Naprykancy pieršaha tydnia sakavika ŭ Hrodzienskim rajonie siabry APB bačyli pieršych palavych žaŭrukoŭ.
Palavyja žaŭruki zaŭsiody prylatajuć rana, jany pieršyja pradvieśniki viasny. Byvaje, užo ŭ lutym my zaŭvažajem hetych ptušačak, jak było ŭ papiarednija dva hady. Sioleta viasna ŭ nas poźniaja. U pačatku sakavika — marazy i śnieh. Ale palavyja žaŭruki ŭsio adno nie marudzili, a viarnulisia na Radzimu jak najchutčej. Čamu jany tak śpiašajucca?
— Pieršymi z vyraju viartajucca samcy palavych žaŭrukoŭ, — tłumačyć dyrektar hramadskaj arhanizacyi «Achova ptušak Baćkaŭščyny» (APB) Alaksandr Vinčeŭski. — Jany chočuć paśpieć zaniać najlepšyja miescy dla hniezdavańnia. Raniej za ŭsich prylatajuć samyja mocnyja, u jakich najbolš šancaŭ zajmieć patomstva. Chutka my pačujem u niebie ich pieśni.
Darečy, marazoŭ jany nie bajacca i korm sabie znachodziać: žyviacca nasieńniem, stresienym na doł i śnieh. Rahatyja žaŭruki i žaŭruki-śmieciuchi navat adznačalisia ŭ nas na zimoŭcy. Siarod inšych niezvyčajnych vidaŭ, jakija zastavalisia ŭ nas na zimu, možna adznačyć kanaplanak, śniažurak, šerych i biełałobych husiej dy humieńnikaŭ.
Kali prylatajuć inšyja?
Voś piać ptušak — viastuńniaŭ viasny, jakich adnosna lohka paznać: bieły busieł, viaskovaja łastaŭka, čorny śvirhul, zvyčajnaja ziaziula i ščurka-pčałajedka.
Niedzie ŭ druhim tydni sakavika viartajucca ŭ krainu pieršyja busły, u pieršaj pałovie krasavika — viaskovyja łastaŭki i ziaziuli, u mai — śvirhuli i ščurki-pčałajedki. Navošta sustrakać ptušak?
— Nazirać ptušak, jakija tolki-tolki viartajucca da nas z dalokich krajoŭ, — pryjemna i zachaplalna, vydatnaja mahčymaść adčuć pryrodnyja źmieny, adznačyć nadychod sapraŭdnaj viasny. Usie hetyja ptuški «Žyvoj viasny» šyroka raspaŭsiudžanyja, akramia ščurki-pčałajedki. Pabačyć jaje budzie sapraŭdnaj udačaj. Paviedamlajcie nam, kali ich ubačycie, — zaprašaje kiraŭnik adździeła raźvićcia APB, kaardynatar kampanii «Žyvaja viasna» pa Biełarusi Karyna Sałaviej.
Kamientary