«Ja nie prydurak, ja suprać luboj vajny»: viciebski džaźmien patłumačyŭ, navošta kinuŭsia pad tanki ŭ stalicy

Pamiatajecie chłopca, jaki kidaŭsia naŭprost pad tanki la CUMa padčas repietycyi parada?

Čytajcie taksama: Kala CUMa mužčyna lez pad tanki, što jechali na repietycyju parada VIDEA

«Naša Niva» vyśvietliła jaho imia — heta viciebski džaźmien Andrej Uskoŭ, jaki ŭ toj dzień mieŭsia vystupać (i vystupiŭ) na Džazavym viečary la Ratušy.

My spytalisia ŭ chłopca, čym jon kiravaŭsia, vylecieŭšy na darohu pad husienicy tankaŭ.

Pavialičyć

«Adbyłosia ŭsio takim čynam — ja ź siabrami-kalehami byŭ na płoščy Jakuba Kołasa, kali jechali hetyja tanki. Siadzieŭ na łaŭcy i, ubačyŭšy, prosta pačaŭ vykazvacca — miescami łajankaj — pra svajo staŭleńnie da paradaŭ. Maŭlaŭ, jak vy ŭžo nadakučyli svajoj zbrojaj machać! Vy nas prymušajecie płacić padatki na darmajedstva, pry hetym raboty nie dajučy, a hrošy voś siudy iduć? Na heta apošnija kapiejki adbirajecie? Aburyŭsia ja, karaciej. Tak, byŭ trochi napadpitku, ale nie mocna pjany, jak heta vystavili. Mnie ŭsio adno treba było na kancert, tamu ja padumaŭ — a što, kali naprastki? Było taksama cikava, ci paśpieje tank spynicca, što mnie za heta budzie?

Ale hałoŭnaje — ja suprać luboj vajny i zbroi. Ja — muzykant.

Pry hetym ja nie adnošusia ni da jakoj palityčnaj arhanizacyi: ni BRSM, ni BNF. Ja prosta hraju muzyku», — raskazaŭ nam Andrej.

Taksama jon pryznaŭsia, što jamu było cikava, jak chutka jaho prybiaruć z darohi — taki sabie ekśpierymient hipatetyčnaha vybiahańnia na darohu dziciaci.

«Inśpiektary DPS, jakija zatrymlivali, pakłali mianie na kapot, potym pasadzili ŭ mašynu, vypisali štraf za pierachod u nienaležnym miescy. Voś i ŭsio. Paśla ja jašče vystupiŭ na kancercie, jak i mieŭsia», — kaža jon. Uskoŭ dadaje, što nijakich paškodžańniaŭ pry zatrymańni jon nie atrymaŭ.

«Ci byŭ ja pačuty? Ja nie viedaju, ci buduć niejkija vyniki. Miedyja-vyniki chiba što, — śmiajecca džaźmien. — Ja ž masavych akcyj nie ładziŭ, heta ja prajaviŭ hramadzianskuju pazicyju svaju. Što da taho pałkoŭnika, jaki paraŭnaŭ ludziej z antymilitarystyčnaj pazicyjaj z naščadkami Kube? Ja tak skažu — jość śpiecyjalnyja miescy, palihony. Kali jany chočuć pakazać svaju militarystyčnuju siłu, to chaj tam parady pravodziać. Ja zhodny — kožnaja kraina ŭ naš čas niespakojny musić mieć zbroju, u nas nie idealny śviet. Ale parady ŭ takim vyhladzie — kali prosta pa vulicach horada jeździać, to ja suprać», — adkazaŭ Makaravu chłopiec.

Čytajcie taksama: Minabarony: Suprać paradaŭ vystupajuć idejnyja naščadki Kube

Pra reakcyju svajakoŭ i siabroŭ jon kaža tak: maŭlaŭ, baćki prosta ŭ šoku i dumajuć, što syn zvarjacieŭ. A mnohija pišuć: «Ty hieroj, adzin pajšoŭ suprać militaryzmu, suprać vajny».

«Ja voś muzykant nie horšy ŭ krainie, tak skažam, navat viadomy ŭ džazie, skažu nie tojačy — ja hraŭ i ź simfaničnym arkiestram fiłarmonii, hraŭ u arkiestry Finbierha. Ale dla mianie pracy ŭ Viciebsku tołkam niama. I ja nie prydurak, prosta nie lublu takija parady», — padsumavaŭ Andrej.

• 0
• 0
• 0
• 0
• 0
• 0
• 0
• 0