Karol Filip i karaleva Letycyja ŭziali ŭdzieł u nabaženstvie ŭ viadomym Chramie Śviatoj Siamji (Sagrada Familia), kab pamianuć 14 achviaraŭ napadaŭ u Katałonii.
Palicyja praciahvaje pošuki kiroŭca mikraaŭtobusa, jaki zajechaŭ u natoŭp minakoŭ na viadomym turystyčnym praśpiekcie Rambła ŭ Barsiełonie i zabiŭ 13 čałaviek. Čatyrnaccaty zahinuŭ u vyniku najezdu aŭtamabila ŭ Kambryłsie, piša Bi-bi-si.
Pa paviedamleńniach ŚMI, džychadysty płanavali padarvać Sagrada Familia, sprajektavany viadomym architektaram Antonia Haŭdzi.
Na paminalnym nabaženstvie prysutničaŭ taksama premjer-ministr Ispanii Maryjana Rachoj. Miery biaśpieki kala chrama ŭzmocnienyja.
U subotu karaleŭskaja para ŭskłali kvietki na miesca ataki na bulvary Rambła. Ich supravadžaŭ mer Barsiełony i kiraŭnik Katałonii.
Taksama karol i karaleva naviedali achviaraŭ napadu ŭ Barsiełonie ŭ haradskoj lakarni.
Paźniej u niadzielu futbolny kłub «Barsiełona» praviadzie pieršuju hulniu ŭ siezonie ŭ ispanskaj Ła Lizie. Čakajecca, što na stadyjonie kłuba «Kamp Nou», dzie źbiarecca 100 000 hledačoŭ, taksama abvieściać chvilinu maŭčańnia.
U subotu ministr unutranych spraŭ Chuan Ihnasia Zojda zajaviŭ, što džychadysckaja hrupoŭka, jakaja naličvała prykładna 12 čałaviek, całkam likvidavanaja.
U toj ža čas palicyja praciahvaje pošuki padazravanaha - uradženca Maroka Juniesa Abujakuba, jakoha ispanskija ŚMI nazvali vierahodnym kiroŭcam furhona.
17-hadovy Musa Ukabir, jakoha raniej adšukvali jak hałoŭnaha padazravanaha, byŭ adnym ź piaci zabitych palicyjaj padčas napadu ŭ horadzie Kambryłs, na zachad ad Barsiełony.
Palicyja zajaŭlaje, što padazravanyja płanavali maštabnyja i składanyja terakty.
Pa słovach palicyi, vybuch u sieradu ŭ domie ŭ horadzie Alkanar pazbaviŭ udzielnikaŭ zmovy materyjału dla vyrabu bombaŭ, tamu jany ździejśnili prostyja napady, vykarystaŭšy transpartnyja srodki ŭ jakaści zbroi.
22-hadovy Abujakub žyŭ u horadzie Rypol. Tam aryštavali troch čałaviek i jašče adnaho - u Alkanary.
Taksama praciahvajucca pošuki imama miačeci Rypoli, adkul pachodziła bolšaść členaŭ hrupoŭki. Palicyja abšukała jaho kvateru.
Imam raptam pakinuŭ miačeć u červieni i hetul jaho tam nie bačyli. Pavodle infarmacyi ispanskich ŚMI, jon moh zahinuć padčas vybuchu doma ŭ Alkanary.
Kamientary