Sajt «Vajenna-palityčny ahlad» (belvpo.com), jaki, pa infarmacyi «Našaj Nivy», viadziecca supracoŭnikami infarmacyjnaj słužby Ministerstva abarony, vykazaŭsia pra skradzienyja 25 sakavika drony la Opiernaha.
Tady, nahadajem, źnikła kala dziasiatku dronaŭ ŚMI i prostych ludziej — pryłady prosta pierachoplivali, zahłušajučy sihnał ad «matčynaha» pulta.
Dyk što piša partał, blizki da vajskovaha viedamstva?
«Vielmi cikavaja situacyja ź dziasiatkam «stračanych» dronaŭ nad Opiernym teatram u Minsku, jakija, pa słovach udzielnikaŭ kancerta, byli «vykradzienyja» siłavikami 25 sakavika ŭ chodzie śviatočnych mierapryjemstvaŭ z nahody 100-hodździa BNR. Takija zajavy ad arhanizataraŭ mitynhu vyhladajuć davoli śmiešna. Sprava ŭ tym, što lubyja paloty nad horadam Minskam, akramia avijacyi siłavych struktur, zabaronienyja. Taksama jak i praviadzieńnie aerafotazdymki (u tym liku z vykarystańniem dronaŭ). Dla hetaha nieabchodna brać dazvoł na vykarystańnie pavietranaj prastory (praz Hienieralny štab Uzbrojenych Sił)», — havorycca na belvpo.
«U pryncypie, u hetym składanaha ničoha niama i, jak praviła, takija dazvoły vydajucca. Tolki voś u vypadku z kancertam la Opiernaha teatra nichto z arhanizataraŭ mierapryjemstva navat nie pakłapaciŭsia pra heta, maŭlaŭ: prakocić i tak. Jak bačym — nie prakaciła. Darečy, nielha nie adznačyć toj fakt, što ŭ niepasrednaj blizkaści ad Opiernaha teatra znachodzicca adna z zabaronienych zon — budynak Hienieralnaha štaba. Mahčyma, paru bieśpiłotnikaŭ, jakija «vypadkova» pralatali pablizu dadzienaha abjekta, mahli prymusova pasadzić na ziamlu i śpiecyjalisty Uzbrojenych Sił», — dadajecca ŭ materyjale.
Admietna, što aŭtar usio roŭna robić vyhlad, nibyta drony skrali «nieviadomyja». U hetym i absurdnaść situacyi — siłaviki namiakajuć, što ŭładalniki dronaŭ parušyli zakon, ale sami zakonaŭ nie pryznajuć: nijakich pratakołaŭ za parušeńnie pavietranaj pracedury palotu składziena nie było, drony ŭładalnikam dahetul nie viarnuli.
Taksama nahadajem, što, pa infarmacyi «Našaj Nivy», adkaznyja za biaśpieku na śviatkavańni 100-hodździa BNR pradstaŭniki adnoj sa słužbaŭ biaśpieki sapraŭdy źviazvalisia z Hienštabam dla ŭdakładnieńnia, ci vydavalisia dazvoły na paloty.
Paśla admoŭnaha adkazu z Centra kiravańnia palotami drony pačali źnikać.
Kamientary