Niadaŭna KDB zatrymaŭ niekalkich čynoŭnikaŭ ź Ministerstva achovy zdaroŭja. U sacsietkach pačali žartavać, što ŭ Biełarusi terminova spatrebilisia novyja staršyni kałhasaŭ — voś Kamitet dziaržaŭnaj biaśpieki i zaniaŭsia ich narychtoŭkaj.
U kožnym dobrym žarcie jość dola praŭdy: u 2016 hodzie pamiłavanych Alaksandram Łukašenkam čynoŭnikaŭ sapraŭdy «raźmierkavali» na kirujučyja pasady ŭ kałhasy i na zavody. Ale ci nadoŭha vysłanyja ŭ hłybinku čynoŭniki zatrymlivajucca na miescach «raźmierkavańnia»? «Jeŭraradyjo» napisała pra try historyi złačynstva, pakarańnia i pośpiechu.
Historyja pośpiechu №1: Viktar Chadasievič
Z kałhasa «Lipaŭka» — u dyrektary handlovaha centra ŭ Babrujsku.
Viktar Chadasievič — były dyrektar Babrujskaha miasakambinata. Heta nie pieršy kiraŭnik pradpryjemstva, jakoha asudzili za karupcyju. Jaho papiarednik, Andrej Isajčanka, taksama byŭ asudžany: na šeść hadoŭ z kanfiskacyjaj majomaści.
Chadasieviča zatrymali praz paŭtara miesiaca paśla taho, jak jon ačoliŭ miasakambinat (da hetaha jon dva hady pracavaŭ tam hałoŭnym inžynieram). U traŭni 2015 hoda jon byŭ asudžany na dva hady pazbaŭleńnia voli. Ale ŭžo ŭ lutym 2016 hoda uznačaliŭ kałhas «Lipaŭka» ŭ Chocimskim rajonie (Mahiloŭskaja vobłaść).
Adnak, jak paviedamili Jeŭraradyjo, dyrektaram «Lipaŭki» Viktar Chadasievič prabyŭ… usiaho kala hoda.
«Viktar Chadasievič bolš nie dyrektar pradpryjemstva. Jon zvolniŭsia dzieści paśla hoda pracy i źjechaŭ», — raspaviadaje Jeŭraradyjo ciapierašni ŭpraŭlajučy «Lipaŭki» Mikałaj Kakotaŭ.
Sam Viktar Chadasievič raspavioŭ Jeŭraradyjo, što ciapier jon pracuje na radzimie — u Babrujsku:
«Pracuju doma, u Babrujsku, dyrektaram handlovaha centra «Śpiektr». Źjechaŭ ź Lipaŭki, tamu što skončyłasia pracoŭnaja damova».
Jakija vyniki pryniesła praca Viktara Chadasieviča ŭ Lipaŭcy? Užo ŭ lutym 2017 hoda Mahiloŭski ekanamičny sud pačynaje spravu ab bankructvie kałhasa. U śniežni 2017 hoda pačynajecca praces sanacyi, to bok rearhanizacyi, refarmavańnia i finansavaj padtrymki pradpryjemstva.
«Bankructva pačałosia z taho, što naša finansavaje stanovišča nie dazvalała vypłačvać daŭhavyja abaviazalnictvy. Ciapier «Lipaŭka» u stanie sanacyi. U nas jość biźnies-płan, i da 2020 hoda my pavinny vyjści na biasstratnuju pracu», — dadaje ŭpraŭlajučy «Lipaŭki» Mikałaj Kakotaŭ.
Historyja pośpiechu №2: Alaksandr Archipaŭ
Asudžany na 6 hadoŭ pazbaŭleńnia voli. Paŭtara hoda pravioŭ za kratami, jašče paŭtara — u stratnym kałhasie.
Alaksandr Archipaŭ — były namieśnik hienprakurora Biełarusi. Jon byŭ asudžany ŭ 2014 hodzie na šeść hadoŭ pazbaŭleńnia voli za atrymańnie chabaru i pieravyšeńnie słužbovych paŭnamoctvaŭ. Adnak chutka Alaksandr Łukašenka pamiłavaŭ Archipava. A ŭ studzieni 2016 hoda kolišni siłavik byŭ pryznačany dyrektaram stratnaha sielhaspradpryjemstva «Piatrovičy» pad Smalavičami. Darečy, papiaredni dyrektar Vasil Patyła, jak kažuć miascovyja žychary, «byŭ złoŭleny na chabary i pajšoŭ na nary».
Ale były namieśnik hienprakurora nie doŭha prapracavaŭ u kałhasie. Užo ŭ traŭni 2018 hoda jon pakinuŭ svaju pasadu. Mahčyma, pryčynaj zvalnieńnia stała toje, što kałhas tak i nie dasiahnuŭ patrebnych pakazčykaŭ pa tempie rostu vytvorčaści — pra heta rapartujuć miascovyja haziety.
Ciapier abaviazki dyrektara ŭ RSUP «Piatrovičy» vykonvaje Alaksandr Karalčuk, jaki ŭvieś čas u raźjezdach. A što Archipaŭ? Napeŭna, nieŭzabavie ŭspłyvie na kirujučaj pasadzie ŭ čarhovaj ustanovie.
Historyja pośpiechu №3: Uładzimir Bułaj
«Jon zvolniŭsia. Moža, i pa ŭłasnym žadańni».
Jak nie pryhadać historyju staršyni Čašnickaha rajvykankama Uładzimira Bułaja! Na pačatku vieraśnia 2015 hoda kryminalnuju spravu ab karupcyi suprać jaho raspačała Hienieralnaja prakuratura.
Čynoŭnik byŭ zatrymany, a jaho dziejańni kvalifikavalisia jak złoŭžyvańnie słužbovymi paŭnamoctvami. I pahražała jamu ad troch da dziesiaci hadoŭ. Adnak heta nie pieraškodziła jamu ŭ studzieni 2016 hoda stać dyrektaram AAT «Klanovičy» u Krupskim rajonie.
Jak i ŭsie inšyja pamiłavanyja, jon niadoŭha prabyŭ na hetaj pasadzie i zvolniŭsia na pačatku 2018 hoda. Ciapierašni dyrektar haspadarki Alaksandr Śvirydaŭ paćviardžaje heta:
«Jon zvolniŭsia. Moža, i pa ŭłasnym žadańni. Nie viedaju. Ja nie liču patrebnym abmiarkoŭvać asabistaje žyćcio inšaha čałavieka i jaho pracu ŭ Klanovičach».
Ci supadzieńnie, što na pačatku 2018 hoda na troch fiermach AAT «Klanovičy» była vyjaŭlenaja kryminalnaja schiema: bryhadziry prymušali padnačalenych atrymlivać zarobak małakom. Sa studzienia pa vierasień 2017 hoda na paciarpiełych było zapisana ad 20 da 350 litraŭ, a adzin z kiraŭnikoŭ pa dakumientach «pradaŭ» svajoj padnačalenaj bolš za 1300 litraŭ małaka.
Novyja pamiłavanyja — u novyja kałhasy
Dniami stała viadoma, što kiraŭnik Salihorskaha rajona Alaksandr Rymašeŭski, byŭ pryznačany na pasadu dyrektara AAT «Radastaŭski». U śniežni 2017 hoda, jaho pryznali vinavatym u atrymańni chabaru, asudzili na vosiem hadoŭ kałonii ŭzmocnienaha režymu i spahnali 28561 rubiel. Ale ŭ niavoli jon prabyŭ nie doŭha: užo ŭ červieni 2018 hoda Rymašeŭski akazvajecca pamiłavanym.
U pryjomnaj AAT «Radastaŭski» Jeŭraradyjo raspaviali, što Rymašeŭski znachodzicca ŭ pastajannych pracoŭnych pajezdkach i tamu nie moža dać kamientaryj.
Z 1999 hoda da hetaha momantu pradpryjemstvam kiravaŭ Leanid Karol. Jak stała viadoma Jeŭraradyjo, jon niadaŭna pakinuŭ svaju pasadu, napisaŭšy zajavu ab sychodzie, i byŭ zvolnieny «pa zhodzie bakoŭ». Pry hetym jon zastajecca členam Radastaŭskaha sielsavieta, skład jakoha sfarmavaŭsia na vybarach u lutym 2018 hoda.
Doŭhi čas AAT «Radastaŭski» nie demanstravała vialikich prybytkaŭ, ale ŭ 2017 hodzie situacyja palepšyłasia: čysty prybytak pradpryjemstva vyras da 168 tysiač rubloŭ. Što budzie z pradpryjemstvam dalej — zaležyć ad Alaksandra Rymašeŭskaha.
Viadoma, što były kiraŭnik Leninskaha rajona Minska Valeryj Kuleš taksama źviarnuŭsia da Alaksandra Łukašenki z prośbaj ab pamiłavańni. Ale pakul niajasna, ci budzie jon «raźmierkavany» u kałhas.
Poŭny śpis pamiłavanych čynoŭnikaŭ-karupcyjanieraŭ nidzie nie apublikavany. U Administracyi prezidenta ličać, što śpisy pamiłavanych byłych čynoŭnikaŭ i top-mieniedžaraŭ, pryznačanych na kirujučyja pasady, heta słužbovaja tajamnica.
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary