Japonka Naomi Osaka vyjhrała Adkryty čempijanat ZŠA pa tenisie, abyhraŭšy lehiendarnuju Sierenu Uiljams. Ale hledačam matč zapomnicca, chutčej, kanfliktam razzłavanaj amierykanki i sudździaŭ padčas adnaho z samych dramatyčnych finałaŭ u historyi US Open.
Vyrašalnaja sustreča turniru ŭ Ńju-Jorku pamiž Osakaj (20-y numar pasievu) i Uiljams (17) zaviaršyłasia ŭ subotu ź likam 6:2, 6:4. 20-hadovaja Osaka, takim čynam, stała pieršaj japonkaj, jakaja zmahła zavajavać tytuł na turniry sieryi «Vialikaha šlema». Pa darozie da finału jana vyjhrała ŭ biełarusak Sasnovič i Sabalenka.
Sierena Uiljams admoviłasia pacisnuć ruku sudździKarłasu Ramasu paśla matča.
36-hadovaja amierykanka pavinšavała Osaku ź niečakanaj pieramohaj, adnak uvaha publiki i žurnalistaŭ uvieś matč była prykutaja da pavodzin samoj Siereny, jakaja niekalki razoŭ u rezkaj formie krytykavała dziejańni refiery.
«Mnie škada, što heta pavinna było skončycca hetak», — skazała zapłakanaja Osaka paśla matča, pieramohaj jakoj byli zadavolenyja daloka nie ŭsie hledačy matča.
Što adbyłosia?
U druhim secie sudździa na vyšcy Karłas Ramas spačatku vynies 36-hadovaj amierykancy papiaredžańnie za padkazku z boku treniera Patryka Muratahłu. Padobnyja padkazki dazvolenyja na turnirach WTA, ale zabaronienyja na spabornictvach «Vialikaha šlema».
Uiljams admaŭlała, što atrymała jakija-niebudź parady ad treniera, i zajaviła sudździ, što «nikoli b nie stała žulničać, kab vyjhrać, lepš užo paciarpieć parazu».
Zrešty, francuz paźniej pryznaŭsia ESPN, što sapraŭdy padavaŭ znaki Sierenie.
— Ja rabiŭ padkazki, ale nie dumaju, što jana hladzieła na mianie, — skazaŭ Muratahłu. — Saša [trenier Asaki Saša Badžyn] taksama padkazvaŭ, usie tak robiać».
Zatym Uiljams była aštrafavanaja na ačko paśla taho, jak raźbiła ab kort svaju rakietku pry liku 3:2 u druhim secie.
Uiljams pryjšła ŭ lutaść, padbiehła da Ramasa, stała kryčać na jaho, natoŭp krykami taksama padtrymlivaŭ tenisistku.
Paśla hetaha razzłavanaja Uiljams stała kryčać: «Ty chłus. Ty bolš nie źjavišsia na maim korcie, pakul ty žyvy. Kali ty pryniasieš mnie prabačeńni? Vybačajsia!»
Sudździa paličyŭ słovy spartsmienki abrazaj i pazbaviŭ jaje hiejma.
Praciah matča taksama supravadžaŭsia ślaźmi i łajankaj z boku Siereny i śvistam zaŭziataraŭ, i pieramoha Osaki na fonie ŭsiaho hetaha syšła na druhi płan.
Sierena Uiljams — nacyjanalnaja ikona ZŠA i adna z hałoŭnych zorak tenisa ŭ śviecie — atrymała vialikuju padtrymku ad zaŭziataraŭ na stadyjonie.
Adnak natoŭp zacichaŭ, nazirajučy za spakojnaj hulnioj Osaki suprać šaścirazovaj čempijonki.
Osaka, upieršyniu vystupajučy ŭ finale turniru «Vialikaha šlema», dy jašče suprać svajho kumira, zusim nie spałochałasia ahresiŭnaha padychodu Uiljams, jaki ŭ vyniku pryvioŭ da šmatlikich pamyłak amierykanki.
Natoŭp na stadyjonie pieršapačatkova pavažliva staviŭsia da Osaki, u vyniku byŭ vidavočna niazhodny ź mierami Ramasa ŭ dačynieńni da Uiljams, a ŭ druhim, jašče bolš dramatyčnym, secie heta niazhoda pieratvaryłasia ŭ sapraŭdny hnieŭ.
Supracoŭniki słužbaŭ biaśpieki supravadžali Ramasa, kali jon pakidaŭ kort. Bolš partuhalec tudy nie viarnuŭsia, choć zvyčajna sudździa pavinien prysutničać na ŭznaharodžańni.
Śvistki z trybun hučali i padčas cyrymonii ŭznaharodžańnia, i Osacy ledź udavałasia strymlivać ślozy.
Ciapier čytajuć
Kruiz na ciepłachodzie «Biełaja Ruś» pa rekach Paleśsia kaštuje jak adpačynak u Turcyi. Ale kajuty na viasnu-leta amal vykuplenyja10
Kamientary