Viadučyja suśvietnyja ŚMI admovilisia padpisvacca pad novymi praviłami Pientahona. Im pahražaje pazbaŭleńnie akredytacyi

Ministr abarony Pit Chehset apublikavaŭ prajekt hetych praviłaŭ u vieraśni i zahadaŭ žurnalistam, što pracujuć u Pientahonie, padpisać ich da 14 kastryčnika — abo da 15‑ha zdać akredytacyi.

Ab admovie padpisvacca pad hetymi praviłami publična zajavili, u pryvatnaści, suśvietnyja ahienctvy Reuters i Associated Press, amierykanskija haziety New York Times i Washington Post, brytanskaja hazieta Guardian, časopis Atlantic, telekanał CNN, radyjokampanija NPR, internet-vydańnie HuffPost i navat niekatoryja ideałahična blizkija administracyi Trampa vydańni — u pryvatnaści, hazieta Washington Times i vydańnie Newsmax.

Žurnalisty zajavili, što ličać hetyja novyja praviły zamacham na svabodu presy i što jany buduć praciahvać aśviatlać dziejnaść Pientahona i Uzbrojenych sił ZŠA i biez akredytacyi pry ministerstvie.

Niekatoryja z vydańniaŭ apublikavali zajavy ŭ sietcy X, i Pit Chehset adkazaŭ na paviedamleńni Washington Post, Atlantic i NYT emodzi z vyjavaj dałoni, što machaje na raźvitańnie. Pres-sakratar Pientahona Šon Parnieł abvinavaciŭ presu ŭ tym, što jana padmianiaje paniaćci, i zajaviŭ, što podpis pad novymi praviłami aznačaje nie zhodu ź imi, a paćviardžeńnie, što žurnalisty ź imi aznajomilisia. Akramia taho, Parnieł zajaviŭ, što dostup u štab-kvateru Pientahona — heta «pryvileja, a nie prava».

Jak tłumačyć vydańnie The Hill, pavodle novych praviłaŭ žurnalistam farmalna nie zabaroniena zdabyvać i publikavać nie zasakrečanuju, ale dalikatnuju infarmacyju pra Ministerstva vajny, ale pry hetym jano moža paličyć žurnalista «pahrozaj biaśpiecy», kali jon pasprabuje atrymać takuju infarmacyju ad supracoŭnikaŭ Pientahona.

Da takich sprob zdabyć niesankcyjanavanuju infarmacyju Pientahon maje namier adnieści i zakliki ŭ publikacyjach i sacsietkach da čynoŭnikaŭ i vajskoŭcaŭ dzialicca takoj infarmacyjaj.

Inšymi słovami, Pit Chehset choča, kab presa publikavała tolki tuju infarmacyju, što sankcyjanavana kiraŭnictvam Pientahona. «Prapanavanyja abmiežavańni padryvajuć harantyi, jakija daje Pieršaja papraŭka, i nakładajuć niepatrebnyja abmiežavańni na zbor i publikacyju infarmacyi», — zajaviŭ u sietcy X vykanaŭčy redaktar Washington Post Met Mary.

Časopis Atlantic, redaktar jakoha Džefry Hołdbierh u sakaviku byŭ vypadkova ŭklučany ŭ sakretny čat, dzie členy kamandy Trampa, u tym liku Pit Chehset, abmiarkoŭvali ŭdary pa jemienskich chusitach, zajaviŭ, što «fundamientalna» nie prymaje padobnyja abmiežavańni. Kiraŭnik vašynhtonskaha biuro haziety New York Times Ryčard Styviensan zajaviŭ, što novyja praviły abmiažoŭvajuć prava žurnalistaŭ pisać pra viedamstva, jakoje atrymlivaje ad padatkapłacielščykaŭ amal tryljon dołaraŭ u hod.

«Hramadskaść maje prava viedać, jak funkcyjanuje ŭrad i vojska», — napisaŭ Styviensan.

Jak nahadvaje vydańnie The Hill, Pit Chehset z samaha pačatku svajho prychodu ŭ Pientahon, z pačatku hetaha hoda, pastupova abmiažoŭvaŭ svabodu akredytavanych tam žurnalistaŭ.

Užo ŭ kancy studzienia karespandenty vaśmi vydańniaŭ, u tym liku The Hill, byli pazbaŭleny ŭłasnych stałoŭ u pres-centry Pientahona. Ich zamianili pradstaŭnikami vydańniaŭ, što simpatyzujuć Trampu i Chehsetu.

U mai Chehset zabaraniŭ žurnalistam chadzić biez supravadžeńnia pa bolšaści kalidoraŭ Pientahona. The Hill adznačaje, što sakretnyja zakrytyja zony ŭ Pientahonie byli zaŭsiody, ale tam, dzie nie zabaroniena, žurnalisty dziesiacihodździami chadzili svabodna.

• 3
• 1
• 0
• 2
• 1
• 0
• 0
• 0