Na niekatoryja vulicy Minska naniasuć škłovałakno. Raźbirajemsia, što heta i navošta
Na čatyroch vulicach stalicy praviaduć ramont z poŭnaj zamienaj vierchniaha płasta asfaltu, paviedamiŭ ahienctvu «Minsk-Naviny» hienieralny dyrektar «Harramaŭtadar Minharvykankama» Dzianis Hlinski.
Havorka idzie pra vuł. Fabryčnuju na ŭčastku ad zav. Pracoŭnaha da vuł. Rybałki; vuł. Čyrvanazornuju; vuł. Hamarnika (pa cotnym baku); vuł. V. Charužaj ad vuł. Krapotkina da vuł. Čarviakova.
Taksama ŭ pačatku žniŭnia na šerahu vulic horada namiečanaja ŭkładka achoŭnaha płasta na pakryćcio prajeznaj častki. Takija raboty zapłanavanyja na vuł. Radyjalnaj (učastak ad vuł. Čaluskincaŭ, 26, da vuł. Pierachodnaj), vuł. Hromava, vuł. Akademičnaj (ad vuł. Płatonava da zav. Kazłova), vuł. Arłoŭskaj (ad vuł. Bahdanoviča da vuł. Karastajanavaj), vuł. Laščynskaha, vuł. Zasłaŭskaj, vuł. Rotmistrava.
Nanosić na darožnaje pałatno achoŭny płast škłovałakna ŭ Minsku stali ŭ 2016 h. Technałohija źjaŭlajecca vynikam sumiesnaj pracy śpiecyjalistaŭ «Harramaŭtadara», Biełaruskaha nacyjanalnaha techničnaha univiersiteta i Kitaja. Jana zaklučajecca ŭ vykarystańni śpiecyjalnych hieasintetyčnych sietak (hieasietak) z škłovałakna dla ŭmacavańnia darožnaha pakryćcia i raźmierkavańnia nahruzak.
Hieasietka — heta hieasintetyčny palimierny materyjał ź sietkavataj strukturaj, jaki rasściłajuć rułonami. Sietka maje ŭ sabie ełastyčnyja rebry z vysokatryvałych pučkoŭ nitak. Moža raźmiaščacca jak u siaredzinie, tak i na pavierchni darožnaha pałatna.
Heta svojeasablivaja armatura, jakaja chacia i nie ŭpłyvaje na tryvałaść asfaltu, ale značna źmianšaje jaho defarmatyŭnaść. Kažučy prostymi słovami, na darozie budzie źjaŭlacca značna mienš raskolin i jam.
Taki mietad umacavańnia daroh dazvalaje spraścić praces i skaracić čas rekanstrukcyi, pavialičyć termin słužby asfaltu i tym samym źnizić vydatki na ramont daroh.
Vykonvajuć hetuju praceduru pry dapamozie admysłovaje mašyny, nabytaj u Kitai. Chutkaść jaje pracy składaje 1 km/h, a šyrynia płasta hieasietki, jaki jana ŭkładvaje na svaim šlachu - 2,5-4,3 m.
Minskija aŭtamabilisty ŭžo majuć dośvied jazdy pa darohach z takim pakryćciom: u minułym hodzie jaho atrymali niekatoryja ŭčastki praśpiekta Puškina, a taksama vulic Bačyły i Cimašenki. Niekatoryja minčuki kažuć, što novaje pakryćcio davoli šurpataje i dastaŭlaje dyskamfort pry jaździe. Ale treba zaŭvažyć, što takaja «šurpataść» značna palapšaje sčapleńnie kołaŭ aŭtamabila z darohaj, što robić kiravańnie transpartnym srodkam bolš biaśpiečnym.
Kamientary