Što my słuchali ŭ lutym: dziasiatka najbolš značnych muzyčnych albomaŭ miesiaca
Redki miesiac adznačajecca ajčynnymi muzyčnymi navinkami, ale luty prosta pabiŭ usie mahčymyja rekordy. U našaj tradycyjnaj padborcy znajšłosia miesca ažno čatyrom biełaruskim płytkam.
Ciapier raspaviadziom padrabiaźniej pra kožny ź dziesiaci albomaŭ, na jakija my b chacieli źviarnuć vašu ŭvahu.
Within Temptation — Resist
Amatary tvorčaści hurta čakali novaha alboma cełych piać hadoŭ. Paśla vychadu «Hydra» vakalistka Within Temptation Šaron den Adel sutyknułasia z asabistymi prablemami i tvorčym vyharańniem.
Jana sprabavała ich vyrašyć napisańniem bolš mieładyčnych i «łampavych» piesień, jakija nie vielmi padychodzili dla simfonik-mietał kalektyva. Sajd-prajekt viarnuŭ den Adel u patrebnaje rečyšča, vynik jakoha možna nazirać u albomie «Resist».
Krytyki nazyvajuć novy albom najlepšym u dyskahrafii Within Temptation, vy taksama možacie pravieryć, ci apraŭdanym było čakańnie fanataŭ?
Beirut — Gallipoli
Beirut na čale z multyinstrumientalistam Zakam Kondanam zapisaŭ jašče adnu častku «saŭndtreka dla žyćcia».
I sapraŭdy: pad nasyčanuju, sakavituju i raznastajnuju muzyku dobra vandravać, pracavać, radavacca ci kryšačku pasumavać.
Hałoŭnaje — nie zabyvać atrymlivać asałodu ad žyćcia.
Lavon Volski — Hravitacyja
Albomam «Hravitacyja» Volski zaviaršyŭ tryłohiju, jakuju raspačaŭ u 2014 hodzie «Hramadaznaŭstvam» i praciahnuŭ u 2016-m «Psichasamatykaj». Hrošy na zapis paśpiachova byli sabranyja praz kraŭdfandynh.
Jak raspavioŭ sam muzyka, kancepcyja alboma — historyja čałaviečaha žyćcia, ad naradžeńnia i da skonu, z pryviazkaj da peŭnaj terytoryi. Ad junackaha maksimalizmu z marami i letucieńniami da stałaści, kali treba padvodzić vyniki žyćcia. Šmat u čym nieviasiołyja.
Ariana Grande — thank u, next
Praz paŭhoda paśla alboma «Sweetener» Aryjana Hrande vypuściła novy albom. Ale ad papiaredniaha, jaki, darečy, atrymaŭ Hremi jak najlepšy pop-albom, jon kardynalna adroźnivajecca ŭ pieršuju čarhu pryvatnaściu i intymnaściu liryki.
U «thank u, next» śpiavačka adkryta raskazvaje pra svaje pačućci i pieražyvańni, psichałahičnyja prablemy i strachi, nie bajučysia vyhladać słabaj pierad słuchačami.
Trubetskoy — Zašievielit bit
U adroźnieńnie ad Siarhieja Michałka z muzyčnymi ekśpierymientami ŭ režymie «non-stop», pra Paŭła Bułatnikava i jahony hurt było amal ničoha nie čutno apošnim časam.
Narešcie ŭ lutym Trubetskoy paradavaŭ prychilnikaŭ novaj pracaj. Bolšaść tekstaŭ napisaŭ były saksafanist «lapisaŭ» Alaksiej Zahoryn, bolš viadomy jak SiROP.
SiROP 17 hadoŭ adsiedzieŭ u turmie, ale ciapier vyrašyŭ zaviazać z kryminałam i pačaŭ pisać ahresiŭnyja nadzionnyja teksty.
Albom u cełym atrymaŭsia vielmi niaroŭnym. Razam z razvažańniami pra hlancavy śviet, dzie ludzi siadziać na załatych łancuhach, i biełaruskamoŭnym trekam pra serca, što nie zdajecca, na im jość absalutna prachadnyja rečy, dzie ŭvieś tekst składajecca z frazy «Žodino-Žodino, biełazy proizvodim-na».
Ale heta ŭžo zusim nie padobna da tych samych «Lapisaŭ». Dobra heta ci nie, kožny vyrašaje sam.
Yann Tiersen — ALL
Nazvu alboma možna pierakłaści z anhlijskaj jak «usio», a z bretonskaj (rodnaj dla Ćjersana movy) — jak «inšaje». Tak i z usimi kampazicyjami alboma, jakija šmathranna raskryvajucca pry šmatrazovym prasłuchoŭvańni.
Kampazitar u čarhovy raz padkreślivaje, što ŭ raznastajnaści form isnavańnia jość luboŭ i pryhažość, a ŭ adzinstvie supraćlehłaściaŭ chavajecca sens žyćcia.
Pietla Pristrastija — Huł
Badaj, najlepšy biełaruski rok-hurt u lutym vypuściŭ piaty albom pad nazvaj «Huł».
«Huł» — heta saŭndtrek adčuvańnia našaha «siońnia» i pradčuvańnia budučych padziej. Huł narastaje, stanovicca prykmietaj nabližeńnia niečaha hrandyjoznaha, što moža nazaŭsiody ŭsio pamianiać.
I nierazumieńnie pryrody hetaha hułu naradžaje jak strach, tak i zachapleńnie adnačasova.
Lera Jaskievič — PRIVIAZANNOSŤ
Paśla vychadu albomaŭ Cimy Biełaruskich, Lery Jaskievič i «Pietli Pristrastija» niekatoryja rasijskija ŚMI vykazali dumku pra toje, što ciapier na ruskamoŭnaj muzyčnaj scenie zapanavali biełarusy.
I kali Cima Biełaruskich razam z hurtom Illi Čarapko-Samachvałava užo dobra znajomyja słuchačam, to Lera tolki pačynaje zavajavalny pachod pa sercy zamiežnych amataraŭ.
Pažadajem joj pośpiechu!
Beissoul & Einius — White Crow
Litoŭski duet, jaki stvaraje muzyku va ŭłasnym styli «elektrafešn», pryśviaciŭ svoj novy albom usim tym, chto adčuvaje siabie asablivym.
Litoŭcy, jakich Vogue nazyvaje ikonami stylu, viedajuć, pra što kažuć. Z samaha pačatku muzyčnaj tvorčaści jany atrymlivali palarnyja vodhuki, ale zastavalisia viernymi sabie, niečym kštałtu «biełych varon».
Padčas stvareńnia alboma Biejsoŭły dy Ejnius chavalisia ad śvietu i ludziej u lasach, pahorkach, budynkaŭ staražytnych pałacaŭ, kab ačyścić svaje dumki ad usiaho niepatrebnaha.
Dream Theater — Distance Over Time
Čatyrnaccaty albom lehiendarnaha prahresiŭ-mietał kalektyvu.
Vyjavu na vokładcy niekatoryja prychilniki źviazvajuć z hamletaŭskim Jorykam i hamletaŭskim pytańniem «Być abo nie być?». Jano časta ŭspłyvaje pierad hurtami, jakija chočuć zachavać svoj huk, nie viedučysia za novymi muzyčnymi tendencyjami.
Atrymlivajecca nie va ŭsich. Ale siabroŭ «teatra mary» heta dakładna nie datyčycca.
A što słuchali vy ŭ lutym? Pišycie ŭ kamientarach!
Našy papiarednija ahlady:
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary