Andrej Stryžak praciraŭ noŭtbuk — i zahnaŭ sabie ŭ palec častku mietaličnaje litary ad łahatypa
Pravaabaronca i hramadski aktyvist z Homiela Andrej Stryžak paviedamiŭ na svajoj staroncy ŭ fejsbuku niezvyčajnuju historyju: padčas pracirańnia vonkavaj pavierchni svajho noŭtbuka častka mietaličnaha łahatypa apynułasia ŭ jahonym palcy, što pryviało da chirurhičnaha ŭmiašalnictva.
«Bolš za hod jon vieraj i praŭdaj słužyć mnie va ŭsich maich pachodach i pajezdkach, sumlenna i dakładna pieranosić usie niahody słužby ŭ takoha niaŭrymślivaha haspadara, jak ja. Ale idylija skončyłasia kala dvuch tydniaŭ tamu, kali ja praciraŭ survetkaj aluminijevuju kryšku kampjutara i raptam adčuŭ vostry rezki bol u mieziency. Z paškodžanaha palca ciakła kroŭ, a na viečku u litary S … brakavała pałački, — piša Andrej Stryžak. —Abśledavaŭšy survetku i nie znajšoŭšy na joj kavałka mietału, ja zrazumieŭ, što paŭsantymietra malunka suśvietna viadomaha brenda ciapier unutry mianie. Viedajučy, što stremki i askiepki, jakija niehłyboka siadziać, vychodziać sami, ja pačakaŭ, pakul pytańnie vyrašycca samastojna. Pytańnie nie vyrašyłasia, i ja pajechaŭ u špital».
Pakul Andrej čakaŭ, što askiepak vyjdzie samastojna, palec mocna zapaliŭsia i pačaŭ hnaicca. Rana ŭžo zarasła, tamu doktaru pryjšłosia razrazać jaje.
«Paŭtary hadziny manipulacyj, try apieratyŭnyja sproby, šeść renthienaŭskich zdymkaŭ za dvoje sutak. Abodva askiepki vyniatyja (mabyć, askiepak raskałoŭsia pry vymańni), ciapier pačynajecca reabilitacyja: antybijotyki, pieraviazki i h.d.», — raspaviadajecca ŭ zapisie ŭ fejsbuku.
Stryžak źviarnuŭsia da pradstaŭnikoŭ kampanii ASUS praź ichni akaŭnt u «Fejsbuku», dzie atrymaŭ prapanovu źviarnucca da słužby padtrymki.
«My vielmi škadujem ab tym, što zdaryłasia, i zyčym vam chutčejšaha vyzdaraŭleńnia! Za 29 hadoŭ pracy našaj kampanii padobnych vypadkaŭ nie było ŭ našaj praktycy, — havorycca ŭ adkazie kampanii. — My radyja, što vy źjaŭlajeciesia prychilnikam našaj kampanii i addali pieravahu ŭ vybary mienavita nam. Vašaje pytańnie ŭžo na paradku dnia, i ŭ bližejšy čas my pastarajemsia jaho vyrašyć!»
«U ZŠA ja napeŭna adsudziŭ by paŭmiljona baksaŭ na hetym kiejsie, ale my nie ŭ ZŠA», — iranizuje Andrej.
Ciapier čytajuć
Minharvykankam pra vuličnaje aśviatleńnie: Heta była razavaja akcyja. Siońnia ŭklučać a 18-j15
Kamientary