Kinateatr «Maskva» (pr.Pieramožcaŭ, 13).
5—7 studzienia ŭ kinateatry «Maskva» adbudziecca premjera filma «Chroniki Narnii: Leŭ, Viadźmarka i harderob» i adnajmiennaj znakamitaj kazki K. S. Ljuisa ŭ pierakładzie na biełaruskuju movu.
Padčas Druhoj suśvietnaj vajny čaćviarych dziaciej evakujujuć uhłyb Anhlii. Jany pasialajucca ŭ domie staroha prafiesara. Małodšaja ź dziaciej, Lusi, padčas hulni ŭ chovanki znachodzić u šafie-harderobie prachod u čaroŭnuju krainu — Narniju. Tam užo 100 hod zima, jakuju načaravała Biełaja Viadźmarka. Ci zdolejuć dzieci raźbić złyja čary i stać karalami i karalevami Narnii?
Knihaj «Leŭ, Viadźmarka i harderob» K. S. Ljuis razam sa svaim siabram Dž. R. R. Tołkinam zakłaŭ padvaliny žanru «fentezi». Kazka niaźmienna ŭvachodzić u rejtynhi samych čytanych i samych ulubionych dziciačych knih. Ekranizacyja čaroŭnaj historyi, stvoranaja kampanijami Disney i Walden Media, stała adnym z samych papularnych filmaŭ 2005 hoda. Ciapier kino vychodzić na kinaekrany i pa-biełarusku.
Film ahučany kampanijaj «Kinakonh» ŭ miežach prajekta «Biełaruskija ŭikendy» pry padtrymcy kampanii velcom. U ahučcy brali ŭdzieł najlepšyja biełaruskija akciory i televiadučyja.
Premjera filma pa-biełarusku: 5 studzienia ŭ kinateatry «Maskva». Pačatak sieansa a 18:40.
Pierad filmam projdzie karotkaja prezientacyja pieršaha pierakładu adnajmiennaj knihi na biełaruskuju movu. Na jaho vydańnie zaraz idzie zbor hrošaj.
Sieansy ŭ nastupnyja dni, 6 i 7 studzienia, projduć a 16:30.
U dni pakazaŭ budzie mahčymaść nabyć knihu pa źnižanaj canie prosta ŭ kinateatry.
Dadatkovyja pakazy filma «Chroniki Narnii: Leŭ, Viadźmarka i harderob» projduć 12—14 studzienia ŭ kinateatry «velcom cinema» (HC «Dana Moł», vuł Piatra Mścisłaŭca, 11).
Padrabiaznaści na sajcie kinakong.by.
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami12
Kamientary