolki zanatavali novyja, raniej nie ahučanyja tezisy i akcenty.

— Napiaredadni 25 sakavika było zroblena niekalki sprobaŭ zavieźci ŭ Biełaruś zbroju i vybuchoŭku z-za miažy. Našy śpiecsłužby ničoha nie prapuścili, «apošni raz takaja situacyja na hranicy była 22 červienia 1941». 

— Dla čaho patrebna była vybuchoŭka? — «Na demanstracyi 25 sakavika mieŭsia adbycca terakt, a taksama mielisia «razarvacca» śmiarotniki». 

— Chto rychtavaŭ «śmiarotnikaŭ»? — «Bieły Lehijon», «estremisckaja ultrapravaradykalnaja hrupoŭka». 

— «Bieły Lehijon» rabiŭ ź dziaciej šachidaŭ. 

— «Maci» adnaho ź dziaciej, jaki adzin raz schadziŭ na zaniatki ŭ łahier «Patryjot», maŭlaŭ, baicca raspravy, tamu z zamylenym tvaram raskazała, što maje infarmacyju ab adnym «lehijanieru», jaki vajavaŭ va Ukrainie na «baku nacyjanalnych bataljonaŭ, jakija zajmalisia rabavańniem i zhvałtavańniami». 

— Apazicyjnyja palityki adčuvali pravakacyju Statkieviča na Dzień Voli, tamu zładzili «masavy sychod» na sutki z raźlikam vyjści ŭžo paśla 25 sakavika.

— Biełarusy pavinny być udziačnyja milicyi za «lohkuju prahułku» ŭ pastarunki na Dzień Voli.

— Biełaruskaje zhurtavańnie vajskoŭcaŭ — heta nacysckaja arhanizacyja (Nahadajem, suzasnavalnikam BZV» byŭ Viktar Šejman — NN).

— 1 maja — śviaty dla kožnaha biełarusa dzień.

— «Bieły lehijon» chacieŭ zładzić terakt u maskoŭskim mietro.

— Polšča finansuje «łahiery bajevikoŭ» dla biełarusaŭ na svajoj terytoryi, Ukraina taksama.

— Niaklajeŭ — chłus, tamu što pačuchaŭ nos u efiry STB. (Arhumientacyja «ekśpierta» Andreja Miacielskaha prahučała tak: «Kali ja pytajusia, ci heta šaurma z kotki, a pradaviec kaža «nie» i čuchajecca, to ja jaje nie kuplaju.) 

— U prahramie ŭ jakaści «ekśpiertaŭ» vystupajuć artysty Jarmolenka i Haściuchin.

— Svaja porcyja pamyjaŭ dastałasia praktyčna ŭsim niedziaržaŭnym ŚMI.

— Nacyjanalnuju simvoliku biełarusaŭ pakazvali ŭ asacyjacyi z nacyzmam.

U pravavych jeŭrapiejskich krainach aŭtary takoha filma, imavierna, byli b pryciahnutyja da adkaznaści za raspalvańnie varožaści i paklop. Nie dziŭna, što film ananimny. Nivodzin aŭtar stužki ŭ citrach nie paznačany.

• 0
• 0
• 0
• 0
• 0
• 0
• 0
• 0