Urad Azerbajdžana vydzieliŭ 225 kvater žurnalistam. Padarunak prymierkavali da Dnia nacyjanalnaha druku.
Usie kvatery raźmiaščajucca ŭ adnym 17-paviarchovym domie, pieradaje pres-słužba azierbajdžanskaha prezidenta. Heta ŭžo druhi dom, pabudavany admysłova dla žurnalistaŭ. Ilcham Alijeŭ paviedamiŭ, što ciapier zakładzieny treci dom dla žurnalistaŭ — jašče na 255 kvater.
«Heta čarhovaje prajaŭleńnie ŭvahi dziaržavy pra azierbajdžanskuju žurnalistyku, — cytuje pres-słužba prezidenta. — Azierbajdžanskaja žurnalistyka raźvivaje i adyhryvaje vielmi stanoŭčuju rolu ŭ hramadztvie. Svaboda vykazvańnia zabiaśpiečana ŭ Azierbajdžanie».
Pa słovach Alijeva, žurnalisty, što atrymali kvatery, naležać da roznych palityčnych śpiektraŭ.
«Ludzi z roznymi palityčnymi pohladami, jakija naležać da roznych partyj, buduć žyć tut razam, jak adna siamja», — skazaŭ Alijeŭ.
U Azerbajdžanie biaspłatna vydajuć kvatery z 2013 hoda. Prava na žyllo dajuć žurnalistam, jakija bieśpierapynna prapracavali nie mienš za try hady ŭ adnym ŚMI, i jakija majuć nie mienš za 10-hadovy staž pracy ŭ žurnalistycy.
U toj ža čas mižnarodnyja pravaabarončyja arhanizacyi krytykujuć Baku za parušeńnie pravoŭ žurnalistaŭ. Arhanizacyja Freedom House ŭ 2017 hodzie pastaviła Azierbajdžan u hrupu «niesvabodnych» krainaŭ pa indeksie svabody ŚMI.
Karespandent Radyjo Svaboda ŭ Baku Chadzidža Ismaiłava, jakuju aryštavali paśla publikacyj pra karupcyju siamji azierbajdžanskaha prezidenta, pavinšavała žurnalistaŭ, jakija «nie atrymali kvateru ŭ jakaści chabaru».
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary