Dniami stała viadoma, što staličny «Drymłend» spyniaje pracu ŭ zvykłym režymie parku atrakcyjonaŭ i mianiaje farmat. Niaźmiennym zastaniecca akva-zona, jakaja pačnie pracu ŭžo 1 červienia. Jakija ž pieramieny zakranuć astatniuju terytoryju i kali minčukoŭ čakaje adkryćcio novaj placoŭki, daviedaŭsia TUT.BY.
— Na terytoryi «Drymłenda» my chočam zrabić urban-park — haradski park z zonami aktyŭnaha adpačynku, — raspaviadaje dyrektar kampanii «Kit Salušns» (jakaja zajmajecca ŭpraŭleńniem «suchoha» parku «Drymłend») Alaksiej Padrez. — Jon budzie raźličany na naviedvalnikaŭ roznaha ŭzrostu, ale ŭpor budzie zrobleny na moładzievy adpačynak, a nie na dziciačy. Tyja atrakcyjony, jakija ciapier u parku, my ŭ mai demantujem i pradadzim, a zapuścim viarovačnyja miastečki, skaładromy, łaziertah, łučny boj, cir, kviesty. Budziem aryjentavacca na maskoŭski park Horkaha.
— Jakija fiestyvali čakajuć park u abnoŭlenym farmacie?
— Na siońnia ŭ nas užo papiarednie zabraniravana 60% letnich vychadnych pad roznaha rodu i maštabu fiestyvali. Heta FSP, Vulitsa Ezha, «Mazhabojnia», jakija ŭžo prachodzili tut, a taksama fiestyval bitboksu, ZŁŽ-fiestyvali, fiestyval kavier-bendaŭ na rehularnaj asnovie.
Alaksiej udakładniaje, što na terytoryi parku zastaniecca try zony, jakija mohuć zdavać u arendu pad mierapryjemstvy jak całkam, tak i paasobku. Heta terytoryja akvaparku, uvachodnaja hrupa z vykładzienaj plitkaj placoŭkaj (raźličanaja na 3-5 tysiač čałaviek) i suchi park, jaki ciapier madernizujecca. Na tancpoł apošniaha, pavodle acenak kiraŭnictva, źmieścicca 15-20 tysiač čałaviek — heta značyć, jon nie sastupić «Minsk-Arenie» (płošča tancplacoŭki — 8 tysiač kvadratnych mietraŭ). U toj ža čas, padkreślivaje Alaksiej, dla takich padziej, jak «A-fest», aŭdytoryja jakich pad 100 tysiač čałaviek, placoŭka budzie ciesnaja.
Pra toje, jak budzie budavacca palityka cenaŭtvareńnia, Alaksiej adkazvaje z ahavorkami:
— Pakul płanujem, što ŭvachod u park u budnija dni i ŭ vychadnyja, kali nie prachodzić nijakich fiestyvalaŭ, budzie biaspłatnym. Za dadatkovyja zabavy (viarovačny haradok, łaziertah i h. d.) pryjdziecca płacić asobna. My pratestujem taki varyjant i budziem hladzieć, ci zručny jon, albo lepš pierachodzić da farmatu z adzinym uvachodnym biletam. Padčas ža fiestyvalaŭ i inšych padziej u vychadnyja ŭvachod budzie płatnym.
U abnoŭlenym farmacie «Drymłend» adkryjecca ŭžo ŭ druhoj dekadzie maja. Da taho momantu ŭ parku abnoviać infrastrukturu, pastaviać stacyjanarnyja punkty hramadskaha charčavańnia, adkryjuć viarovačny haradok, łaziertah, vuličny cir i astatniaje.
— 12 maja ŭ nas pieršaje paćvierdžanaje mierapryjemstva z karparatyŭnym klijentam, a 13-14 maja zapuskajecca Vulitsa Ezha, — paćviardžaje Alaksiej. — Atrakcyjony buduć źjazdžać z parku pastupova. Zrazumieć, nakolki hety krok vyhadny i rentabielny, možna budzie ŭžo ŭ vieraśni, pakul ža čakajem usich u hości ŭ abnoŭleny «Drymłend».
Chrysta Hrozieŭ: Mielnikava jak minimum hod, a chutčej za ŭsio, paŭtara pieradavała infarmacyju biełaruskim śpiecsłužbam36
Kamientary