Budučynia z hnutkimi hadžetami ŭsio bližej: navukoŭcy stvaryli novy hnutki i prazrysty pravadnik
Amierykanskija inžyniery raspracavali prazrysty, ełastyčny i elektrapravodny materyjał. Jon składajecca z tonkich pałosak niekalkich spłavaŭ mietałaŭ, jakija zanadta małyja, kab ich možna było ŭbačyć niaŭzbrojenym vokam, ale dosyć elektrapravodnyja, kab zabiaśpiečvać enierhijaj elektronnyja pryłady, paviedamlajecca ŭ časopisie Advanced Materials.
U asnovie novaha materyjału lažyć prazrysty ełastamier polidymietyłsiłaksan. Na jaho nanosiać 20-nanamietrovy płast chromu i 100-nanamietrovy płast miedzi. Paśla hetaha apuskajuć u vadki pry pakajovaj tempieratury spłaŭ EGaIn, jaki na try čverci składajecca z haliju i na čverć ź indyju. Pry hetym jon ŭzajemadziejničaje ź miedździu i ŭtvaraje novy spłaŭ. Paśla taho, jak materyjał dastali ź jomistaści z vadkim spłavam i pramyli, častka spłavu ŭsio ž zastajecca na pavierchni, nadajučy materyjału ŭłaścivaści pravadnika.
Kab zrabić materyjał prazrystym, na im z dapamohaj łaziera vyrazajuć bolšuju častku spłavaŭ i pakidajuć ściežki šyrynioj 4,5 mikramietra, raźmieščanyja na adlehłaści 96 mikramietraŭ adna za adnoj. Dla abarony ich taksama pakryvajuć plonkaj z polidymietyłsiłaksana.
U vyniku prazrystaść materyjału trymajecca na ŭzroŭni 85%, ale pry hetym jon taksama zachoŭvaje vysokija miechaničnyja i elektryčnyja ŭłaścivaści. Pry hetym, choć supraciŭleńnie pavialičvajecca pry raściažeńni, daśledčyki nie zaŭvažyli pastajannaha padzieńnia elektrapravodnaści paśla mnohich cykłaŭ raściažeńnia.
Kamientary