Na minułym tydni miljony ludziej pa ŭsim śviecie sačyli za viasiellem prynca Hary i aktrysy Miehan Markł. Tolki lanivy nie pahladzieŭ fota z cyrymonii, nie abmierkavaŭ sukienku niaviesty i stroi haściej.
Ale zanadta mała ŭvahi nadali temie ježy, a, na maju dumku, heta adzin z samych hałoŭnych składnikaŭ takoha mierapryjemstva. Pa-pieršaje, cikava, što karaleŭskaja siamja ličyć dalikatesam, jaki varta jeści tolki na vialikija śviaty. Pa-druhoje, chočacca dakranucca da viasielnych tradycyj inšaj krainy.
Razvažajučy na hetuju temu, ja ŭzhadała pra pryŭkrasny recept silezskaha piraha, jakim ja i chaču z vami padzialicca (u Silezskim krai dahetul isnuje tradycyja častavać rodnych i susiedziaŭ kałačom, pryhatavanym niaviestaj).
Mienavita taki varyjant kałača z draždžavoha ciesta z kryšyvam źvierchu staŭ asabliva papularnym u druhoj pałovie 20-ha stahodździa. Varyjant z harodninaj ci jahadami ličyŭsia štodzionnym, a voś načyńnie z maku ci tvarahu ŭžo ŭvažałasia za śviatočnuju vypiečku. Kali vy staviciesia abyjakava da maku, to možacie zrabić kałač z aharodninaj, jahadami, pavidłam ci tvarahom — ekśpierymientujcie i znachodźcie svoj ulubiony varyjant!
(Składniki dajucca na formu dyjamietram 28 sm).
Dla ciesta:
- 500 hr. muki;
- drobka soli;
- 100 hr. masła;
- 1 jajka;
- 100 hr. cukru;
- 1 č. ł. vanilnaha cukru (ci kropla vanilnaj esiencyi);
- 30 hr. śviežych draždžej;
- 250 mł ciopłaha małaka.
Dla makavaha načyńnia:
- 200 hr. maku;
- 100 hr. cukru;
- 25 hr. masła;
- 1 st. ł. miodu;
- 70 h zdroblenych arechaŭ (mindal ci arachis).
Dla kryšyva:
- 50 hr. chałodnaha masła;
- 50 hr. cukru;
- 1 č. ł. vanilnaha cukru;
- 100 hr. muki.
Ciesta:
U miscy źmiešvajem muku z sollu. Rastaplivajem masła. Jajki ŭźbivajem z cukram i vanillu. Droždžy raźmiešvajem u nievialikaj kolkaści małaka. Dadajem u muku pa čarzie jajki, masła, droždžy, astatniaje małako. Ciesta miesim pakul jano nie pačnie mienš lipnuć da ruk (prykładna 5—10 chvilin). Nakryvajem i pakidajem u ciopłym miescy na hadzinu, za hety čas jano pavialičycca ŭ pamierach prykładna ŭ dva razy (kali jość mahčymaść možna zrabić abminku paśla pieršaj hadziny i pakinuć jašče na chvilin 40).
Makavaja masa:
Mak zdrabniajem u kavamołcy. U rondali padahrajem 375 mł vady, dadajem usie inhredyjenty dla načyńnia, raźmiešvajem. Varym, pamiešvajučy, pakul bolšaść vady nie vyparycca. Načyńnie pavinna być dosyć vilhotnym, ale nie vadkim. Pakidajem, kab sastyła.
Kryšyva:
Raścirajem masła z cukram i vanillu, pakrysie dadajom muku. Pavinna atrymacca kryšyva.
Ciesta dzielim na dźvie častki: mienšuju i bolšuju. Raskačvajem jaho pad pamier formy (možna prosta razraŭniać rukami, kali ciesta atrymałasia zanadta miakkim). Formu zmazać masłam, pakłaści ŭ jaje bolšuju častku ciesta. Raŭnamierna pakłaści načyńnie na ciesta, źvierchu na načyńnie pakłaści mienšy kavałak ciesta. Absypać kryšyvam.
Piačy 35 chvilin pry tempieratury 190 hradusaŭ. Praviarajem hatoŭnaść na suchuju zubačystku.
Kamientary