ZŠA pierakinuli ŭ Jeŭropu źniščalniki piataha pakaleńnia 

Vajskova-pavietranyja siły ZŠA niečakana paviedamili pra adpraŭku «nievialikaj kolkaści» źniščalnikaŭ piataha pakaleńnia F-35A Lightning II u Jeŭropu ŭ hetuju subotu ci niadzielu.

Samo źjaŭleńnie najnoŭšych samalotaŭ u Jeŭropie čakałasia ŭžo peŭny čas, adnak niezvyčajna, što pres-słužba Pientahona paviedamiła pra padzieju ŭsiaho za adzin dzień da realnaha źjaŭleńnia «małanak» u Starym śviecie.

Pavialičyć

Samaloty buduć udzielničać u navučalnych palotach ź inšaj avijatechnikaj ZŠA i NATO ŭ Jeŭropie na praciahu niekalkich tydniaŭ u miežach «Jeŭrapiejskaj inicyjatyvy zapeŭnivańnia» (European Reassurance Initiative).

Prahrama padtrymańnia ZŠA svaich chaŭruśnikaŭ była raspačataja letam 2014 hoda ŭ adkaz na rasiejskuju ahresiju suprać Ukrainy. U jaje ŭvachodziać pavieličeńnie stałaj prysutnaści amierykanskich vojskaŭ u Jeŭropie, dadatkovyja supolnyja manieŭry, pašyreńnie i ŭdaskanalvańnie vajskovaj infrastruktury, dapamoha ŭ śfiery biaśpieki krainam, jakim pahražaje Rasieja, u tym liku Hruzii, Ukrainie i Małdovie.

U 2017 hodzie ZŠA padvysili ŭ čatyry razy vydatki na hetuju prahramu — z $789 młn da $3,4 młrd.

U miežach prahramy adbyvajecca apieracyja «Atłantyčnaja rašučaść» (AtlanticResolve) — sieryja ratacyjaŭ i maštabnych vučeńniaŭ u Jeŭropie z metaj strymlivańnia mahčymaj ahresii Maskvy.

Pryśviečany apieracyi rolik. Videa: USArmyEurope.

Hetak, u Jeŭropu ŭžo była dadatkova nakiravanaja paŭnavartasnaja braniatankavaja bryhada armii ZŠA, zaŭvažna pavialičanaja kolkaść bajavych viertalotaŭ, u pryvatnaści — znakamitych udarnych mašyn AN-64 Apache.

Adznačajecca, što źjaŭleńnie F-35A dapamoža vyśvietlić, jak palepšyć infrastrukturu jeŭrapiejskich avijacyjnych baz NATO dla pryjomki samalotaŭ piataha pakaleńnia, jakija buduć stała znachodzicca ŭ Starym Śviecie praź niekalki hod.

Piataje pakaleńnie bajavoj avijacyi — reaktyŭnyja bajavyja mašyny, jakija mohuć vieści boj u luboje nadvorje, majuć stełs-charakterystyki, to bok nizkuju bačnaść dla radaraŭ, vykarystoŭvajuć apošnija dasiahnieńni ŭ avijonicy i majuć intehravanyja kamputarnyja sistemy kiravańnia dla maksimalna efiektyŭnaha ŭzajemadziejańnia ź inšymi samalotami, spadarožnikami ŭ kosmasie, fłotam, naziemnymi vojskami i siłami supraćpavietranaj abarony.

F-35A — kłasičnaja viersija šmatmetavaha stełs-źniščalnika, jakaja pryznačanaja dla VPS ZŠA. Adnačasova isnujuć jahonyja viersii — F-35B (madel viertykalnaj pasadki i skaročanaha ŭźlotu dla avijacyi marskoj piachoty) dy F-35C (madel dla avijacyi VMS, aptymizavanaja dla ŭźlotu i pasadki na avijanoscach). Siońnia tolki ZŠA majuć na ŭzbrajeńni i vykarystoŭvajuć u bajavych dziejańniaŭ bajavuju techniku piataha pakaleńnia — akramia F-35 heta i źniščalniki F-22 Raptor.

Pavialičyć

Napružanaść u adnosinach pamiž NATO i Rasiejaj zaŭvažna vyrasła paśla ŭdaru ZŠA «tamahaŭkami» pa siryjskim aeradromie Šajrat. Pavodle źviestak amierykanskaj vyviedki, z hetaha aeradromu ŭźlacieŭ samalot, jaki atakavaŭ chimičnaj zbrojaj horad Chan-Džejchun, u vyniku čaho zahinuli jak minimum 74 čałavieki.

Kiraŭnictva Rasiei nie rašyłasia ci nie zmahło efiektyŭna vykarystać suprać amierykanskich rakietaŭ svaje najnoŭšyja sistemy supraćpavietranaj abarony S-300 i S-400, jakija znachodzilisia ŭ Siryi dla abarony siryjskich abjektaŭ.

U hetym kantekście źjaŭleńnie samych sučasnych, małazaŭvažnych dla radaraŭ amierykanskich źniščalnikaŭ na jeŭrapiejskim teatry ŭ miežach adkrytaj apieracyi pa strymlivańni Rasiei moža aznačać dadatkovuju demanstracyju Vašynhtonam Maskvie mahčymaściaŭ amierykanskaj vajennaj mašyny.

• 0
• 0
• 0
• 0
• 0
• 0
• 0
• 0