Kaŭbasu z babrapłanujecca ekspartavać, paviedamiŭ siońnia žurnalistam načalnik adździeła palaŭničaj haspadarki Ministerstva lasnoj haspadarki Biełarusi Siarhiej Šastakoŭ padčas dehustacyi pradukcyi ź miasa dzikich žyvioł na vystavie «Palavańnie i rybałoŭstva. Viasna-2017», pieradaje BIEŁTA.
«My płanujem vyjści na našy dypmisii z prapanovaj pastaŭlać kaŭbasu z babra za miažu. Heta nie kuracina, nie śvinina, jakuju bačym usiudy na pryłaŭkach, heta ŭsio-taki abmiežavanaja partyja pradukcyi, dzivoctva», — skazaŭ Siarhiej Šastakoŭ.
Na dehustacyi pradstavili probnuju partyju kaŭbasy z babra dvuch vidaŭ (z dadatkam dzikaj kački i aleniny), a taksama šašłyk z babra.
«My padrychtavali nievialikuju prezientacyjnuju partyju kaŭbasy. Pakul jana nie pradajecca. U hetaj kaŭbasie 30% miasa babra i 70% inšaha miasa, naprykład, aleniny. Heta aptymalnyja suadnosiny. Praporcyju možna mianiać, ale my imkniomsia padładzicca pad husty spažyŭcoŭ, kab hetuju kaŭbasu možna było realizoŭvać. Vyvučyli dośvied krain-susiedziaŭ i pierakanalisia, što amal nichto nie robić čystuju kaŭbasu z babra. Miasa babra pa svajoj struktury davoli vadzianistaje, tamu pa receptury pažadana źmiešvać jaho ź inšymi vidami. My zrabili syravendžanuju kaŭbasu z terminam zachoŭvańnia kala dvuch miesiacaŭ — heta całkam prymalny termin dla jaje realizacyi», — rastłumačyŭ načalnik adździeła palaŭničaj haspadarki.
Vytvorčaść kaŭbasy z babra płanujecca naładzić vosieńniu-zimoj hetaha hoda, bo siezon palavańnia na babra pačynajecca z 1 vieraśnia.
«Narychtoŭkaj buduć zajmacca lashasy. U cełym pa Biełarusi zdabyvajecca kala 9 tysiač asobin babra. Prykładna 30-40% pojdzie na kaŭbasu», — dadaŭ Siarhiej Šastakoŭ. Miarkujecca, što košt hetaj kaŭbasy moža skłaści 25-30 rubloŭ za 1 kh.
Načalnik adździeła palaŭničaj haspadarki adznačyŭ, što miasa babra vielmi karysnaje. «My paraŭnoŭvali jaho ź miasam trusa, śvininaj, jałavičynaj, i pa mnohich pakazčykach jano pieraŭzychodzić hetyja vidy miasa, naprykład, pa ŭtrymańni žaleza, vitaminu S. Jano budzie asabliva karysnaje dla tych, u kaho nizki hiemahłabin», — padkreśliŭ jon.
Narychtoŭka babra źviazanaja ź jaho liškam u niekatorych rehijonach.
«Babry — toj vid, jaki ŭpłyvaje na naturalnyja łandšafty. Ich nie pavinna być na mielijaracyjnaj sietcy. Jany budujuć płaciny, u vyniku padymajecca ŭzrovień vady, adbyvajecca padtapleńnie, nanosicca škoda jak lasnoj, tak i sielskaj haspadarcy. Tamu peŭnaja kolkaść babra adbirajecca. My prosta nakirujem peŭny pracent na handal», — skazaŭ Siarhiej Šastakoŭ.
Kamientary