Arhanizatary napisali adkryty list da Siarhieja Michałka z zaklikam vystupić kala Opiery ŭ Minsku 25 sakavika
Kaardynatary śviatkavańnia 100-hodździa abviaščeńnia niezaležnaści BNR apublikavali adkryty zvarot da muzykanta Siarhieja Michałka, zaklikajučy jaho ŭziać udzieł u śviatočnym kancercie 25 sakavika kala minskaj Opiery. Nahadajem, što kancert dazvoleny haradskimi ŭładami.
Jany tłumačać adkryty zvarot tym, što ŭžo tydzień nie mohuć źviazacca ź Michałkom asabista.
«Tamu vyrašyli apublikavać hety zvarot i patłumačyć, čamu vielmi važna, kab 25 sakavika vy vystupili na śviatkavańni 100-hodździa niezaležnaści BNR», — adznačajecca ŭ zvarocie.
«Vašyja biełaruskamoŭnyja pieśni «Hraj», «Nie być skotam», «Rodny kraj», «Budź śmiełym», «Belarus Freedom» stali nie prosta chitami, a sapraŭdnymi himnami novaj Biełarusi. Dziakujučy hetym pieśniam biełaruskaja mova zahučała ŭ roznych krainach śvietu, šmatlikija žychary našaj krainy adčuli siabie biełarusami i patryjotami. Hetyja pieśni dajuć nadzieju, natchniajuć da dobrych spravaŭ dy vučać zmahacca za svaje kaštoŭnaści i praŭdu. Vy zaklikajecie nas być śmiełymi i dužymi — i my vučymsia takimi być. Jak možna ŭjavić hałoŭnaje nacyjanalnaje śviata, 100-hodździe niezaležnaj dziaržaŭnaści Biełarusi, biez hetych piesień? Nijak!
Nie treba vialikaha šoŭ — tolki vy, hitara i mikrafon dy tysiačy ludziej u centry stalicy, jakija razam z vami zaśpiavajuć «Rodny kraj». I heta budzie ŭžo vialikaje jaskravaje vidovišča, jakoje abjadnaje nacyju».
Adznačajecca, što 24 sakavika ŭ Homieli budzie kancert Brutto, a 25 sakavika ŭžo ŭ «Lapisa-98» zapłanavany kancert u Mazyry.
«My hatovyja arhanizavać transpart, kab pryvieźci vas z Homiela ŭ Minsk dla vystupu 25 sakavika da 16.00 na Śviacie Niezaležnaści dy paśla kamfortna zavieźci ŭ Mazyr, — zaznačajuć arhanizatary. — Pierakananyja, što niama realnaj prablemy i pieranieści kancert u Mazyry na niekalki hadzinaŭ ci na dzień. I vierym, što vašyja prychilniki ŭ Mazyry zrazumiejuć i padtrymajuć vašaje rašeńnie vystupić na ŭračystym kancercie na 100-hodździe BNR u Minsku».
Raniej paviedamlałasia, što pahadzilisia ŭdzielničać u śviatočnym kancercie Lavon Volski, «Krama», «Dzieciuki» i Neuro Dubel
Ciapier čytajuć
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary