Vajskoŭcy zajavili ab zachopie ŭłady na Madahaskary. U administracyi prezidenta śćviardžajuć, što jon zastajecca na pasadzie
Kamandavańnie elitnaha vajskovaha korpusa CAPSAT zajaviła pra zachop ułady na Madahaskary i rospusk dziaržaŭnych instytutaŭ, paśla taho jak prezident Andry Radzuelina pakinuŭ krainu paśla niekalkich tydniaŭ antyŭradavych pratestaŭ zumieraŭ. U administracyi prezidenta zajavili, što jon pa-raniejšamu zastajecca pry ŭładzie.
«My ŭziali ŭładu», — zajaviŭ pałkoŭnik Majkł Randryjaniryna ŭ nacyjanalnym radyjoefiry, paviedamlaje Bi-bi-si.
Jon paviedamiŭ, što vajskoŭcy raspuskajuć usie dziaržaŭnyja instytuty, akramia Nacyjanalnaha schodu — nižniaj pałaty parłamienta, jakaja niezadoŭha da hetaha prahałasavała za adchileńnie prezidenta ad ułady.
Andry Radzuelina, dakładnaje miescaznachodžańnie jakoha nieviadoma, asudziŭ hałasavańnie pa impičmiencie, nazvaŭšy jaho supiarečnym Kanstytucyi, i adznačyŭ, što pasiedžańnie adbyłosia, niahledziačy na toje, što jon raspuściŭ Nacyjanalny schod.
Niezaležna ad vynikaŭ, pasiedžańnie budzie «ličycca niesapraŭdnym», havaryłasia ŭ zajavie, apublikavanaj u fejsbuku.
Kala prezidenckaha pałaca ŭ centry Antananaryvu, jaki zaniali vajskoŭcy, pałkoŭnik Majkł Randryjaniryna začytaŭ zajavu, u jakoj havaryłasia, što jaho padraździaleńnie stvoryć kiroŭny kamitet, jaki składajecca z aficeraŭ armii, žandarmieryi i nacyjanalnaj palicyi.
«Mahčyma, z časam u jaho ŭvojduć vysokapastaŭlenyja hramadzianskija daradcy. Mienavita hety kamitet budzie vykonvać funkcyi prezidenckaj administracyi, — skazaŭ jon. — U toj ža čas, praź niekalki dzion my sfarmirujem hramadzianski ŭrad».
Vajskoŭcy raniej padtrymali pratesty moładzi ŭ krainie, jakija vylilisia ŭ bolš šyrokuju niezadavolenaść uradam, i ich patrabavańni ab adstaŭcy prezidenta.
Randryjaniryna zajaviŭ, što pratestoŭcy, jakija pradstaŭlajuć pakaleńnie Z, buduć udzielničać u budučych źmienach u krainie, pakolki «ruch uźnik na vulicach, i my pavinny pavažać ich patrabavańni».
Na pytańnie ab praviadzieńni vybaraŭ jon adkazaŭ: «Viadoma». Pavodle jaho słoŭ, heta adbudziecca na praciahu «18 miesiacaŭ — dvuch hadoŭ».
Kamientujučy zajavy vajskoŭcaŭ, administracyja prezidenta padkreśliła, što Radzuelina pa-raniejšamu zastajecca va ŭładzie.
«Prysutnaść uzbrojenych sił pierad prezidenckim pałacam ujaŭlaje saboj vidavočnuju sprobu dziaržaŭnaha pieravarotu, — havorycca ŭ zajavie. — Prezident respubliki zachoŭvaje za saboj usie paŭnamoctvy i zabiaśpiečvaje padtrymańnie kanstytucyjnaha paradku i nacyjanalnaj stabilnaści».
Jak adznačaje AFP, Korpus kiravańnia piersanałam suchaputnych vojskaŭ (CAPSAT), jaki abviaściŭ ab zachopie ŭłady, — heta toje ž samaje padraździaleńnie, jakoje 16 hadoŭ tamu dapamahło Andry Radzuelinu stać lidaram astraŭnoj dziaržavy.
Chto taki Andry Radzuelina
Andry Radzuelina — pradprymalnik i były dydžej, jaki kiravaŭ Madahaskaram z 2009 hoda.
Jon pryjšoŭ da ŭłady ŭ tym ža hodzie, źvierhnuŭšy tahačasnaha prezidenta Marka Ravałamananu ŭ vyniku pieravarotu, padtrymanaha armijaj. U ŭzroście 34 hadoŭ Radzuelina atrymaŭ tytuł samaha maładoha lidara Afryki.
Akramia taho, što jon byŭ dydžejem, pierš čym zaniacca palitykaj, Radzuelina taksama kiravaŭ šeraham pradpryjemstvaŭ.
U 2007 hodzie jon byŭ abrany meram stalicy Madahaskara Antananaryvu.
Radzuelina chutka zavajavaŭ papularnaść, zbolšaha dziakujučy svajoj enierhii i stylu viadzieńnia pieradvybarnaj kampanii, jon pieraabraŭsia na pasadu ŭ 2018 hodzie i znoŭ byŭ abrany ŭ 2023 hodzie ŭ chodzie sprečnych vybaraŭ, jakija apazicyja bajkatavała.
Madahaskar — adna z samych biednych krain śvietu: pa dadzienych Suśvietnaha banka, 75 % nasielnictva žyvie za rysaj biednaści. Pa dadzienych Mižnarodnaha valutnaha fondu, tolki kala traciny z 30 miljonaŭ žycharoŭ Madahaskara majuć dostup da elektryčnaści.
Źnikłuju ŭ Mjanmie Vieru Kraŭcovu znajšli miortvaj5
Kamientary
sačycie ŭvažliva i nie błytajcie.
Dydžej nie patrebny