Baćki i dzieci źbirajuć podpisy pad pietycyjaj za pierakład multfilmaŭ u «Kałychancy» na biełaruskuju movu
U internecie idzie zbor podpisaŭ pad pietycyjaj, kab u «Kałychancy» pakazvali multfilmy pa-biełarusku. Aŭtaraŭ zvarotu aburaje, što ŭ adzinaj biełaruskamoŭnaj prahramie dla dzietak za červień nie źjaviłasia nivodnaha mulcika pa-biełarusku.
Prahrama «Kałychanka» vychodzić štodnia na telekanale «Biełaruś-3». Jana isnuje jak biełaruskamoŭnaja ad samaha pačatku, ad 1981 hoda. Prahrama maje biełaruskamoŭnych viadučych, adnak multfilmy ŭ joj ciapier demanstrujucca na ruskaj movie.
Aŭtary pietycyi prosiać rabić «Kałychanku» pa-biełarusku całkam. Jany adznačajuć, što baćki i dzieci, kali jany metanakiravana abirajuć biełaruskamoŭnuju prahramu, chacieli b čuć jaje ad pačatku i da kanca prahramy.
Ruskamoŭnyja baćki i dzieci majuć šmat mahčymaściaŭ: dziciačyja prahramy (i navat cełyja kanały) isnujuć i na telebačańni, i ŭ kabielnych sietkach, i ŭ internecie.
«Kałychanka» — adna ź niešmatlikich biełaruskamoŭnych prahram na biełaruskim telebačańni na siońniašni dzień, i jana maje być takoj całkam, a nie častkova», pišuć aŭtary pietycyi.
«Miž tym za pieryjad z 1 pa 30 červienia 2018 hoda ŭ «Kałychancy» multfilmy na ruskaj movie demanstravalisia 30 (tryccać) razoŭ, a multfilmy na biełaruskaj movie — 0 (nul) razoŭ, — adznačajuć jany. — Z pakazanych multfilmaŭ tolki 1 byŭ stvorany ŭ Biełarusi (9 červienia)».
Pietycyja patrabuje:
«1) nieadkładna zabiaśpiečyć ahučvańnie ci dublaž na biełaruskuju movu usich biez vyklučeńnia multfilmaŭ, jakija demanstrujucca ŭ prahramie «Kałychanka»;
2) patłumačyć, jakim čynam adbyvajecca vybar multfilmaŭ, jakija demanstrujucca ŭ «Kałychancy», i nazvać adkaznych za vybar asob;
3) patłumačyć, čamu siarod pakazanych multfilmaŭ amal całkam adsutničajuć multfilmy, stvoranyja ŭ Biełarusi».
Na hety momant pietycyju padpisali ŭžo 126 čałaviek.
Kamientary