Źjavilisia šykoŭnyja pokiernyja karty z partretami ajcoŭ BNR FOTY
Jubilejny hod amal skončany, ale stvaralniki pokiernych kartaŭ u stylistycy našaj pieršaj nacyjanalnaj dziaržavy ŭsio ž paśpieli. Na minułym tydni z drukarni zabrali nakład jakasnych i dobra ilustravanych kartaŭ z partretami «ajcoŭ respubliki», piša budzma.by.
Łastoŭski, Kandratovič, Miadziołka, Bałachovič i inšyja histaryčnyja piersanažy z časoŭ BNR stali karalami, valetami, damami i džokierami ŭ ihralnaj kałodzie. Usie partrety hustoŭna admalavanyja ŭ kolery, a sami karty pryjemna trymać u rukach — kardon i druk najvyšejšaha hatunku! Chto i jak zrabiŭ hety cud užo «pad zasłonu» 100-hodździa BNR?
Kaladny padarunak i «pieršaja łastaŭka» na 101-ju hadavinu BNR
Prajekt «Karty dla hulni 100 hadoŭ BNR» paŭstaŭ dziakujučy supracy supołki dyzajnieraŭ PRAS, vydaviectva «Technałohija» i kamandy Pan Brat (viadomaj raniej pa «sarmackich cišotkach»).
«Da 100-hodździa BNR my vyrašyli zrabić niešta admietnaje, — raspaviadaje kaardynatar prajektu Źmicier Karabač. — Šmat było cišotak, mapaŭ, paštovak, nalepak, a što jašče? My vyrašyli — ihralnyja karty. Tak, hod zakančvajecca, ale my paśpieli! Ciapier heta i cudoŭny kaladny padarunak, i «pieršaja łastaŭka» da śviatkavańnia 101-j hadaviny BNR».
Pavodle Źmitra, za śpinaj zastałasia niemałaja praca. Spačatku ideja, jakaja pryjšła biźniesoŭcu i miecenatu Paŭłu Bierahoviču. Paźniej — vybar «panteonu ajcoŭ-zasnavalnikaŭ» — tut dapamahli historyk Uładzimir Lachoŭski i vydaviec Źmicier Sańko. Dziakujučy mastaku Alaksieju Kulbickamu byŭ stvorany adziny mastacki styl, a Uładzimir Arłoŭ zrabiŭ tekstavuju padvodku da kožnaha piersanaža.
Kałoda — heta 52 karty niepasredna dla hulni, a taksama kartki z tłumačeńniami, chto jość chto. Stvaralniki pasprabavali navat vyvieści histaryčnyja i losavyja linii, kab raskłaści ŭsich hierojaŭ pa svajoj maści. Džokierami, darečy, akazalisia Stanisłaŭ Bułak-Bałachovič i Makar Kraŭcoŭ: najbolš luty i niepradkazalny vajar BNR i aŭtar himna «My vyjdziem ščylnymi radami».
Nie chutka, ale jakasna. Nie tanna, ale statusna
«Nie toje kab my rabili marudna, — praciahvaje Źmicier. — Prosta spatrebiŭsia čas, kab zrabić jakasna. Takaja data ŭsio ž raz u žyćci byvaje — možam sabie dazvolić dolu pierfiekcyjanizmu. U vyniku atrymałasia pryhoža, statusna i niatanna: usio ž taki italjanski kardon, cudoŭny druk!»
Karty sapraŭdy nadrukavanyja na admysłovym kartačnym kardonie Burgo (Italija) z unutranym karbonavym słojem i pakryćciom Duplex Linen. Čałavieku z vulicy heta naŭrad ci niešta skaža, ale karty z takimi charaktarystykami majuć najvyšejšuju katehoryju siarod kardonnych kartaŭ u śviecie! Tamu kałoda sapraŭdy statusnaja.
U «durnia» hulać zabaraniajecca!
Z advarotnaha boku pačka na pakupnika paziraje pierakreśleny partret čyrvonaarmiejca z cyharkaj u zubach (niby z apovieściaŭ Piaseckaha). I heta zusim nie baraćba z kureńniem, a humar, bo pobač nadpis: «U «durnia» hulać zabaraniajecca». Stvaralniki rekamiendujuć hulać hetymi kartami ŭ bolš šlachietnyja hulni: pokier, vist, prefierans i h.d.
Kamplekt siarod inšaha ŭtrymlivaje infarmacyjny buklecik pra historyju i rolu BNR — na anhielskaj i ruskaj movach. Viadoma, što źbiralniki kartačnych kałodaŭ jość pa ŭsim śviecie, tamu čym nie nahoda dla ekskursu ŭ našu historyju dla zamiežnikaŭ?
Dzie znajści?
Karty «100 hadoŭ BNR» užo možna znajści ŭ Minsku ŭ kramie Symbal.by, u Hrodnie ŭ kramie «Cudoŭnia». Chutka karty buduć pradavacca i ŭ internet-kramie panbrat.by.
Kolki kaštuje?
Ahulny košt dla ŭsich kramaŭ budzie składać 35 rubloŭ. Nie prapuścicie!
Ciapier čytajuć
«Razmaŭlaŭ uvieś čas pa-biełarusku». Pavieł Sieviaryniec zapisaŭ svoj pieršy zvarot paśla vyzvaleńnia9
«Razmaŭlaŭ uvieś čas pa-biełarusku». Pavieł Sieviaryniec zapisaŭ svoj pieršy zvarot paśla vyzvaleńnia
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2121
Kamientary