«Za budny dzień padjazdžaje mašyn 12, u vychodny — kala 25»: što adbyvajecca ŭ Kurapatach la «Pajedziem, pajadzim» REPARTAŽ
Jašče da pryjezdu ŭ Kurapaty čytajem: Źmicier Daškievič zatrymany. Jon razam z Valeryjem Mincom i Jahoram Łaŭruchinym jechaŭ va ŭročyšča, vieźli novyja kryžy. Miniec dziela hetaha pryhnaŭ ź Lidy hruzavik. Nie paśpieli vyjechać na Partyzanski praśpiekt, jak mašynu spačatku spynili DAIšniki, a potym i ludzi ŭ cyvilnym padciahnulisia. Kažuć, što heta byli bajcy «Alfa», ale chto pravieryć.
Piatnica ŭ Kurapatach — heta dzień dziažurstva «Maładoha frontu». Arhanizacyi raźmierkavali miž saboj usie dni tydnia. Za paniadziełak adkazvajuć «Alternatyva» i AHP, aŭtorak — ruch «Razam», sierada — BCHD, čaćvier — BNF, piatnica — «Małady front», subota — «Jeŭrapiejskaja Biełaruś», niadziela — KCHP-BNF. I tak užo viaduć tłumačalnuju pracu ceły miesiac.
«Za ŭčorašni dzień było 12 klijentaŭ, kala dziesiaci nam atrymałasia pierakanać nie iści ŭ hetuju ŭstanovu», — raskazvaje Pavieł Sieviaryniec. Mienavita jon pačaŭ vachtu la restarana. U vychodnyja dni va ŭstanovu prychodzić čałaviek 25—30. Zdajecca, i niamnoha, ale achvotnyja znachodziacca ŭvieś čas.
U piatnicu ŭ Kurapatach asabliva šmatludna. Sprava ŭ tym, što na inšym kancy horada miemaryjał u Traściancy adkryvaje Alaksandr Łukašenka. Mienavita z hetaj nahody pa ŭsie baki ad Kurapataŭ dziažurać nie zvyčajnyja milicyjaniery, a chłopcy ŭ krapavych bieretach.
«Vy choć viedajecie, što heta za miesca?» — pytajecca ich Sieviaryniec.
«Viedajem», — adkazvaje pa-biełarusku adzin ź ich.
Sieviaryniec uručaje im buklety ź infarmacyjaj pra rasstreły ludziej. Chłopcy adrazu biaruć pačytać.
Mnohich ździŭlaje toje, što za miesiac supraćstajańnia pra Kurapaty nijak nie vykazaŭsia Alaksandr Łukašenka. Jon tak i nie staŭ ni na adzin z bakoŭ. Mabyć, mienavita praz heta mnohija čynoŭniki taksama znachodziacca ŭ takim niavyznačanym stanie. I nie viedajuć, što rabić.
Kiraŭnik ruchu «Dzieja» Aleś Łahviniec pryvioz čatyry vializnyja viadry z kamianiami, kab umacavać kryžy. Kiraŭnik BNF Ryhor Kastusioŭ razam z namieśnikam Alaksiejem Janukievičam ledź ciahnuli adno na dvuch. Sapraŭdy, ciažka.
Jašče na minułym tydni Kastusioŭ razam z advakatam Jurasiom Ziankovičam anansavali pieramovy z ułaśnikam «Pajedziem, pajadzim» Leanidam Zajdesam. Nijakich pieramovaŭ nie adbyłosia. Adny kažuć, što Zajdes da 3 lipienia ŭ Izraili, inšyja — naadvarot, što 3 lipienia tolki tudy źjedzie. Tak i nie zrazumieła, chto daŭ žycharu ZŠA Ziankoviču paŭnamoctvy vieści hetyja pieramovy.
Vykazvajecca mierkavańnie, što pra datu 29 červienia było zajaŭlena nievypadkova, kab aktyvisty nie stajali ŭ dzień adkryćcia Traścianieckaha miemaryjału.
Užo ad ranku ŭ Kurapatach była nievialikaja hrupa ź niamieckich i francuzskich turystaŭ, jakija pryjechali pahladzieć hetaje miesca. Adzin stały spadar tak uciahnuŭsia ŭ praces, što staŭ dapamahać pratestoŭcam razrazać skotč, kab vyviešvać na ścieny płakaty. Inšyja ź cikavaściu fotkali. «Najpierš za hetaje miesca pavinny pakajacca», — kaža adna žančyna z delehacyi.
U pałovu na adzinaccatuju daznajomsia, što ŭ samich Kurapatach znachodzicca polskaja delehacyja na čale z vysokapastaŭlenym supracoŭnikam kancylaryi prezidenta Polščy Kšyštafam Ščerskim. Heta čynoŭnik uzroŭniu Maksima Ryžankova ŭ nas. Uzrovień dastakova vysoki.
Ščerski razam ź inšymi pradstaŭnikami delehacyi ŭskładvaje vianok da «polskich kryžoŭ». Miarkujecca, što ŭ Kurapatach razam ź biełarusami rasstrelvali i polskich aficeraŭ. Papraŭlaje łampadki, žahnajecca. Heta ŭsio było da adkryćcia miemaryjału ŭ Traściancy. Tudy jon pajedzie akurat z Kurapataŭ. Palaki chacieli, kab hety vizit adbyŭsia niezaŭvažna, tamu admaŭlajucca ad intervju. Jany navat padjechali ź inšaha boku va ŭročyšča, kab zastacca niezaŭvažanymi, ale nie atrymałasia. Da restarana jany nie pajšli.
Nieaficyjna kažuć, što ŭ Kurapaty pryjedzie i preident Aŭstryi Alaksandr van der Bielen, a voś niamieckaja delehacyja nie była zacikaŭlenaja ŭ naviedvańni hetaha miesca.
La restarana siońnia ad ranku sabrałasia šmat pratestoŭcaŭ — čałaviek 25. I heta navat da adkryćcia ŭstanovy. Adkazny dzień, tamu i adkaznaść pavyšanaja.
Źviartaje ŭvahu pryjezd Maksima Klimkoviča — unuka aŭtara himna Biełarusi Michasia Klimkoviča.
29-hadovy Dzianis Urbanovič z Łahojska pryjazdžaje štodnia. Na ruce ŭ jaho tatuiroŭki «BNR» i «Biełaruś». Dzianis adzin z tych ludziej, na jakich trymajucca pratesty.
Režysiorka Volha Mikałajčyk i dysident Maksim Viniarski ładziać jarki pierfomans. Jany abklejvajuć płot «Pajedziem, pajadzim» składzienymi na ich pratakołami. Paśla vypeckvajuć ruki ŭ čyrvonuju farbu i pakidajuć na pratakołach svaje adbitki.
«Lonia, ty pavinien pakinuć apošni», — kryčać jany Leanidu Kułakovu. U aktyvista złamanaja ruka, paśla taho, jak na jaho najechaŭ aŭtamabil. Cełaj rukoj Kułakoŭ usio ž pakidaje svoj aŭtohraf.
Užo ab 11-j hadzinie sonca smažyć tak, što stajać vielmi ciažka. Sieviaryniec idzie na blizkuju zapraŭku, dzie nabyvaje vady i limanadu. Nichto sychodzić nie źbirajecca. U niadzielu pačniecca ŭžo druhi miesiac vachty.
-
Staś Karpaŭ: Ja zaŭvažyŭ try Maryi
-
«Źviažyciesia z nami»: Prakopjeŭ napisaŭ kałonku dla «NN», u jakoj abhruntoŭvaje znachodžańnie Cichanoŭskaha ŭ Štatach i prosić hrošaj
-
«Ja tolki nie razumieju, dla kaho pabudavali AES?» Daŭno nijakaja tema nie vyklikała takich emocyj, jak adklučeńnie śviatła na zahad Łukašenki
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary