«U jaho ž synočak zastaŭsia». Padrabiaznaści incydentu ŭ Ivacevickim rajonie, dzie zahinuŭ učastkovy

17 žniŭnia 57-hadovy žychar vioski Babrovičy Siarhiej Dz. adkryŭ ahoń z palaŭničaj strelby pa milicyjantach, jakija pryjšli da jaho pravieryć umovy zachoŭvańnia zbroi. U vyniku 42-hadovy major milicyi zahinuŭ na miescy, a jaho 23-hadovy kaleha trapiŭ u reanimacyju. Padrabiaznaści TUT.BY daviedaŭsia na miescy trahiedyi.

Vioska Babrovičy znachodziacca na navodšybie Ivacevickaha rajona. Nasieleny punkt maleńki: para vulic, niekalki dziasiatkaŭ damoŭ i žycharoŭ, jakija ŭsio adzin pra adnaho viedajuć. Da najbližejšaha nasielenaha punkta adsiul 10 kiłamietraŭ pa hruntavoj lasnoj darozie. Vioska byccam abaroniena ad astatniaha śvietu ščylnym ščytom z sosnaŭ i jełak. 17 žniŭnia zvykłuju cišyniu spakojnych Babrovičaŭ parušyli huki strełaŭ.

«Padumaŭ, što dziadźku chutčej za ŭsio zabjuć»

Usio adbyłosia na centralnaj vulicy kala doma miascovaha žychara Siarhieja Dz. Pavodle aficyjnaj viersii, supracoŭniki Ivacevickaha RAUS pravodzili rejd pa praviercy ŭmoŭ zachoŭvańnia ahniastrelnaj zbroi. U vioscy Babrovičy kala 12.00 jany padyšli da chaty Siarhieja, jaki zachoŭvaŭ palaŭničuju strelbu TOZ 1985 hoda vypusku. Mužčyna jaje trymaŭ u siabie, bo z 2000 hoda byŭ palaŭničym.

Učastkovy Ihar Ł. i jaho kaleha Dzianis S. padyšli da vieśničak, pradstavilisia i paviedamili pra metu svajho vizitu. Siarhiej vyjšaŭ da ich sa strelbaj i adkryŭ ahoń pa pravaachoŭnikach. 42-hadovy major Ihar Ł. zahinuŭ na miescy. Jaho naparniku ŭdałosia vyratavacca. Pa słovach miascovych, streł karciečču trapiŭ jamu ŭ śpinu. Susiedka Siarhieja z doma nasuprać, u jakoj usio adbyłosia prosta na vačach, kinułasia da paranienaha milicyjanta, akazała jamu pieršuju dapamohu i vyklikała chutkuju. Miedyki, jakija prybyli na miesca zdareńnia, zavieźli jaho ŭ reanimacyju balnicy.

Pavialičyć

Zatym strałok zamknuŭsia ŭ svajoj chacie i nikoha nie padpuskaŭ. Viaskoŭca zatrymali ŭ vyniku śpiecapieracyi. Vidavočcam zatrymańnia staŭ jaho plamieńnik Siamion, jaki žyvie ŭ domie niepadalok. Kali ŭ vioscy padniaŭsia šum, jon padyšoŭ da doma svajaka:

— Ja pačuŭ, što ŭžo kvadrakoptery tut lotali. Padumaŭ, što kamandu dali (na zachop). Kažuć, što dziadźka nie davaŭ da cieła zabitaha padyści, kazaŭ, što budzie «da kanca». Paranieny niby sam adpoŭz. Jamu ŭ śpinu patrapiła. Potym ja pačuŭ streły. Padumaŭ, što dziadźku chutčej za ŭsio zabjuć. (…)

Jak mnie raspaviali, kali AMAPaŭcy ŭłamilisia ŭ dom, jon pasprabavaŭ vyleźci praz akno, ale potym kryknuŭ: «usio, ja zdajusia». I jaho skrucili. (…) Ja pajšoŭ da płota i ŭbačyŭ, jak jaho vyvodziać.

Što pasłužyła pryčynaj takoj reakcyi Siarhieja na vizit milicyjantaŭ, Siamion dakładna skazać nie moža.

Pa słovach siastry zatrymanaha Niny, try dni tamu pamiž jaje bratam i ŭčastkovym na bierazie voziera, raźmieščanaha niepadalok, uźnikła sprečka z-za rybałki. Pra heta žančynie raspaviali adnaviaskoŭcy Siarhieja. Čuŭ pra kanflikt i Siamion.

Pavialičyć

— Dziadźka moj zapalčyvaha charaktaru. I voś kali milicyjanty (praz try dni paśla kanfliktu) pryjechali da jaho, to jon abo spałochaŭsia ci što. (…) U dziadźki majho składany charaktar, ale na ŭliku ŭ psichbalnicy jon nie znachodziŭsia, — rastłumačyŭ Siamion.

Siarhiej žyŭ u domie z maci Alaksandraj Andronaŭnaj. Kali stan žančyny pahoršaŭ, jaje zabirała da siabie siastra zatrymanaha. Za niekalki tydniaŭ da trahiedyi Alaksandra Andronaŭna pierajechała ź vioski da svajakoŭ u horad, i jaje syn zastaŭsia adzin.

Paśla taho, jak žančyna pačuła ab zdareńni, jana pryjechała ŭ Babrovičy razam z dačkoj i druhim synam. Alaksandra Andronaŭna kaža, što była šakavanaja navinami:

— Jon mnie i vady pryniasie, i dom prybiare. Jon usio rabiŭ, nie piŭ. Mnie jon byŭ dobrym synam.

«Jon tak lubiŭ tatu, a tata — jaho»

Zahinuły ŭčastkovy Ihar Ł. pražyvaŭ ź siamjoj u haradskim pasiołku Cielachany. Žychary Babrovič, ź jakim udałosia pahutaryć TUT.BY, charaktaryzujuć jaho jak prystojnaha milicyjanta, dobraha siemjanina. Mužčyna pajšoŭ pa śladach baćki, jaki taksama słužyŭ u orhanach unutranych spraŭ. Ihar Ł. razam z žonkaj vychoŭvaŭ syna-dzieviacikłaśnika.

Z Babrovič zahinułaha milicyjanta źviazvaje tolki ciotka jaho žonki, 94-hadovaja Tekla Ivanaŭna. Pažyłaja žančyna raspaviała, što Ihar časta pryjazdžaŭ jaje praviedvać. Časam braŭ z saboj syna Mikitu.

Apošni raz jon naviedvaŭ svajačku ranicaj 17 žniŭnia.

— Skazaŭ, što vyjdzie ŭ adpačynak, budzie jeździć u žuraviny. Na raźvitańnie spytaŭ: «Babula, jak zdaroŭje». Ja jamu skazała: «Unučak, dobra». Zaśmiajałasia. Jon raźvitaŭsia i pajechaŭ, — uspaminaje Tekla Ivanaŭna.

Pavialičyć

Pra trahiedyju Tekla Ivanaŭna daviedałasia ad žančyny, jakaja jaje dahladaje:

— Jana ź im (Iharam) parazmaŭlała, jon syšoŭ. A potym streł. Jana vybiehła i basanož pabiehła tudy (da doma strałka). Jana viartajecca, ja pytajusia: «Što zdaryłasia?» Mnie nichto ničoha nie kaža. Tady ja vyjšła na vulicu, hladžu ludziej šmat, baču adzin učastkovy chodzić, a jaho niama. Baču la płota, što chtości lažyć. Ja dumała, moža, jon upaŭ. A mnie ž nichto ničoha nie kaža, kab ja nie chvalavałasia. Pryjechała doktar, nakałoła mianie ŭkołami … U jaho ž synočak zastaŭsia … Mikitka. Jon tak lubiŭ tatu, a tata — jaho.

Raspačata kryminalnaja sprava

Uviečary ŭ piatnicu miesca zdareńnia było ačeplena, pracavali śledčyja.

— Śledčyja sumiesna sa śpiecyjalistami dziaržkamiteta sudovych ekśpiertyz pravodziać ahlad miesca zdareńnia, padčas jakoha ažyćciaŭlajecca fiksacyja infarmacyi na miescy zdareńnia, a taksama kanfiskoŭvajucca nieabchodnyja abjekty, jakija mohuć mieć značeńnie dla rasśledavańnia kryminalnaj spravy. U ciapierašni čas Śledčym upraŭleńniem u dačynieńni da mužčyny raspačata kryminalnaja sprava, — raspavioŭ aficyjny pradstaŭnik upraŭleńnia Śledčaha kamiteta pa Bresckaj vobłaści Dźmitryj Ivaniuk.

U dačynieńni da zatrymanaha zaviedziena kryminalnaja sprava pa p. 10 č. 2 art. 139 (Zabojstva asoby ŭ suviazi z ažyćciaŭleńniem im słužbovaj dziejnaści), č. 1 art. 14 p. 1, 10 č. 2 art. 139 (Zamach na zabojstva dźviuch asob u suviazi z ažyćciaŭleńniem imi słužbovaj dziejnaści) Kryminalnaha kodeksa Respubliki Biełaruś.

U bližejšy čas mužčyna budzie ahledžany na pradmiet znachodžańnia ŭ narkatyčnym abo ałkaholnym apjanieńni. Śledčymi buduć pryznačanyja nieabchodnyja ekśpiertnyja daśledavańni, u liku jakich psichołaha-psichijatryčnaja ekśpiertyza, jakaja vyśvietlić psichičny stan padazravanaj asoby.

• 0
• 0
• 0
• 0
• 0
• 0
• 0
• 0