Dla indyvidualnych pradprymalnikaŭ i pradpryjemstvaŭ, jakija pracujuć u sielskaj miascovaści i ŭ małych haradach u śfiery handlu, hramadskaha charčavańnia i bytavoha absłuhoŭvańnia, spraścili praviły viadzieńnia biznesu. Źmieny praduhledžanyja prezidenckim ukazam № 345 «Ab raźvićci handlu, hramadskaha charčavańnia i bytavoha absłuhoŭvańnia», jaki byŭ siońnia padpisany, paviedamlaje Tut.by sa spasyłkaj na pres-słužbu prezidenta.
«Ukaz nakiravany na raźvićcio handlu, hramadskaha charčavańnia i bytavych pasłuh na terytoryi sielskaj miascovaści i małych haradskich pasieliščaŭ ź siaredniaj kolkaściu nasielnictva da 10 tys. čałaviek», — havorycca ŭ tłumačeńni da ukaza.
Dakumient praduhledžvaje mahčymaść ustanaŭleńnia na asobnych terytoryjach asablivaha režymu padatkaabkładańnia ŭ śfiery handlu, hramadskaha charčavańnia i bytavoha absłuhoŭvańnia z vypłataj padatku na prybytak dla pradpryjemstvaŭ u pamiery 6% i adzinaha padatku dla indyvidualnych pradprymalnikaŭ u pamiery adnoj bazavaj vieličyni, a taksama inšych sproščanych umoŭ ažyćciaŭleńnia hetych vidaŭ dziejnaści.
Akramia taho, praduhledžvajecca vyzvaleńnie subjektaŭ haspadarańnia ad padatku na dadanuju vartaść, padatku na nieruchomaść, ziamielnaha padatku i arendnaj płaty za ziamielnyja ŭčastki, što znachodziacca ŭ dziaržaŭnaj ułasnaści.
Dziejańnie padatkovych ilhot i inšych umoŭ handlu, hramadskaha charčavańnia i bytavoha absłuhoŭvańnia, zamacavanych u dakumiencie, budzie raspaŭsiudžvacca na nasielenyja punkty i terytoryju pa-za nasielenych punktaŭ, jakija vyznačajucca rašeńniami abłasnych Savietaŭ deputataŭ.
Dakumient byŭ padrychtavany stvoranaj na padstavie rasparadžeńnia prezidenta rabočaj hrupaj u ramkach pravodzimaj raboty pa stymulavańni dziełavoj aktyŭnaści i vyklučeńni zališnich patrabavańniaŭ, što pradjaŭlajucca da subjektaŭ haspadarańnia, udakładnili ŭ pres-słužbie prezidenta.
Źmieny nakiravanyja na raźvićcio handlu, hramadskaha charčavańnia i bytavoha absłuhoŭvańnia na terytoryi sielskaj miascovaści i ŭ małych haradach, a taksama dazvolić stvaryć dadatkovyja pracoŭnyja miescy dla hramadzianaŭ, jakija pražyvajuć na hetych terytoryjach.
Nahadajem, Ministerstva antymanapolnaha rehulavańnia i handlu jašče viasnoj padrychtavała prajekt ukaza, jaki pavinien spraścić viadzieńnie biznesu na siale i ŭ małych nasielenych punktach. Hałoŭnaja sutnaść u nizkaj padatkovaj nahruzcy na pradprymalnikaŭ — usiaho adna bazavaja ŭ hod.
U žniŭni načalnik upraŭleńnia arhanizacyi handlu i pasłuh MARH Vijaleta Brazoŭskaja raspaviała, chto zmoža skarystacca lhotaj.
Za adnu bazavuju vieličyniu ŭ hod zmohuć pracavać pradprymalniki, jakija za biescań kupiać pustujučyja pamiaškańni abo abjekty, jakija siońnia vykarystoŭvajucca nieefiektyŭna.
Na lhotnych umovach možna budzie lehalizavać i ŭžo isnujučy biźnies na damu.
«Ukaz praduhledžvaje mahčymaść adkryć u svaim domie na pieršym paviersie nievialiki handlovy punkt, kafe abo abjekt bytavych pasłuh. Naprykład, cyrulniu. Pry hetym dakumient daje mahčymaść nie źmianiać metavaje pryznačeńnie pamiaškańnia, što pavinna spryjalna adbicca na raźvićci biznesu», — skazała Vijaleta Brazoŭskaja.
Padatak u adnu bazavuju budzie dziejničać i dla abjektaŭ prydarožnaha servisu pablizu viosak.
U MARH raźličvajuć, što źmieny nie tolki padvysiać kankurencyju, ale i daduć mahčymaść raźvivacca vytvorčamu biznesu.
Ciapier čytajuć
U Tajłandzie źnikła anlifanščyca ź Pinska. Jaje mahli pradać u Mjanmu4
Kamientary