BT vypuściła druhi epizod «Makajonka, 9»: Trafim, Buzava i rasijski šanson VIDEA
U subotu, 6 kastryčnika, BT pakazała druhi vypusk šou «Makajonka, 9» ź viadučym Jaŭhienam Pierlinym. Nahadajem, pieršy vypusk hetaj pieradačy vyklikaŭ škvał niehatyŭnych vodhukaŭ. U druhi vypusk pryvieźli rasijskaha šansańje Trafima, havaryli naviny pra Ranałdu i Buzavu i skončyli nizkajakasnym repam. Pry prahladzie prahramy było ŭstojlivaje adčuvańnie, što ty hladziš nie hałoŭny kanał biełaruskaha telebačańnia, a niejki rehijanalny rasijski kanał, bo ničoha biełaruskaha ŭ «Makajonka, 9» nie było. Stop, było. Pra konkurs «Vaładar vioski» ŭ Słucku.
Pačałasia pieradača ź iraničnaha abmierkavańnia vodhukaŭ na pieršy vypusk. Samaironija heta dobraja rysa, ale biaskoncaje absmoktvańnie hetaj temy stamlaje hledača.
Potym byŭ błok abmierkavańnia apošnich spartyŭnych padziej z kamientataram Artašesam Antanianam i bajcom tajskaha boksa Čynhizam Ałazavym.
Nastupnyja hości prahramy — ukrainski režysior Stas Žyrkoŭ i biełaruski akcior Maksim Brahiniec. U niefarmalnaj atmaśfiery jany ź Pierlinym abmiarkoŭvali premjeru ŭ Minsku svajho śpiektakla «Palavańnie na siabie», a potym sprabavali žartavać pra admienu zabarony na prodaž ałkaholu ŭnačy. I heta možna nazvać samym pazityŭnym kavałkam prahramy. Tut «Makajonka, 9» spracavała na budučyniu, a nie padbirała ź ziamli toje, što ŭžo niekalki dzion nie źjaŭlajecca cikavaj infanahodaj.
Nastupny hość — rasijski šansańje Siarhiej Trafimaŭ. Vidavočna, što jaho aŭtary prahramy pazicyjanavali jak chedłajniera.
Pierlin pačaŭ abmiarkoŭvać novy klip Trafimava «Jadriona-Matriona». Ab čym hety klip?
«Klip pra niaścierpny pošuk duchoŭnaj skrepy dla ŭsiaho našaha šmatpakutnaha ruskaha naroda», — adkazaŭ Trafimaŭ.
A potym rasijski hość praśpiavaŭ typovuju pieśniu ŭ žanry «ruskaha šansona» pra «šašłyčok pod końjačok».
Dalej u prajm-tajm efiry biełaruskaha telebačańnia abmiarkoŭvali rasijanku Volhu Buzavu, jakuju nazvali «karalevaj instahrama». Dziakuj bohu, samoj Buzavaj u studyi nie było.
Nastupnym hościem byŭ hałoŭny chareohraf dziciačaha «Jeŭrabačańnia» Raman Kavaloŭ. Abmierkavaŭšy tvorčaść hościa, Pierlin i Kavaloŭ sprabavali paŭtaryć tancy viadomych palitykaŭ — Terezy Mej, Uładzimira Pucina. Žarty i kpiny z palityčnych lidaraŭ jakich chočaš krain, ale tolki nie z našych. Heta dakładna biełaruskaje telebačańnie?
Apošniaj hościaj prahramy była viadučaja «Panaramy» Palina Šuba. Razam ź Pierlinym jany abmiarkoŭvali sielskahaspadarčy konkurs «Vaładar vioski» ŭ Słucku.
Nu a skončyŭsia hety viniehret pieśniaj «adnaho z najbolš hučnych chip-chop prajektaŭ, jaki vybuchnuŭ na ceły śviet» Super Mario.
Internet-karystalniki prahramu nie acanili. Kolkaść niehatyŭnych vodhukaŭ iznoŭ u dziasiatki razoŭ bolšaja, čym pazityŭnych.
«Čamu maje kamienty źbirajuć bolš łajkaŭ, čym vaša prahrama?», «Jak možna było zrabić horš, čym u pieršy raz?», «Čarhovaje dnišča prabita» — heta, napeŭna, adny z najbolš prystojnych kamientaroŭ na Jutubie pad druhim vypuskam «Makajonka, 9».
Zamiest zabaŭlalnaha šou my pabačyli čarhovy pradukt cenzury na narodnyja hrošy.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary