Palmavy alej i hłazura zamiest šakaładu. Jak rasijskija cukierki vyciskajuć biełaruskija z palic kram
Karystalniki sacyjalnych sietak aburylisia cenami na ajčynnyja cukierki ŭ Biełarusi: mnohija siahajuć 50 rubloŭ za kiłahram. «Radyjo Svaboda» pahladzieła, jak adroźnivajucca ceny na ajčynnyja i impartnyja łasunki i ci jość roźnica ŭ ich składzie.
U sacyjalnaj sietcy Threads abmiarkoŭvajuć ceny na biełaruskija kandytarskija vyraby. Karystalnikaŭ aburaje, što zamiežnyja cukierki časta tańniejšyja za biełaruskija. Ci sapraŭdy heta tak?
Biełaruskija cukierki i rasijskija anałahi
Biełaruski brend ad «Kamunarki» — cukierki «Ptušynaje małako» — kaštujuć 33 rubli 75 kapiejek za kiłahram. Skład vyhladaje naturalnym: niama palmavaha aleju i kandytarskich tłuščaŭ, ale jość kakavavy alej i masła — naturalnyja pradukty. Taksama ŭ składzie jość emulhatar E476, jaki vykarystoŭvajecca jak dadatak da šakaładu, nie pryznany škodnym.
Rasijski analah hetaj cukierki «Ptica-sładunica» pradajuć sa źnižkaj — 13 rubloŭ 89 kapiejek za kiło, to-bok u 2,4 raza tańniej. Adnak jaje skład adroźnivajecca. Palmavy alej vykarystoŭvajecca jak zamieńnik kakavavaha aleju i małočnaha tłušču, zamiest šakaładu tut kandytarskaja hłazura. U składzie rasijskich cukierak adrazu niekalki emulhataraŭ-stabilizataraŭ typu Je.
Biełaruskija cukierki «Kakosik» ad vytvorcy «Šakaładava» kaštujuć 22 rubli 45 kapiejek za kiłahram. Rasijski anałah Miss Ko-Ko ad rasijskaha vytvorcy «Sładunica» tańniejšy na 4 kapiejki. U składzie i tam, i tam jość palmavy alej, zamiest šakaładu — hłazura. Adnak u biełaruskim varyjancie jość naturalnaja kakosavaja stružka i mienš tłuščaŭ.
Biełaruski brend ad «Kamunarki» — šakaładnyja cukierki z arecham «Lubimaja Alonka» — kaštujuć u hipiermarkiecie Green 51 rubiel za kiłahram.
Cukierki Nuts ad rasijskaha vytvorcy «Niestle Rośsija» pradajuć sa źnižkaj pa 39 rubloŭ 24 kapiejki. Roźnica ź biełaruskim anałaham — 11 rubloŭ 76 kapiejek, ci 22%. Da źnižki cana była 45 rubloŭ 15 kapiejek, h. zn. mienšaja za canu na «Lubimuju Alonku» na 5 rubloŭ 85 kapiejek.
Ich skład padobny: i tam, i tam jość šakaład, arechi. Kali paraŭnoŭvać bolš padrabiazna, to ŭ biełaruskim varyjancie jość «tłušč kandytarski», što moža być sumieśsiu raślinnych alejaŭ. U impartnych cukierkach paznačana «raślinny alej». Ale ŭ abodvuch vypadkach nie paznačajecca, jaki heta kankretna alej.
Na «Kamunarcy» nie raz zajaŭlali, što nie vykarystoŭvajuć u svaich praduktach palmavaha aleju. Adnak pryznavalisia, što taki alej moža być u «kandytarskim tłuščy», bo jaho nie robiać na fabrycy, a zavoziać. Składnik «raślinny alej», paznačany ŭ składzie rasijskich cukierak, taksama moža źmiaščać palmavy alej.
Što vybirajuć ludzi
Servis je-dastaŭka na zapyt «cukierki» vydaje 41 najmieńnie biełaruskaj vytvorčaści i 29 — rasijskaj. Jeŭrapiejskich brendaŭ pry hetym vobmal i jany kaštujuć nieparaŭnalna bolš. Naprykład, u kramach možna znajści niamieckija šakaładki Ritter Sport. Cana pačynajecca ad 11 rubloŭ. U susiednich krainach ES hetyja šakaładki tańniejšyja, u Litvie, naprykład, 2,89 jeŭra, ci 9 rubloŭ 88 kapiejek pa ciapierašnim kursie.
Nabor niamieckich cukierak Toffifee u Green pradajuć pa 11 rubloŭ 99 kapiejek za karobačku vahoj 125 hramaŭ. U Litvie hetyja ž cukierki kaštujuć 10 rubloŭ na biełaruskija hrošy.
«Radyjo Svaboda» na ŭmovach ananimnaści raspytała spažyŭcoŭ, jakija cukierki jany kuplajuć. Mnohija zaŭvažyli, što biełaruskija kandytarskija vyraby padaraželi. Adnak bolšaść apytanych kažuć, što ŭsio adno kuplajuć biełaruskija marki, «choć i radziej — praz ceny».
A rasijskija cukierki, pa nazirańniach surazmoŭcaŭ, pačali źjaŭlacca paru hadoŭ tamu, bolšaść u tannym siehmiencie, i jany «sastupajuć jakaściu i smakam».
Zhodna sa statystykaj Biełstatu, siarednija ceny na hłazuravanyja šakaładam cukierki za hod (sioletni studzień da letašniaha) vyraśli na 23,4%, šakaład padaražeŭ na 18,3%.
«Na ceny moža ŭpłyvać łahistyka»
Staršaja navukovaja supracoŭnica daśledčaha centra Beroc Anastasija Łuzhina nazyvaje dźvie pryčyny vyšejšaj cany na biełaruskija kandytarskija vyraby. Heta łahistyka i jakaść.
«Dzieści možna panizić canu, skaraciŭšy vydatki, kab pry hetym nie pahoršyłasia jakaść. U Biełarusi heta nie zaŭsiody mohuć svoječasova zrabić, asabliva na dziaržaŭnym pradpryjemstvie. Taksama ŭpłyvaje łahistyka, ciapier z pastaŭkaj inhredyjentaŭ mohuć być składanaści. Impartnyja tańniejšyja cukierki mohuć być horšaj jakaści: ci jość tam, naprykład, palmavy alej, ci skład bolš naturalny. Z adnaho boku na canu ŭpłyvaje efiektyŭnaść vytvorčaści, a z druhoha — šlachi pastavak inhredyjentaŭ», — kaža ekśpiertka.
U 2023—2025 hadach rezka raśli ceny na kakava-baby — adzin z asnoŭnych vidaŭ syraviny dla šakaładu i cukierak. Heta było źviazana ź nieŭradžajem u Zachodniaj Afrycy. U pačatku 2026 hoda ceny na kakava-baby pačali źnižacca.
Ciapier čytajuć
Maŭrykij, Siejšeły, Šry-Łanka i nie tolki: pahladzieli, kudy źbiehli ad biełaruskich marazoŭ praŭładnyja artysty i viadučyja15
Kamientary