Barnukova: Piensijny ŭzrost treba padymać da 65 hadoŭ dla mužčyn i žančyn

U Biełarusi zahučali mierkavańni ab tym, što treba zraŭniać piensijny ŭzrost dla mužčyn i žančyn. Źjaviłasia prapanova, kab z 2023 hoda jašče raz adsunuć uzrost vychadu na piensiju dla žančyn, i tady da 2032 hoda jany buduć vychodzić na piensiju naroŭni z mužčynami ŭ 63 hady, piša «Narodnaja vola».

Pavialičyć

Ci apraŭdany taki krok? Pa kamientar «Narodnaja vola» źviarnułasia da akademičnaha dyrektara Biełaruskaha ekanamičnaha daśledča-adukacyjnaha centra (VIEROS) Kaciaryny Barnukovaj.

— Na žal, demahrafičnaja situacyja składvajecca zaraz tak, što ludziej piensijnaha ŭzrostu budzie stanavicca ŭsio bolš, a pracazdolnaha — usio mienš, kaža ekśpiert. — Dla Fondu sacabarony nasielnictva heta aznačaje rost deficytu fondu: vypłaty rastuć, a pastupleńni, naadvarot, padajuć. Pavodle našych raźlikaŭ, dla taho kab deficyt FSAN nie stanaviŭsia zanadta vysokim, nieabchodna pastupovaje (da 2035 hoda) pavieličeńnie piensijnaha ŭzrostu i dla žančyn, i dla mužčyn da 65 hadoŭ.

Što tyčycca pavyšeńnia piensijnaha ŭzrostu žančynam da 63 hadoŭ, to, na moj pohlad, heta nie tolki pravilna, ale i nieabchodna. Isnujučaja piensijnaja sistema źjaŭlajecca dyskryminacyjnaj dla mužčyn, asabliva ŭličvajučy, što čakanaja praciahłaść žyćcia mužčyn našmat mienšaja. Bolš za toje, siońnia mnohija žančyny ŭzrostu 45+ dyskryminujucca na rynku pracy z-za zanižanaha piensijnaha ŭzrostu.

— Ale ŭ 65 na piensiju — heta niejak vielmi radykalna, mnohija biełarusy vas nie zrazumiejuć. Moža, spačatku, naprykład, varta było b pavialičyć piensijny ŭzrost dla ludziej u pahonach?

— Vydatki na piensijnyja vypłaty pradstaŭnikam siłavych struktur ažyćciaŭlajucca nie z Fondu sacabarony, i my nie viedajem, jakija na heta iduć srodki. Ale ja nie dumaju, što dadzienych ilhotnych katehoryj tak šmat, što ekanomija na vypłatach im piensijnych dapamoh istotna źmianiła b situacyju ŭvohule ź piensijnym zabieśpiačeńniem.

Na moj pohlad, nie treba tak bajacca pavyšeńnia piensijnaha ŭzrostu. Heta nie adbyvajecca raptoŭna, a idzie paetapna — pa paŭhoda ŭ hod, tak što ŭvieś praces zojmie pryblizna 20 hadoŭ. Niama takoha, što my pračnulisia i daviedalisia, što, umoŭna kažučy, z 1 lipienia piensijny ŭzrost u Biełarusi 65 hadoŭ dla mužčyn i žančyn. Inšaja sprava, što ludziej treba da hetaha rychtavać. Tyja, kamu siońnia 30—35 hadoŭ, pavinny dakładna razumieć, što jany stanuć piensijanierami nie ŭ 60 hadoŭ.

— Nam časta kivajuć na Jeŭropu: maŭlaŭ, tam daŭno piensijanierami stanoviacca, kali daloka za 60. Ci karektnyja takija paraŭnańni?

— Pierš za ŭsio niekarektnyja tamu, što praciahłaść žyćcia ŭ Jeŭropie bolšaja. Adnak i ŭ Biełarusi praciahłaść žyćcia davoli chutka raście. Akramia taho, u krainach Jeŭropy aficyjny piensijny ŭzrost źjaŭlajecca, chutčej, indykatyŭnaj ličbaj. Mnohija jeŭrapiejcy, dziakujučy nazapašvalnym piensijnym fondam, mohuć sami vyznačać čas vychadu na piensiju i, nazapasiŭšy na zasłužany adpačynak, nidzie nie pracavać užo ŭ 55 albo 60 hadoŭ, čakajučy piensijnaha ŭzrostu. Ale pry hetym i tam mnohija vybirajuć praciahvać pracavać paśla dasiahnieńnia piensijnaha ŭzrostu, kali dazvalaje zdaroŭje.

• 0
• 0
• 0
• 0
• 0
• 0
• 0
• 0