U Minsku dziaŭčaty pieraŭvasobilisia ŭ Frydu Kało — u čym fienomien papularnaści hetaj mastački?
U 111-ty dzień naradžeńnia mastački Frydy Kało ŭ Minsku zładzili viečarynu ŭ jaje honar. Akramia kino, fotazdymkaŭ, ježy — elemientaŭ tak ci inakš źviazanych ź jaje žyćciom i atmaśfieraj Mieksiki, adnoj z zabaŭ viečaryny byŭ konkurs: chto najlepš pieraŭvasobicca ŭ Frydu.
My naviedali biełaruski źlot «Fryd», kab raspytać prysutnych, čym mieksikanskaja žančyna tak skaryła ich serca. A zaadno vyrašyli zhadać samyja cikavyja, pikantnyja i natchniajučyja fakty ź bijahrafii «alter-eha» Salvadora Dali.
Top-5 faktaŭ pra moc i niepaŭtornaść Frydy Kało
Moc fizičnaja
Va ŭzroście šaści hod Fryda pieraniesła polijamielit (virusnaje infiekcyjnaje zachvorvańnie, jakoje paražaje niervovuju sistemu i vyklikaje poŭny paralič). Chvaroba zrabiła jaje pravuju nahu bolš tonkaj za levuju, i pryviała da kulhavaści. Niahledziačy na heta, dziaŭčyna aktyŭna zajmałasia sportam: boksam, futbołam i ŭvohule była vielmi aktyŭnym padletkam-chulihankaj.
Praŭda, fizičny «praklon» nie adstupaŭ. U 18-ć Fryda traplaje ŭ aŭtakatastrofu, praź jakuju jana paciarpieła, vidać, bolš za ŭsich astatnich pasažyraŭ aŭtobusa, jaki 17 vieraśnia 1925 hoda sutyknuŭsia z tramvajem. Pierałomy klučycy, rebraŭ, taza, nahi, vyvichnutaje plačo; matka i žyvot, pratknutyja mietaličnymi parenčami — pasła hetaha strašnaha vypadku Frydzie pryjšłosia kinuć navučańnie, hod pravalacca ŭ łožku i maryć pra lepšaje, kali za lepšaje možna ličyć nastupstvy ŭ vyhladzie šmatlikich apieracyj, miesiacaŭ lačeńnia i niemahčymaści mieć dziaciej.
Adzinym plusam hetaj trahiedyi stała toje, što mienavita paśla traŭmy, u lažačym stanie Fryda pačała malavać.
Moc pratestnaja
Z samaha dziacinstva jana vielmi adroźnivałasia ad svaich siaścior i mnohich inšych dziaŭčat: addavała pieravahu stylu uniseks u adzieńni, lubiła mužčynskija kaściumy i siabravała z chłopcami. U 15 hod pastupiła ŭ adnu z najlepšych škoł Mieksiki z metaj vyvučać miedycynu: jana stała adnoj z 35 dziaŭčat, jakim prychodziłasia zavajoŭvać aŭtarytet siarod bolš za tysiaču chłopcaŭ. U jaje heta atrymałasia chutka: Fryda zaŭsiody prajaŭlała siabie jak lidarka, jakaja nie prosta išła napieradzie, jana epaciravała. Čaho tolki vartyja jaje znakamityja brovy?
A voś adna z cytat Frydy:
«Raniej ja ličyła siabie samym dziŭnym čałaviekam, ale potym padumała: u śviecie tak šmat ludziej, pavinna ž być dzieści dakładna takaja ž šalonaja i sapsavanaja, jak ja. Ja ŭjaviła sabie jaje i padumała, što jana niedzie tam taksama dumaje pra mianie. Što ž, spadziajusia, što, kali ty dzieści tam čytaješ heta, viedaj — tak, heta praŭda, ja tut i ja takaja ž dziŭnaja, jak i ty».
Moc emacyjnaja
Praz svaju jarkaść Fryda nikoli nie skardziłasia na niedachop uvahi. I kali ŭ jaje žyćci źjaŭlaŭsia partnior — kachańnie zachoplivała jaje całkam. Asabliva doŭhaj atrymałasia linija adnosin z mastakom Dyjeham Ryvieraj. Jany svarylisia, zdradžvali adno adnamu, raźvialisia i ŭziali šlub nanoŭ. I va ŭsich kanfliktach pieršy krok da prymireńnia rabiła Fryda. Praŭda, adnojčy heta skončyłasia: Fryda pierastała być pasłuchmianaj matulaj-prysłuhaj, kali vyrašyła naradzić dzicia, prytym što Dyjeha hetaha nie chacieŭ. Zdaroŭje, na žal, nie dazvoliła, ale hety pratest staŭ pieršym viartańniem da samastojnaści. Adkryłasia jaje pieršaja bujnaja ńju-jorkskaja vystava (1938 hod), jana znoŭ pačała nasić džynsy (da hetaha pad upłyvam muža jana rezka pierajšła na sukienki) i …zavodziła ramany na baku.
Moc seksualnaja
Fryda pa pryrodzie svajoj była biseksuałkaj i nie chavała hetaha. Akramia Dyjeha, u jaje žyćci byli roznyja pa praciahłaści ramany ź niekalkimi žančynami, jašče adnym mastakom i navat z revalucyjnym dziejačam Lvom Trockim, jaki nienadoŭha znajšoŭ doma ŭ Frydy i Dyjeha palityčnaje schovišča (mastačka, jak i jaje muž, była kamunistkaj).
Moc vykazvańniaŭ
Karciny Frydy siońnia pradajucca za miljony dalaraŭ. Pry jaje žyćci, choć i znachodzilisia prychilniki jaje tvorčaści, usio ž dla bolšaści hramadstva jaje mastactva było praźmierna «hiniekałahičnym» i «naturalistyčnym». Čaho tolki vartaja jaje znakamitaja karcina «Majo naradžeńnie», jakaja była stvoranaja amal adrazu paśla vykidyša. Jana demanstruje cialesnaść takoj, jakaja jana jość, biez prycharošvańniaŭ. Dziakujučy joj, u mastactvie, narešcie, pačali adkryta reprezientavacca tema rodaŭ.
… Jana pamierła va ŭzroście 47 hod ad zapaleńnia lohkich. Niezadoŭha da hetaha Frydzie amputavali pravuju halonku, ale jana da apošniaha svajho dnia praciahvała pracavać na ŭsiu moc. Na adkryćcio pieršaj piersanalnaj vystavy na radzimie skamandavała prynieści jaje na łožku.
«Spadziajusia, što adychod budzie ŭdałym, i ja bolš nie viarnusia» — hety zapis staŭ apošnim u jaje dziońniku. I sychod sapraŭdy staŭ udałym: pa bijahrafii Frydy źniali niekalki filmaŭ, jana natchniła mnohich dyzajnieraŭ na stvareńnie novych kalekcyj, pad jaje brendam pačali vypuskać kaśmietyku, abutak, nižniuju bializnu, suvieniry i navat tekiłu — tak lubimy joj pry žyćci napoj.
A ŭ Minsku voś prajšła viečaryna ŭ jaje honar. Čym ža tak padabajecca Fryda biełarusam?
Ciapier čytajuć
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj93
Kamientary